Ʒare Biri 36

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹Manasere ŋosa Gileade, Makirire ŋokâ hâcne, ere ŋokâfâc jaŋere garikiŋfâc gurune gurune, Josefere ɋâricfâc gaŋne gaŋne juwefumbiŋ irec tofane moc hâcne, jaŋere micnefâc jaŋe Mose â Israe ŋic garikiŋfâc‐jeŋic jaŋere micne bapa jaŋerao fuambiŋ.

²Ehuc kecʒiŋuc mumbiŋ: “Wofuŋzi bomboŋ‐nâŋec goki ɋâsâi qahuc Israe ŋic merâfâc mâreŋ‐nâŋec nârecmurâ mutâcne‐garewec. Ehuc qomâ‐nâŋec Zelofeha ere merâfâc mâreŋ i otâfâc‐ticne jarecmurâ mutâcne‐garewec wâc.

³Mâc jaŋe Israe ŋicguru gâcne jaŋeraonec ŋic rocjopaniŋmuo ine merâfâc mâreŋ‐jeŋic i mamacfâc‐nâŋec jaŋere merâfâc mâreŋ fonârekac irecnec rorâ guru weni jaŋehec juniŋmu jaŋere merâfâc mâreŋ ira ʒuhuckeniŋmu. Iŋuc ehuc nâŋere merâfâc wiac gâcne nâwoc roniŋmu hâcne.

⁴Iŋuc fuame Israe ŋic nâŋâcne jara hombaŋ sâko maickeme merâfâc mâreŋ‐jeŋic i guru weni jaŋehec juniŋmu jaŋere merâfâc mâreŋko ʒuhuckeocmu hâcne, ehame mamacfâc‐nâŋec jaŋere merâfâc mâreŋ i pitiwaocmu.”

⁵Iŋuc mupie Mosezi Wofuŋte micte Israe ŋic ŋokac ʒiŋuc muhuc jazawec: “Josefere ɋâricfâc jaŋere garikiŋ guru jaŋe dâŋ muŋgopieŋ i manape sâckekac.

⁶Wofuŋ e Zelofeha otâfâcne jaŋere dâŋ kecʒiŋuc mukac: ‘Jaŋe ŋic i me i rocjopazo ejareme rocjopanʒepieŋ, erâ ine mamac‐jeŋicte soctofa jaŋere guruonec sawa rocjopanʒepieŋ.

⁷Israe ŋic ŋoŋere merâfâc mâreŋ i guru mockonec guru mocko mi fotâcnezejec, aricne, Israe ŋic ŋokac sasawa ŋoŋe ru sâc mamacfâc‐ŋeŋic jaŋere merâfâc mâreŋ rosanaŋkerâ bajunʒepieŋ.

⁸Â naru ŋokac Israe ŋic guru‐jeŋicko merâfâc mâreŋ‐jeŋichec juŋgopieŋ jaŋe mamacfâc‐jeŋic jaŋere garikiŋfâc irecnec ŋic rocjopapie Israe ŋic ŋokac ŋoŋe ru sâc mamacfâc‐ŋeŋic jaŋere merâfâc mâreŋ ro rauc erâ bajunʒepieŋ.

⁹Iŋuc epie merâfâc mâreŋ‐ŋeŋic i guru mockonec guru mocko mi fotâcnezejec. Israe ŋic gurune gurune ŋoŋe ru sâc ŋoŋe ŋaŋacne merâfâc mâreŋ basanaŋkerâ bajunʒepieŋ.’”

¹⁰Eme Zelofeha otâfâcne jaŋe Wofuŋzi Mose mutâcnecnewec irec sâc efârembiŋ.

¹¹Zelofeha otâfâc‐ticne Mala, Tiriza, Hogela, Milika â Noa jaŋe mamac‐jeŋicte hahac ɋafâc jaŋere ŋokâfâc rocjopambiŋ.

¹²Jaŋe Josefere ŋokâ Manase ere garikiŋfâc jaŋeraonec ŋic rocjopambiŋ hâcne; irec merâfâc mâreŋ‐jeŋic i mamac‐jeŋicte garikiŋ guruo jaha fowec.

¹³Sâcmutâc â dâŋsanaŋ i hâcne Wofuŋzi Moabi wâneŋko Jordaŋ heririŋ Jeriko hae ŋewec ira Mose âzâcneme Israe ŋic mutâcne‐jare‐fârewec.