Yontu Tɑɑ Yontu 6:1-12

¹Alɑɑ tɑɑ ɑcɛpɑ nyɑ́, leɣe nyɑ́ kʋsɔɔlʋ polɑɑ? Nkuɣu ɩ tǝŋɑɑ? Tɑ nɑ-ŋ tǝ pɛɛkɩ-ɩ.

²Mɑ kʋsɔɔlʋ n polɑ nyɑ́ tɑɑlɛ nte tǝ tɑɑ tulɑɑlʋ sɔɔsʋŋ nyɑlɑɑ tɔɣɔ sɩ n cɑɑkɩ yɑɑyenɑɑ nɑ ń tiiki nyɑ́ kɑlǝkʋ.

³Mɑ́ tǝnnɑ mɑ kʋsɔɔlʋ nyɑ́ nɑ nyɑ́ tǝnnɑ mɑ́ tɔtɔ. Yɑɑyenɑɑ tɑɑ kɛ́ n tiikiɣi nyɑ́ kɑlǝkʋ.

⁴Mɑ kʋsɔɔlɑɣɑ nyɑ́, n tewɑɣɑ ɩsɩɩ Tiisɑ ɩcɑtɛ. N wɛ leleŋ ɩsɩɩ Yosɑlɛm tɑɑ cɑɣɑlɛ. Amɑ n wɛ sɔɣɔntʋ ɩsɩɩ yoolɑɑ nɑ pɑ tuutɑnɑɑ.

⁵Kɛɛsɩ nyɑ́ ɩsɛ ɑnɩ ɑ cɔɔsǝɣɩ-m kɛ́. Nyɑ́ nyɔɔsɩ hǝntɑ ɩsɩɩ pǝ́ŋ kɑlǝkʋ tiiki Kɑlɑɑtɩ pʋɣʋ.

⁶Nyɑ́ kelɑ hʋlʋmɑɑ kɛ́ ɩsɩɩ heeŋ kʋhʋlʋmǝŋ kɑlǝkʋ, ŋku kʋ lɩɩnɑ lʋm tǝnyɔɔlɛ, nɑ pɑɑ heu wei nɑ ɩ tompiyɑ tɔ. Nɔɣɔlʋ tɑ hɛlǝmɩ.

⁷Nyɑ́ lukpuɣutu nɑɑkɩ nyɑ́ tɛkɛntɛ tɛɛ kɛ́ ɩsɩɩ pɑ fɑɣɑ tʋɣʋ nɑkʋlɩ kʋ pile.

⁸Wulɑʋ pǝsǝɣɩ nɑ ɩ́ wɛɛnɑ tɑɣɑ ɑlɑɑ kɛ nɩɩtoso. Nɑ ɑsɑɑlɑɑ kɛ nɩɩnɑɑsɑ, nɑ sɑɑlɑɑ nɑ́ɑ́ fɛɩ kɑlʋɣʋ.

⁹Amɑ nyɑ́ tike kɛ nyɑ́ too lʋlɑ ɑlʋpǝyɑɣɑ nɑ ɩ kǝlɑ-ŋ sɔɔlʋɣʋ. Nyɑɣɑlɛ mɑ kʋpɑŋkɑ, n wɛ-m teu kɛ́ ɩsɩɩ ɑlukuku. Pɛɛlɑɑ nɑɑkɩ-ŋ nɑ pɑ́ yɑɑkɩ-ŋ lɑŋhʋlʋmlɛ tʋ. Nɑ tɑɣɑ ɑlɑɑ nɑ ɑsɑɑlɑɑ tɔtɔ nɑ́ sɑŋɩ-ŋ.

¹⁰Alʋ wei ɩ lɩɩkǝnɑ mpʋ nɑ ɩ́ teeki kɔkɔ ɩsɩɩ ilim, nɑ ɩ́ tewɑ ɩsɩɩ ɩsɔtʋ? Nɑ ɩ́ wɛ sɔɣɔntʋ ɩsɩɩ yoolɑɑ nɑ pɑ tuutɑnɑɑ?

¹¹Mɑ tiiwɑ tɩɩŋ pee tɑɑlɛ tɑɑ sɩ mɑ nɑɑkɩ tɛtɛkǝlɛ tɑɑ mǝhoo kʋfɑnɑ. Nɑ mɑ́ nɑ́ sɩ tɩɩŋ wei pɑ yɑɑ sɩ lɛsɛŋ tɔ ɩ hɛlǝɣɩ, nɑ tɩɩŋ lɛlǝŋ tʋɣɩ hɛtʋ nɑ.

¹²Mɑ tɑ cɛkǝnɑ, ɑmɑ mɑ kʋnyɩɩlʋɣʋ pǝsɑ-m kɛ́ ɩsɩɩ mɑ yǝlɑɑ kɑsɑɣɑmpiyɑ yoou kɛɛkɛnɑɑ.