Yontu 139:1-19

¹Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. Tɑcɑɑ, n nyənəɣɩ too mɑ tɑɑ kɛ́ nɑ ń nyəmɑ-m.

²Ye mɑ cɑɣɑɑ, n nyəmɑ́, yɑɑ mɑ kʋlɑɑ, n nyəmɑ́. N nɑɑkɩ too pooluŋ kɛ mɑ hʋwɛɛ kɛ́ nɑ ń nyəmɑ-yɛ.

³N nyəmɑ́ wɑɑtʋ wei mɑ tɔŋ yɑɑ mɑ həntɑɑ tɔ, n nyəmɑ́ mɑ mpɑɑŋ tənɑ tətetete.

⁴Pɑɑ mɑ tɑ kulitɑ nɔɣɔ n tɛmɑ nti mɑ cɑɑ yɔɣɔtʋɣʋ tɔɣɔ nyəm təcɛɩcɛɩ.

⁵N wɛ mɑ wɑɑlɩ nɑ mɑ lɔlɔ kɛ́, nɑ ń tənəɣɩ nyɑ́ niŋ kɛ mɑ tɔɔ.

⁶N nyəmɑ-m nɑ pə tɛɛ cɑɑsɑ. Mɑ lɑŋlɛ hʋlʋmɑ kɑtɑtəlɑɣɑ. Mɑɑ cɛkəɣənɑ pə tənɑɣɑ.

⁷Leɣe mɑɑ polo nɑ mɑ́ hɑtələnɑ nyɑ́ ləmɑɣɑsɛɛ yɑɑ leɣe mɑɑ se nɑ mɑ́ tɛɛ nɑ ń kɑɑ nɑ-m?

⁸Ye mɑ kpɑ ɩsɔtɑɑ n wɛ tənɑ, ye mɑ həntɑ ɑtɛtəlɛ tɑɑ, nyɑ́ tɑɑ nyɑ́ tike.

⁹Pɑɑ mɑ kʋlɑ hʋntʋ nɑ mɑ polo ilim təlɩɩlɛ, yɑɑ mɑ tɛsɑ teŋku nɑ mɑ cɑɣɑ tənɑ.

¹⁰Nyɑ́ niŋ kɛ n kɑ́ tiikinɑ-m tənɑ, nɑ ń kpɑ-m nɑ nyɑ́ ntɔɣɔŋ.

¹¹Pɑɑ mɑ tɔmɑ sɩ: Səkpɛtʋɣʋ tɑkɩ-m. Ahoo nɑ́ pəsəɣɩ nyɑɑləm kɛ́, nɑ pə́ cɔɔnɑ-m.

¹²Səkpɛtʋɣʋ mɑɣɑmɑɣɑ tɑ kɛ-ŋ pʋlʋ. Ahoo nɑɑkɩ-ŋ kɛ́ ɩsɩɩ ilim, nɑ səkpɛtʋɣʋ nɑ́ɑ́ wɛɛ-ŋ ɩsɩɩ nyɑɑləm.

¹³Nyɑ́ lɑpənɑ mɑ yʋlʋ pilimile nɑ ń lʋʋ-m mɑ too lotu tɑɑ.

¹⁴Mɑ sɛɛ-ŋ, mpi tɔ, mɑ kɛ́ kʋŋmɑŋmɑm mpi pə tewɑ tɔɣɔ. Nyɑ́ kʋlɑpʋtʋ wɛ teu, mɑ nyəmɑ́ ḿpʋɣʋ teu.

¹⁵Wɑɑtʋ wei n ŋmɑɑkɑɣɑ-m ɩŋmɛlɑʋ tɑɑ nɑ ń lʋʋkɩ-m mɑ too lotu tɑɑ tɔ, mɑ tɔnʋɣʋ tɑ kɛ-ŋ pʋlʋ kʋŋmɛsəm.

¹⁶Wɑɑtʋ wei pə tɑɑ ŋmɑɣɑtɑ-m tɔ n nɑɑkɑɣɑ-m, hɑlɩ n ŋmɑɑ nyɑ́ tɑkəlɑɣɑ tɑɑ kɛ́ kʋyɛɛŋ wei n hɑ-m tɔ nɑ ɩ́ tɑ cɑɑlətɑ.

¹⁷Hɑɩ, Ɩsɔ, mɑɑ cɛkəɣənɑ nyɑ́ ləmɑɣɑsɛɛ. A tɔɔwɑɣɑ pə tɩɩ fɛɩ.

¹⁸Pɑɑ mɑ kɑləɣɩ-yɛ ɑ kəlɑ pɑɣɑlɛ kɛ kɑnyəŋɑ pee. Pɑɑ mɑ kɑlɑɑ nɑ mɑ kʋkɑlətʋ tɛ, mɑ kɑɑ tɛ-ŋ cɛkənɑʋ.

¹⁹Hɑɩ, Ɩsɔ, mɑ kooliɣi sɩ ń kʋ ɑsɑɣɑɑ. Hɑtələnɑ-m yʋlʋkʋlɑɑ mpɛ.