Womusu 139:1-19

¹Dɑfidin womu ɡe u wom kowobun wiruɡii kuɑ. U nɛɛ, Yinni Gusunɔ, ɑ mɑn wɛ̃ɛrɑ, ɑ mɑɑ mɑn ɡiɑ.

²A nɛn sindu kɑ nɛn seebu yɛ̃. A nɛn bwisikunu tubɑ sɑrun di.

³A nɛn sɑnum kɑ nɛn kpindu yɛ̃. A mɑɑ nɛn swɛɛ kpuro yɛ̃.

⁴N sere nɔɔ wukiɑ, ɑ nɛn ɡere kpuro yɛ̃ kɔ Yinni Gusunɔ.

⁵A kɑ mɑn wɑ̃ɑ biru kɑ wuswɑɑ, mɑ ɑ mɑn wunɛn nɔmu sɔndi.

⁶Yɛ̃ɛ ten bweseru tɑ mɑn sɑ̃ɑwɛ mɑɑmɑɑki bɑkɑ. Tɑ kpɑ̃, nɑ ǹ kpɛ̃ n tu tubu.

⁷Mɑ ɡiɑ kon wunɛn Hunde kisirɑri n dɑ. Nɡe mɑ ɡiɑ kon dukɑ we ɑ kun kɑ mɑn wɑ.

⁸Nɑ̀ n yɔɔwɑ sere wɔllɔ, ɑ wɑ̃ɑ mi. Nɑ̀ n dɑ ɡɔriɔ, ɑ mɑɑ wɑ̃ɑ mi.

⁹Nɑ̀ n dɑ sɔ̃ɔ yɑri yerɔ ǹ kun mɛ sɔ̃ɔ duu yerɔ nim wɔ̃kun ɡoorɔ,

¹⁰min tii, wunɛn nɔmuwɑ ɡɑ koo mɑn kpɑrɑ, kpɑ wunɛn nɔm ɡeu ɡu mɑn nɛnɛ.

¹¹Nɑ̀ n nɛɛ, yɑm wɔ̃kurɑ koo mɑn bere, yɑm dɑ bururewɑ mi nɑ wɑ̃ɑ.

¹²Bɑɑ yɑm wɔ̃kuru tɑ ǹ tĩri wunɛn mi. Wɔ̃kuru tɑ buririwɑ nɡe sɔ̃ɔ sɔɔ. Yɑm wɔ̃kuru tɑ bɑllimɔwɑ nɡe yɑm bururɑm.

¹³Wunɑ ɑ nɛn wɑsin doo dookɑ mɔmɑ. Wunɑ ɑ mɑn swɛɛnɑ nɛn mɛron nukurɔ.

¹⁴Nɑ nun siɑrɑ yèn sɔ̃ ɑ mɑn tɑkɑ kuɑ kɑ wunɛn dɑm mɑɑmɑɑkiɡim. Wunɛn nɔmɑn sɔmɑ kun ɡere mɔ. Yeniwɑ nɑ yɛ̃ sɑ̃ɑ sɑ̃ɑ nɛn ɡɔ̃ruɔ.

¹⁵Sɑnɑm mɛ bɑ mɑn mɔmɑ ɑsiri sɔɔ, mɑ bɑ mɑn swɛɛnɑ nɛn mɛron nukurɔ, nɛn wɑsi kun nun berue.

¹⁶A mɑn wɑ sɑɑ bɑ nɛn nukuru dumɔn di. Wunɛn tireru sɔɔrɑ bɑ nɛn wɑ̃ɑrun tɔ̃nun ɡeeru yoruɑ nɑ sere nu dibu toruɑ.

¹⁷Gusunɔ, wunɛn bwisikunu nu duku. Nin dɑbirɑ bɑndɑ.

¹⁸Nɑ̀ n nu ɡɑrimɔ, nu yɑni sɛɛri dɑbiru kere. Nɑ̀ n mɑɑ dom seewɑ, nɑ rɑ n wɑ̃ɑ kɑ wunɛ.

¹⁹Gusunɔ, ɑ de tɔn kɔ̃sobu bu ɡbi, kpɑ tɔn ɡowobu bɑ n kɑ mɑn tonde.