1Eme Israe kikefuŋ sasawa jaŋe kio owa sâko ehuc juhapie hae furewec.
2Iŋuc ehuc Mose â Aroŋ mu kâroŋ ejactehuc ʒiŋuc jasambiŋ: “Nâŋe Aigita mâreŋko juhuc hâmonʒapeŋ me! Me mâreŋ burocnao ʒira moc hâmonʒapeŋ me!
3Wofuŋ e wemocte ʒikare nânâ enaŋte mâreŋ ʒira jowac‐nâpome wareŋgopeneŋ? Â ŋokac naru motecfâc‐nâŋec jaŋe wâc râsifâc‐nâŋec jaŋere meo feniŋmu, irec Aigita mâreŋko risiepene muzac sâckezac.”
4Iŋuc murâ jaŋaczia ʒiŋuc muhuc nazaŋ gazaŋ embiŋ: “Nâŋâc micne moc âkendâŋnepene eki jowac‐nâpome Aigita mâreŋko risienʒepeneŋ.”
5Iŋuc mupie Mose â Aroŋ jahe Israe kikefuŋ sasawa jaŋere maio mâreŋko hetutuckerâ fopic.
6Ehame Nuŋte ŋokâ Josua â Jefunere ŋokâ Kalebe, mâreŋ hone tâcneniŋte mâmâc rapic jahe ŋaqi‐jekic bâsuckepic.
7Ehuc Israe kikefuŋ mâmâc sâko ʒiŋuc jazapic: “Mâreŋ hone tâcnezo rambeŋ i mâreŋ biaŋne jâmbâŋ.
8Eme Wofuŋ e nâŋâcne maname sâckeme mâreŋ ira jowac‐nâpo rarâ nâre tahac eocmu; mâreŋ i susu â baŋac fusucmarâ qâmbâriŋkehuc foekac.
9Mocjaha, ŋoŋe Wofuŋ mu kâroŋ mi ecnenʒepieŋ, ehuc mâreŋ rune jaŋere wâc mi hâwic‐ŋopazejec, nâŋâc jopa jâpec sâcne ejarenaŋmu. Ŋeŋezic‐jeŋic rârieha Wofuŋzi nâŋâc bafic‐nâpoocmu, irec jaŋere mi hâwic‐ŋopazejec.”
10Iŋuc jazapire kikefuŋ ʒeŋgoma jaŋe qânâzi hehâmoc‐jofazo mumbiŋ. Iŋuc muhapie Wofuŋte tatamaczi tutumaŋ qoruc bozeo ira fuarâ Israe kikefuŋ batamaec‐jopawec.
11Ehame Wofuŋzi Mose ʒiŋuc âzâcnewec: “Ŋic ʒi jaŋe qaisocnuhuc jueŋgopieŋ i mo dameŋko beheniŋmu? Me ŋondeŋ‐jeŋicko mâsi wiac fuŋne fuŋne baekopac i honehuc mo dameŋko moc manasiŋnuniŋmu?
12No mupe huc hâmoczi rocjopame omaenʒepieŋ, ehame go basawecgupe ɋaricfâcge jaŋe ŋic ʒi jaŋere sâc sirickehuc guru sâko erâ junʒepieŋ.”
13Mosezi ine Wofuŋ ʒiŋuc âzâcnewec: “Go ŋicguru ʒi Aigita mâreŋkonec jowac‐jopa waremeŋ i Aigita ŋic jaŋe mana‐fârembiŋ.
14Erâ mâreŋ ʒirec rune jaŋe wâc ʒiŋuc manambiŋ: Wofuŋ, go ŋicguru ʒi jaŋere ŋondeŋko jutec ʒâŋe fâri‐jeŋiczi honecgueŋgopieŋ, ehame ʒoaŋko karorac maŋko domahuc bânie‐jareekic â ŋafeo ine ʒocbâruŋ maŋko juhuc jowac‐jopaekic.
15Eme ʒi ŋicguru keci bâsirowec‐jopacmuo ine ŋic gurune gurune gore biŋe manambiŋ jaŋe ʒiŋuc muniŋmu:
16‘Wofuŋ e ŋicguru keci jaŋe mâreŋ jareocte mupaŋkewec ira bacjopa raocte eipierâ mâreŋ burocnao qâhâmoc‐jopawec.’
17Iŋuc fuazacte ʒiŋuc numu‐garekopac: Go ʒiŋuc hâcne mupaŋkemeŋ irec sâcko Wofuŋ tâpirige bataniŋkezemec:
18‘No kimbeŋ‐nane uneŋne â buuruc‐nane ɋârâŋne, no hehesic â qaqatara‐jeŋic behekopac, kiŋ hureeŋgopieŋ jaŋe ine okacne bazu‐jare rahuc juhape naru motec ŋosafâc‐jeŋic jaŋerao tarazokac.’
19Irec buurucge ɋârâŋne fokac â Aigita mâreŋkonec fuŋkerâ kiŋjeŋic behe waremeŋ irec sâcko kiŋjeŋic mocwâc behecmurâ numu‐garekopac.”
20Eme Wofuŋzi muwec: “No nunumuge manarâ kiŋjeŋic behekopac.
21Erâ no jujâmbâŋkekopac, â Wofuŋ nore huriri qâreŋzi mâreŋ sâko mâreŋ sâcke‐fârerâ foocmu irec ʒiŋuc mupaŋkekopac:
22Huriri qâreŋ‐nane hone‐bipiembiŋ â Aigita mâreŋko me mâreŋ burocnao mâsi fuŋne fuŋne bapo i hone‐bipiehuc jumbiŋ jaŋe mamacfâc‐jeŋic mâreŋ jarepemurâ mupaŋkepo i moc mi honenʒepieŋ. Jaŋe esâicnupie arec 10 ewec, ehuc dâŋnanere hazec wâc mi râembiŋ. Erâ qaisocnuhuc jumbiŋ jaŋe wâc mi honenʒepieŋ.
24Kiŋaŋŋic‐nane Kalebe e ine maŋticne norao râehuc dâŋnane reŋkewecte mâreŋ hone tâcnewec ira manacnepe ra fisime ɋâricfâc‐ticne jaŋe mâreŋ i ro rauc enʒepieŋ.
25Ʒi ine Amaleke ŋic â Kanaaŋ ŋic jaŋe wâneŋko juŋgopieŋte ŋoŋe tomâcko risierâ mâreŋ burocne Hâwec Bâbâroŋkopec fokac irapec ranʒepieŋ.”
26Eme Wofuŋ e Mose â Aroŋ dâŋ kecʒiŋuc jasawec:
27“Kikefuŋ râŋgeŋ qaŋqaŋne ʒi jaŋe mu kâroŋ enareeŋgopieŋ i mo dameŋko moc beheniŋmu? Israe ŋic jaŋe mu kâroŋ enarepie boc manaekopac.
28Irec ʒiŋuc jazanic: Wofuŋ e kecʒiŋuc mukac: ‘No jujâmbâŋkekopac, irec ŋoŋe dâŋ muwarepie manaekopac irec sâcko wiac eŋarepemu.
29Irec qâŋɋâŋfâc‐ŋeŋic jaŋe mâreŋ burocnao ʒira hâcne foraniŋmu. Wose qâreŋ ejarekicne â jara‐jeŋic 20‐o domarâ fekac erâ mu kâroŋ enarembiŋ ŋoŋe hâcne
30mâreŋ juniŋte biŋe qaŋarepo ira moc mi raʒi‐jâmbâŋkeniŋmu. Mocjaha, Jefunere ŋokâ Kalebe â Nuŋte ŋokâ Josua jahe sawa raʒinicmu.
31Erâ naru motecfâc‐ŋeŋic jaŋere manabâc ehuc râsi jaŋere meo feniŋmu mumbiŋ jaŋe wâc raʒiniŋmu. Ehuc ŋoŋe mâreŋ surembiŋ i hâcne ro rauc ehuc juhâc qâhâmonʒepieŋ.
32Ŋoŋe ine mâreŋ burocnao hâmo‐fârenʒepieŋ:
33Ehame naru motecfâc‐ŋeŋic jaŋe mâreŋ burocnao lama bulimakao soŋaŋ juhuc qaqatara‐ŋeŋicte okacne âsickehuc juhapie kâcɋene ŋoŋe ira hâmo‐fârenʒepieŋ.
34Ŋoŋe ŋafe ʒoaŋ 40 mâreŋ hone tâcnehuc jumbiŋ iŋuc jaha jara 40 kiŋŋeŋic âsickehuc ʒiŋuc mana taranʒepieŋ: Wofuŋzi behec‐nâpokac.’
35Wofuŋ no, kikefuŋ râŋgeŋ qaŋqaŋne ʒi râsi enarehuc juŋgopieŋ jaŋe wiac iŋuc hâcne ejarepemurâ mupaŋkekopac; jaŋe mâreŋ burocnao hâmo miziec efârenʒepieŋ.”
36Eme Mosezi ŋic mâreŋ hone tâcneniŋte sorec‐jopame rambiŋ jaŋe risierâ kikefuŋ sasawa mâreŋ irec binaŋ bipic tataranehec bajarepie jaŋe manarâ Mose mu kâroŋ ecnembiŋ.
37Iŋuc epie binaŋ bipic tataranehec bambiŋ jaŋe Wofuŋte maio ututuŋ hâmo‐fârembiŋ.
38Ehame mâreŋ hone tâcneniŋte rambiŋ jaŋeraonec Nuŋte ŋokâ Josua â Jefunere ŋokâ Kalebe jahe sawa jupic.
39Eme Mose e Wofuŋte uŋdâŋ i Israe kikefuŋ sasawa jaza‐fâreme jaŋe manarâ ki busâqoc kâcɋene embiŋ.
40Erâ jaŋe furic uupicte faharerâ kecʒiŋuc muhuc tiki mâreŋko fembiŋ: “Manakic, nâŋe kiŋ i jâmbomac bâfuambeŋ, erâ ʒi sifu Wofuŋzi mâreŋ biŋe qanârewec ira razo eŋgopeŋeŋ.”
41Mosezi ine dâŋ kecʒiŋuc bâtikie‐jarewec: “Ŋoŋe wemocte Wofuŋte dâŋ ʒuhuckerâ qatarazo eŋgopieŋ? Ŋoŋe iŋuc epie mi sâckeocmu.
42Wofuŋzi ŋoŋehec mi jukacte râsifâc‐ŋeŋic jaŋe ŋopanʒipiŋte mi fenʒepieŋ.
43Amaleke ŋic â Kanaaŋ ŋic jaŋe ira juŋgopieŋte ŋoŋe ʒikare biŋe eniŋmu. Ŋoŋe Wofuŋ bâjâpezore takic‐ŋopawecte Wofuŋzi ŋoŋehec mi juocmu.”
44Jaŋe ine Wofuŋte ʒâʒâfic katapa mi rawec â Mosezi wâc teuŋ beherâ mi raha sifu maŋsanaŋ erâ tiki mâreŋko feniŋte mumbiŋ.
45Erâ fehapie Amaleke ŋic â Kanaaŋ ŋic tiki mâreŋ ira jumbiŋ jaŋe waharâ jopa bâtâtiec ejarepie raku Horima haeo fisimbiŋ.
