Text copied!
CopyCompare
Kâte Bible - Ʒare Biri

Ʒare Biri 30

Help us?
Click on verse(s) to share them!
1Mose e Israe ŋic gurune gurune jaŋere micnefâc ʒiŋuc jazawec: “Wofuŋzi dâŋ kecʒiŋuc mutâcnewec:
2Ŋic moczi Wofuŋte maio dâŋ moc mupaŋkeocmu me wiac irec me irec sowa juocte Wofuŋte ʒâŋeo iticnehuc dâŋ mupaŋkeocmu e mumupaŋ dâŋticne moc mi huckehuc micticnaonec dâŋ wahawec irec sâc fârine bâfua‐fârezejec.
3Me naru ŋokac socɋâri moczi mamac‐ticnere ficko juhuc Wofuŋte maio dâŋ moc mupaŋkeocmu, me wiac irec me irec sowa juocte mumupaŋ dâŋ moc muocmu mecne.
4Ehame mamac‐ticnezi mumupaŋ dâŋ i manarâ moc mi qataracneocmuo ine naru mumupaŋ dâŋticne i sanaŋkezejec, â sowa jujure dâŋ mufârewec i wâc deŋkezejec.
5Me mamac‐ticnezi mumupaŋ dâŋticne manarâ ʒoaŋ ijaha qataracneocmuo ine mumupaŋ dâŋticne mecne â sowa jujure dâŋ muwec i mâmâc fâri tâmiric ezejec. Ehame mamac‐ticnezi qataracnewecte Wofuŋzi wâc kiŋticne beheocmu.
6Me mumupaŋ dâŋticne â wiac irec me irec sowa juocte mi mana tarahuc mumupaŋ dâŋ muwec i foha ŋic baocmu mecne.
7Eme ŋowe‐ticnezi mumupaŋ dâŋ i manarâ ʒoaŋ ijaha mi qataracneocmuo ine ŋokacte mumupaŋ dâŋ â sowa jujure dâŋ mupaŋkewec i sanaŋkezejec.
8Me ŋowe‐ticne e mumupaŋ dâŋ i manarâ ʒoaŋ ijaha qataracneocmuo ine mumupaŋ dâŋticne mecne â sowa jujure dâŋ mi mana tarahuc muwec i mâmâc fâri tâmiric ezejec. Ehame Wofuŋzi wâc kiŋticne beheocmu.
9Me ŋokac hozecte me ŋokac ʒuhuc bâtâc ekicne i jahere mumupaŋ dâŋ moc me moc izi ine sanaŋkezejec.
10Me ŋokac neŋgocne moczi ŋowe‐ticnere ficko juhuc mumupaŋ dâŋ moc muocmu me wiac irec me irec sowa jujure dâŋ muha
11ŋowe‐ticnezi manarâ dâŋ moc mi mucnehuc qataracneocmuo ine mumupaŋ dâŋticne mecne â sowa jujure dâŋ mupaŋkewec i sanaŋke‐fârezejec.
12Me ŋowe‐ticne e manarâ ʒoaŋ ijaha mumupaŋ dâŋ i fârimâc ekac muocmuo ine mumupaŋ dâŋ i mecne â sowa jujure dâŋ mupaŋkewec izi mâmâc fâri tâmiric ezejec. Ŋowe‐ticnezi mana suawecte Wofuŋzi wâc kiŋticne beheocmu.
13Ŋic moc e ŋonâŋ‐ticnere mumupaŋ dâŋ me sowa jujure dâŋ basanaŋkezo murâ basanaŋkezejec â qâsuazo murâ qâsuazejec.
14Me ŋic e ʒoaŋne ʒoaŋne irec dâŋ moc mi muhuc ŋonâŋ‐ticnere mumupaŋ dâŋ â sowa jujure dâŋ sasawa mupaŋkewec i basanaŋkeocmu. E mumupaŋ dâŋ i manarâ ʒoaŋ ijaha dâŋ moc mi muwecte basanaŋkekac hâcne.
15Mâc mumupaŋ dâŋ manarâ irec faicnao qâsuaocmuo ine ŋonâŋ‐ticnere kiŋ i e jahac âsickeocmu.”
16Wofuŋ e ŋowe ŋonâŋ erâ mamac â naru‐ticne socɋâri ehec juekac jaŋere dâŋsanaŋ iŋuc hâcne Mose mutâcnecnewec.