Salomore Gae 6:1-12

¹O ŋokac hawari biaŋ mocjaha, joroc biaŋge e wena rawec? Joroc biaŋge e hata wenimoira rawec i nâzâtec baficguhuc basanʒepeneŋ.

²Joroc biaŋ‐nane e ʒariŋ gie‐ticnao ʒineŋjâc domakacko ira hurâ rawec, e ira rac warec ehuc aŋac manaocte â ʒariŋ âsu biaŋ ro qâzuc eocte iŋuc ewec.

³No joroc biaŋ‐nanere biŋe, â joroc biaŋ‐nane e nore biŋe, e lamafâc‐ticne ʒariŋ ŋondeŋko soŋaŋ‐jopaekac hâcne.

⁴O joroc biaŋ‐nane, go Tiriza hae biaŋne irec sâc jaha, â Jerusalem hae aŋac baŋacne iŋucne, ehuc ŋifec ine momori ŋic jaŋere manapene hâhâwicne eekac irec sâc wâc ekomec.

⁵Ʒâŋe jahecgezi maŋ bâsifuc enarekopirecte boc mi honecnuzemec. Qizec susucge ʒoricne i noniŋ jaŋe Gileade heâŋkonec kiwae raʒic wefuc ehuc wahaeŋgopieŋ irec sâc ekac.

⁶Micsiecge i lama neŋgocne jaŋe opâ ruarâ wefueŋgopieŋ irec sâc qaŋqaŋ jâmbâŋ ekac. Jaŋe motecfâc‐jeŋic funʒuŋ fâri sasawa, motec tâmiric moc mi jueŋgopieŋ.

⁷Mauc jahecge ŋifec â ŋifec i rurufa maŋnao bojazaŋ iŋucne bâruŋkerâ fokac.

⁸Ŋokac fekicne 60 â ŋokac mamare 80 erâ naru ŋokac wowosec‐jopane tâmiric iŋuc juŋgopieŋ.

⁹Ehame ine joroc biaŋ‐nane mocjahazi sawa âgo biaŋ‐nane jukac, e neŋgoc‐ticnere otâ mocsâkoazi neŋgoc roro‐ticne araŋ bacnehuc juekac. Naru ŋokac gâcne jaŋe e honerâ mu ʒeri ecneeŋgopieŋ, erâ ŋokac fekicne â ŋokac mamare jaŋe iŋuc jaha ehuc mumbiaŋkeeŋgopieŋ.

¹⁰“Furic tatamac â mosa ʒoaŋ erâ bâpiŋ jaŋere tatamacte sâc jaha tamaekac e mo?”

¹¹No wâneŋko wiac ârinehec fuaekac i hone aŋac epemurâ kaŋa gieo hupac. Erâ wâc waiŋzi biac fiekac â bojazaŋzi âri qakac me mâcne i mâmâc honepemurâ ira hupac hâcne.

¹²Eme mamanasu‐nanezi ututuŋ jaha jowacnu rarâ joroc biaŋ‐nanezi keretacko ŋewec ira râecnuwec.