1Wofuŋzi Mose dâŋ kecʒiŋuc âzâcnewec:
2“Go Israe ŋic ŋokac ʒiŋuc muhuc jaza mutâc ezemec: Ŋoŋe dameŋ mi ʒoraha Kanaaŋ mâreŋko raʒiniŋmu. Mâreŋ izi hâcne merâfâc mâreŋ‐ŋeŋic erâ fosanaŋkeocte mukicne. Mâreŋte ma ine kecʒiŋuc forazejec:
3Mâreŋ dâkâne juwicpec irec ma i Ziŋ mâreŋ burocnao ira fuŋkerâ Edom mâreŋ qacnerâ razejec, â juwicpec ma izi ine Hâwec Hâmocnere ʒoaŋ wewefunaopec fuŋkerâ hurazejec.
4Huraku Akerabim heâŋ juwicpec ira ŋehasickerâ Ziŋ mâreŋ fotâcnerâ raku Kadesi‐Baranea hae juwicnao fisizejec.
5Irecnec ine ŋehasickerâ Aigita opâopec raku hâwecko tarazejec.
6“Ʒoaŋ huhunaopec ine Mâreŋ Ŋoŋondeŋ Hâwec izi mâreŋ‐ŋeŋicte ma ezejec.
7“Faic mâreŋkopec mâreŋ‐ŋeŋicte ma ine kecʒiŋuc fuarâ fozejec: Mâreŋ Ŋoŋondeŋ Hâwec irecnec fuŋkerâ ma qahapie raku Hora tikio fisizejec.
8Hora tikionec ine ʒuhuckerâ qarapie Hamati hae upe rozejec.
9Ma tofane ine irecnec fuŋkerâ qapie Ʒiforoŋ haeo fisirâ raku Haza‐Enaŋ hae ira tarazejec. Faic mâreŋkopec mâreŋ‐ŋeŋicte ma iŋuc hâcne fuazejec.
10“Ʒoaŋ wewefunaopec mâreŋ‐ŋeŋicte ma ine Haza‐Enaŋ haeonec fuŋkerâ qapie raku Sefam haeo fisizejec.
11Erâ Sefamkonec huraku Aiŋ opâ ʒâŋere ʒoaŋ wewefunao Ribela hae ŋekac ira fisizejec. Erâ irecnec hurâ raku Kinerete riqicte ʒoaŋ wewefunao tiki ŋerakac ira fisizejec.
12Irecnec ine Jordaŋ opâ qacnerâ rahuku Hâwec Hâmocnao tarazejec. Mâreŋ‐ŋeŋicte ma iŋuc hâcne forazejec.”
13Eme Mosezi Israe ŋic ŋokac ʒiŋuc muhuc jaza mutâc ewec: “Mâreŋ ʒi hâcne Wofuŋzi ŋic guru 9 erâ dâkâne moc jaŋe jare tahac eocte mupaŋke‐jarewec. Irec ŋoŋe ɋâsâi qapie merâfâc mâreŋ‐ŋeŋic âke fuaocmu sâc ro rauc enʒepieŋ.
14Rubeŋ â Gade guru garikiŋ‐jeŋic sâc erâ wâc mamacfâc‐jeŋic jaŋere ʒâŋe biri forakac irec sâc merâfâc mâreŋ‐jeŋic ro rauc efârembiŋ. Erâ Manase guru dâkâne jaŋe wâc mâmâc.
15Ŋic guru jajahec erâ wâc guru dâkâne moc keci jaŋe hâcne Jordaŋ ʒiŋucnao Jeriko hae ŋekac irec ʒoaŋ wewefunao ira hâcne merâfâc mâreŋ‐jeŋic ro rauc efârembiŋ.”
16Eme Wofuŋzi Mose kecʒiŋuc âzâcnewec:
17“Mâreŋ bâtâc baŋarepie ro rauc eniŋmu ŋic i jaŋere ʒâŋe ʒiŋuc hâcne: Taha bapa Eleaʒa â Nuŋte ŋokâ Josua.
18Erâ mâreŋ bâtâc bapie ro rauc eniŋte gurune gurune jaŋeraonec micne moc moc bâwosâec‐jopanʒepieŋ.
19Ʒâŋe‐jeŋic ine kecʒiŋuc: Judare guruonec Jefunere ŋokâ Kalebe.
20Simeoŋte guruonec Amihudure ŋokâ Semue.
21Benjamiŋte guruonec Kisoloŋte ŋokâ Elidada.
22Daŋte guruonec Jogilire ŋokâ Buki.
23Josefere ɋâricfâc Manase guruonec Efodire ŋokâ Haniele.
24Eferaimte guruonec Sifetaŋte ŋokâ Kemuele.
25Sebuloŋte guruonec Paranakare ŋokâ Elisafaŋ.
26Isasare guruonec Azaŋte ŋokâ Palatie.
27Asere guruonec Selomire ŋokâ Ahihudu.
28Naftali guruonec Amihudure ŋokâ Pedahele.
29Ŋic i jaŋe hâcne Kanaaŋ mâreŋko Israe ŋic merâfâc mâreŋ‐jeŋic bâtâc bajareniŋte Wofuŋzi mutâcne‐jarewec.”
