Text copied!
CopyCompare
BUKU BAEPOLE - Nambase

Nambase 23

Help us?
Click on verse(s) to share them!
1Kandapala Belameme Beleke lamaiyuo, Nenge kiso maingi kana pyare yanda ipingi nyepo dakena pyakape. Pyakapala mena bulamakao kali yanda ipingi nyepo dusipape dee mena sipisipi kali yanda ipingi nyepo dusipape nyepala minyakao ipupi, leya.
2Baame lamaiyamuli pyuo Belekeme piya. Piyamo dokopa baapa Belamepa mena bulamakao kalipi mena sipisipi kalipi larapu nenge kiso maingi kana pyare dusipana mendaki mendaki lao kiso maiyambi.
3Dokopa Belameme Beleke lamaiyuo, Kamongome namba mende langilyape mee lao kandala paroleŋe embena mena kiso maipinyi mare dakena karape. Baame namba pano langiramuli pyuo emba langiru, leya. Dopa lapala baa iki yuu kyau dokona ketae pulyuo peya.
4Peyamo dokopa Anatumi baa kando nyiya. Nyiyamopa Belameme baa kando lao, Nambame nenge kiso maingi kana pyare yanda ipingi nyepo lapala dokona mendaki mendaki lao mena bulamakao kalipi mena sipisipi kalipi kisapu, leya.
5Kamongome Belame aki pii laramo dupwa lamaipala pii dupwa Beleke lamaila kapu kyuo pena leya.
6Baa kapu kyuo papala Beleke nenge kiso maiyamo dokonako Moape range akali mupwa dupwa pipya kareyamopa kando nyiya.
7Belameme poropeta pii pyongo pyao lao lao, Yuu Moape range kiŋi Beleke dokome namba kyakale lao ipu, leya. Neta pyakaenge yuu kyau dorena karapunupa baame namba pii lakala ipu, leya. Isaraele wambu dupwa keta randa maiyakape, leya.
8Kamongome wambu dupwa keta randa epena lao laa nalyamo dokona nambame apa pyuo wambu dupwa keta randa epena larose? Kamongome wambu dupwa koo keta pena laa nalyamo dokona nambame apa pyuo dopa pyuo larose?
9Yuu kyau dupwana karo dokopa nambame wambu dupwa kandenge. Nakama wambu rara wakale ingyuo palyuo kamame wakasa ingyuo Kamongome wambu lapo dupwa kaepala nakama elyape keta pisingi lao silyaminyi.
10Sinjimu dupwa kapa yaka laa nange doko suu pyao Isaraele para pyasi dupwa sinjimu ingyapyasa kapa yaka laa nalyaminyi. Anatunya wambu mende yuu gii otapyamo kumulyaminyi dopale ingyuo namba kumapuli. Anatunya yulu rolae pingi wambu dupwa mona kyuu lao sipyamo kumulyaminyi dopale ingyuo namba mona kyuu lao seramo kumapuli, leya.
11Dokopa Belekeme Belame lamaiyuo, Aki yulunde namba keta pilisi? Nambame emba dae lanyuo epeyono doko nambana nyisu petenge dupwa randa maiyakalase lao piyu. Dopa piyunupape embame pipinyi doko wambu dapwa peparae elyape keta pisinyi pyambulini doko iki, leya.
12Baame isingi lao, Kamongome laa lao namba langilyamo dusipa iki nambame kapa laro, leya.
13Dokopa Belekeme Belame kando lao, Namba role pyao yuu mendasa bona ipu. Yuu dokona karo dokopa Isaraele wambu dupwana lapo iki kandare. Yuu dokona pao karapala dokopa wambu dupwa keta randa maiyakare, leya.
14Belekeme Belame Sopiminya yuu dokona Pisika kyau dokona ketae singi dokona nyuo lanyuo peya. Peyamo dokopa Belameme yuu dokona opetae nenge kiso maingi kana pyare yanda ipingi nyepo lapala mena bulamakao kalipi mena sipisipi kalipi mendaki mendaki lao larapu kiso maiyambi.
15Belameme Beleke kando lao, Embena kiso maipinyi mare dakena karape. Namba dumunya Anatu kando nyela paro, leya.
16Lapala peyamo dokopa Kamongome Belame kando nyepala aki pii laramo dupwa lamaipala pii dupwa Beleke lamaiyakala pena leya.
17Baa kapu kyuo papala Beleke nenge kiso maiyamo dokonako Moape range akali mupwa dupwa pipya kareyamopa kando nyiya. Kamongome apa lalamo lao Belekeme piso siya.
18Dokopa Belameme poropeta pii pyongo pyao lao dake leya. Sipona ikinyingi Beleke, epapu namba aki pii letene lao sela ipu.

19Anatu doko baa akali kyambo lenge dopakale daa. Isa akalinya suu pingi alowa pyuo lenge. Anatu baa dopakale daa. Aki yulu mende baame piru lao lalu lao lenge doko baa angi pingi. Baame piru lapala dokopa angi pingi.
20Namba elyape keta pisa lao langilyamuli pyuo wambu dupwa elyape keta pisaro. Anatumi elyape keta pisaramo nambame nyuo alowa pii naro ingilyamo.
21Rengya Isaraele keta randa mende epa nao embone pisira lao dakepa soo gisilyu. Kamongo nakamana Anatu doko nakama keta role karamo. Wambu dupwame pii poraiyuo lao, Kamongo namwana kiŋi lao karaminyi.
22Anatumi wambu dupwa yuu Isipi karo nyuo lanyuo epeya. Mena bulamakao kali rae lenge dopakale ingyuo baame yanda pimwai dupwa pyao nembakamingi.
23Wambu mendeme Isaraele wambu dupwa keta pyamwali lao nemongape pipupi kapa laa nara ingilyamo. Epapu wambu dupwame Isaraele dupwa kando lao, Anatumi aki yulu mende pipyamo doko kandalapape, larami.
24Mena laene porai dokome mena yango dupwa pyapala ranjamape minjupi dupwa nao otenge. Doko suu pyao Isaraele rara dupwa porai dopakale, leya.
25Leyamo dokopa Belekeme Belame kando lao, Embame Isaraele wambu dupwa keta nambame randa mai naro lapinyipape wambu dupwa elyape keta pisa nareko, leya.
26Belameme isingi lao, Kamongome namba langilyamuli pyuo yulu peparae piruŋu lao nambame emba pii doko langya napusi? leya.
27Belekeme Belame lamaiyuo, Namba role pyao ipu. Eparene dokopa nambame emba nyuo lanyuo yuu mendasako paro. Embame yuu dumunya karo Isaraele wambu dupwa keta randa maiyakalase lao Anatumi emba kapa langira rapisi, leya.
28Lapala baame Belame nyuo lanyuo yuu Piyo kyau dokona peya. Yuu Piyo kyau dokona karo isa yuu muiyane lama lama doko kapa kandenge.
29Belameme baa kando lao, Nenge kiso maingi kana pyare yanda ipingi neypo dakena pyakape. Pipala mena bulamakao kali yanda ipingi nyepo dee mena sipisipi kali yanda ipingi nyepo dusipa nyepala minyakao ipu.
30Leyamuli pyuo Belekeme piya. Dee mena bulamakao kalipi mena sipisipi kalipi mendaki mendaki larapu kana pyare dupwana reto kiso maiya.