1Eme Israe ŋic jaŋe irecnec fahare raku Moabi mâreŋ sawao Jordaŋ ocniŋucnao Jeriko haeopec teuŋ âterâ fombiŋ.
2Ziporore ŋokâ Balake eki ine Israe ŋic jaŋe Amori ŋic wiac ejarembiŋ i hone manac efârewec.
3Ehame Moabi ŋic jaŋe Israe ŋic bocjahare mâretec hâwic‐jopawec. Eme honec‐joparâ bipic tatara ejarewec.
4Irec Midiaŋ soŋaŋ micne ʒiŋuc jazambiŋ: “Bulimakao jaŋe qinʒiŋ nâfâreeŋgopieŋ irec sâc ŋicguru keci jaŋe omaec‐nâpo‐fâreniŋmu.” Iŋuc mupie Ziporo ŋokâ‐ticne Balake e dameŋ ira Moabi mâreŋte ŋicwofuŋ juweczi
5Beoro ŋokâ‐ticne Bileam erao kiŋaŋŋic sorec‐jopame rambiŋ. Bileam e ine Amawi mâreŋko Eufrata opâ heririŋnao Petoro haeo juwec. Eme kiŋaŋŋic jaŋe erao fisirâ dâŋ ʒiŋuc âzâcneniŋte sorec‐jopawec: “Manakic, Aigita mâreŋkonec ŋicguru moc jaŋe warerâ mâreŋ‐nane sâcke‐fârerâ maŋfuŋ‐naneo ŋefâreŋgopieŋ.
6Jaŋe guru sâkore bâipiec‐jopaŋgopeneŋ, irec goki ware nore erâ sâwec‐jopatec rokawepie sâcne mecne jâpec‐jopapene mâreŋ‐nâŋec beheniŋmu. No gore ʒiŋuc hâcne manakopac: Goki ŋic jambuŋ‐jopatec fârinehec eekac, me sâwec‐jopatec i wâc fârinehec jaha eekac.”
7Iŋuc mume Moabi â Midiaŋ soŋaŋ micne jaŋe sâwecdâŋ mumure furi bara rambiŋ. Rahuc juku Bileamtao fisirâ Balakere dâŋ i âzâcnembiŋ.
8Âzâcnepie ʒiŋuc jazawec: “Ŋoŋe ʒira foniŋ, ehame Wofuŋzi dâŋ i me i nazame ŋazapemu.” Iŋuc mume Moabi ŋic micne jaŋe Bileamhec fombiŋ.
9Eme Anutuzi Bileam fuacnerâ ʒiŋuc wiocnewec: “Ŋic weni jaŋe gohec juŋgopieŋ?”
10Eme Bileamzi Anutu dâŋ ʒiŋuc bâtikiecnewec: “Ziporore ŋokâ Balake, Moabi ŋicwofuŋ hâcne, e norao dâŋ ʒiŋuc muhuc râeme warejec:
11‘Manakic, Aigita mâreŋkonec ŋicguru moc jaŋe warerâ mâreŋ sâcke‐fâreŋgopieŋ. Irec goki ware nore erâ sâwec‐jopatec rokawepie sâcne mecne jopa jâpec ejarepene behec‐nâponiŋmu.’”
12Anutuzi ine Bileam kecʒiŋuc âzâcnewec: “Go jaŋehec mi razemec, erâ ŋicguru keci jaŋe jambuŋ‐jopakicnere mi sâwec‐jopazemec.”
13Iŋuc mume Bileam e furicte faharerâ Balake ŋicfâcne ʒiŋuc jazawec: “Wofuŋzi ŋoŋehec mi rapere qatara‐narejecte ŋoŋe mâreŋ‐ŋeŋicko risieniŋ.”
14Iŋuc mume Moabi ŋic micne jaŋe fahare Balakerao risie rarâ ʒiŋuc âzâcnembiŋ: “Bileam e nâŋehec wareocte mi ecnekac.”
15Eme Balake e harierâ ŋic fekicne bocjaha ʒâŋe biŋe sâkohec sorec‐jopame rambiŋ.
16Rahuc juku Bileamtao fisirâ ʒiŋuc âzâcnembiŋ: “Ziporore ŋokâ Balake e ʒiŋuc mukac: ‘Go norao warezo etec wiac moczi aka moc mi hegarezejec.
17No sâsecgu‐jâmbâŋkehuc wiac irec me irec numu‐naretec sâcne epemu, irec go ware nore erâ ŋicguru keci jaŋe sâwec‐jopazemec.’”
18Bileam eki ine Balake kiŋaŋŋicfâcne dâŋ ʒiŋuc muhuc bâtikie‐jarewec: “Balake e ficticnao siliwa â gol fusucmarâ fokac i nare tahac eocmuo ine no sifu wiac piticne me kâcɋenere erâ Wofuŋ Anutu‐nanere dâŋ sâcne mi qatarapemu.
19Erâ ŋoŋe sifu ʒira foniŋ, eme no Wofuŋzi dâŋ weniŋuc ʒuhuckerâ nazaocmu i manazepac.”
20Eme Anutuzi ŋafeo Bileam fuacnerâ ʒiŋuc âzâcnewec: “Ŋic jaŋe jowacguzo warembieŋko ine faharerâ jaŋehec rac; mâc noni dâŋ gazapemu i sawa ezemec.”
21Eme Bileam e hae fureme faharerâ doŋgi‐ticnao sate râerâ Moabi ŋic fekicne jaŋehec rawec.
22Rame Anutuzi aarickewec. Ehame Wofuŋte aŋelo aka hecnehuc hata âte bâzickecnewec. Bileam e ine kiŋaŋŋic jahec‐ticne bâjâpehapire doŋgi faio rawec.
23Eme doŋgi e Wofuŋte aŋelozi ʒika barâ hatao domaha honewec; honehuc hata kizurâ giegaŋko raʒiwec. Eme doŋgi e mocwâc hatao risieocte Bileamzi qawec.
24Eme aŋelozi ra waiŋ gie ŋoŋondeŋko hata gâŋgâŋnao domawec, ŋifec â ŋifec ira ine saczi orâŋke‐fârekicne.
25Ehame doŋgi e Wofuŋte aŋelo honerâ sac jâŋâhuc rame saczi Bileam kikene najacnewec. Iŋuc eme Bileamzi doŋgi mocwâc qawec.
26Eha Wofuŋte aŋelozi ʒuhuckerâ bânie ra hata gâŋgâŋne fowec ira domawec. Ŋondeŋ ira domahuc qanaopec me fâreopec foc fotikic sâcne mi eene.
27Ira hâcne doŋgizi Wofuŋte aŋelo honerâ hata razo eipierâ mâreŋko waha fowec. Bileamzi iŋuc honerâ boc aarickeme ɋaruc‐ticnezi doŋgi mocwâc qawec.
28Iŋuc eme Wofuŋzi doŋgi micne baafeckeme Bileam dâŋ ʒiŋuc âzâcnewec: “No wemo wiac moc egarepe honehuc nutecne arec jahec â moc ekac?”
29Iŋuc mume Bileamzi doŋgi ʒiŋuc âzâcnewec: “Go âke sisic boc enarehuc jukomec. Manakic, no sâqe bajurâ muzac ʒine hâcne âke‐hâmocguzapo.”
30Eme doŋgizi Bileam ʒiŋuc âzâcnewec: “No gore doŋgi mocwâc mi ekopac, â nore faio rac warec ehuc jumeŋzi miŋecgac wâc mi jukomec me? No gore mic reŋkehuc wamane moc mi jupo me?” Iŋuc mume Bileamzi muwec: “Misac!”
31Iŋuc muhame Wofuŋzi Bileam ʒâŋe‐ticne bâtâcneme Wofuŋte aŋelozi ʒika barâ hatao domaha honehuc fodapecnerâ mâreŋko hetutuckewec.
32Iŋuc eme Wofuŋte aŋelozi kecʒiŋuc âzâcnewec: “Go wemocte doŋgige qatec arec jahec â moc ejec? Manakic, go hata hehesicne rakomecte no aka hegarezore fua‐garepac.
33Eme doŋgizi honecnurâ hata kizuhuc rame arec jahec â moc ejec. E hata mi kizume muzac no ʒi e akickehuc go qâhâmocguzapo.”
34Iŋuc mume Bileamzi Wofuŋte aŋelo ʒiŋuc âzâcnewec: “Go râsi enarehuc hatao domamec i mi hone tarahuc wiac epe sâqorejec. Irec wiac epac i manatec sâqorekacko risiezepac.”
35Eme Wofuŋte aŋelozi Bileam dâŋ ʒiŋuc bâtikiecnewec: “Go ŋic jaŋehec rac, mâc noni dâŋ gaza mutâc epemu i sawa muzemec.” Iŋuc âzâcneme Bileam e Balakere ŋic fekicne jaŋehec rawec.
36Eme Balake e Bileamzi warehuc jukac, biŋe iŋuc manarâ Ari‐Moabi haeo bâfuaocte rawec. Hae izi ine mâreŋ qaŋeŋnao jâmbâŋ Aronoŋ opâzi mâreŋ ma ekac ira ŋewec.
37Eme Balakezi Bileam bâfuarâ kecʒiŋuc âzâcnewec: “No hefârecguhuc ŋic sorec‐jopape fâpie wemocte mi waremeŋ? Me manatec sâsecguhuc furine sâcne mi garepemu me?”
38Iŋuc mume Bileamzi dâŋ ʒiŋuc bâtikiecnewec: “No gorao warepac i mi honekic me? Erâ ʒi no nahacne maŋte wiac irec me irec dâŋ moc mupemurâ tâpiri fonarekac me? Aricne, Wofuŋzi mutâcne‐nareme sâc sawa mupemu.”
39Iŋuc murâ Balakehec raku Kiriati‐Huzo haeo fisipic.
40Eme Balake e ira bâzire biŋe lama bulimakao qa hezuc ejarehuc Bileam â ŋic fekicne ehec jumbiŋ jaŋere wâc râeme rawec.
41Eme hae fureme Balakezi Bileam jowame Bamoti‐Baali mâreŋ toŋnao fepic. Ferâ ira domahuc Bileamzi Israe ŋic teuŋ âterâ fombiŋ jaŋe honec‐jopa‐fârewec.
