ZABURA 139:1-19

¹Dauda lɛ̀ɛ. Dikiri, n ma yã gwàgwa n dↄ̃̀,

²ń ma vutɛna kũ ma futɛnaao dↄ̃, zaa zã̀zã ń ma laasunnↄ dↄ̃.

³Ndì ma táa'ona kũ ma wutɛnaao tàasi ká, n kↄ̃ dↄ̃̀ kũ ma yãnↄ pínki.

⁴Ari yã gↄ̃ bo ma lɛ́n, Dikiri, ń dↄ̃ sãnsãn.

⁵Ń likamai kpɛ kũ arɛo, n ↄ kúmala.

⁶Dↄ̃na bire demɛnɛ daboyã ũmɛ, à demala, ma ↄ̃ndↄ̃ dí káaro.

⁷Mán mani gɛ́n mà kɛ̃ n Niniaa? Mán mani bàa sí mà gɛ́n mà kuranyĩi?

⁸Tó ma futɛ ma gɛ musu, ń kú gwe! Tó ma wutɛki kɛ̀ gyãwãn, mↄkↄ̃mmɛ gwe!

⁹Tó ma futɛ ma gɛ ifãboki kpa, tó ma gɛ vutɛ ísira bara ifãlɛtɛ kpa,

¹⁰bee gwemɛ má na n ↄĩ, ĩnigↄ̃ ma kũna kũ n ↄplao.

¹¹Tó ma pì gusira damala, ke gupura kũ à likamai li gwãani ũ,

¹²gu dìgↄ̃ sirannɛro, gwãani dìgↄ̃ dennɛ lán fãnantɛ̃ bàmɛ, gupura kũ gusirao dìgↄ̃ lɛɛlɛnnɛmɛ.

¹³Mↄkↄ̃n mɛ́ n ma gũn kɛ̀, n ma í kàsa ma da nɛ̀sɛn.

¹⁴Ma n sáabu kɛ̀ kũ ma kɛna naasi vĩ akũsↄ̃ à yãbonsarɛ vĩ. N yãkɛnanↄ dì bo ń sarɛ, má dↄ̃ sãnsãn ma nɛ̀sɛn.

¹⁵Gↄrↄ kũ n ma í kàsa nɛ́'isↄↄ gũn, ma wá ke utɛnannɛro. Kũ ma mɛ̀ tɛn li asiri gũn gwe,

¹⁶n wɛ́ sì ma nɛ́gbĩnilɛ. Lákũ n ma gↄrↄ dìtɛ nà pínki, a lɛ́ kú n takadan zaade a ke dí naaro.

¹⁷Luda, n laasunn bɛ̀ɛrɛ vĩmɛnɛ manamana, a lɛ́ vĩro fá!

¹⁸Tó má ye mà naro, ń dasi de bùsu'atɛ̃la, tó ma vu, madìgↄ̃ kú kũnwo ari tera.

¹⁹Luda, tó ĩni gbɛ̃ vãninↄ dɛdɛ dé? À gomala, ákↄ̃nↄ gbɛ̃dɛrinↄ!