Psam 139:1-19

¹Mmko Psamna Deivid igirumi. Yawe God, tam nuwanuwagu kamona kwaginigini bi kwakowa kirakiiyegu.

²Tam kwakovi da awaki raghanine amakeyowogha bo ageghomiiri amiiri. Bagune tam rabarabae, nonowa na yagu noghota kwakakovi.

³Tam apeepewana raghanine na kwakitakitagu bo raghanina yagu bare kamone iiyawiitaveyanana. Tagu sawara tupana aberabera na tam kwakakovi.

⁴Yawe God, muriyeda ayisisiya na, tam nada kwakovi da awaki anisisiyeni.

⁵Tamna ware gari naboni kuvitumpipinegu, bi imam debaguve kutore da yam maragatama kwabababaregu.

⁶Tam akovigu kabina mma naboni na parapa iragata kirakii da gerubana anakovina.

⁷Tagu gerubana mebo anaverairem ananagho da gekunakitaguna? Getana kubura noko naboni meme. Meghamegha ananono na tam nonowa na nama!

⁸Meboda anagae abame, na tam nama; Bo meboda anarabobo bi sinadogugu, na tam nama.

⁹Meboda anarowoghataveyana ananagho raghani matene gabudara yageegeena kuburidiye, bo meboda ananagho raghani didine gabudara yayoyona kuburidiye make biidi

¹⁰na tam imam maragasina ininaghovegu, bi katiiyam inababaregu.

¹¹Tagu meboda wiididibara ayawoneni da iyikowoyigu bo yeghana ivitumpipinegu na iyididibara magha

¹²Bi gegha da bagune wiididibara kamone, tagu gerubana anakowoyemna. Tam biidi wiididibara na parapa yeghanina ware gabudara. Wiididibara da yeghana tam biidi na mayimayiyidi.

¹³Tam tubuyigu kamona torerereyidi, nuwanuwa da gayama kubera bi sinagunaki raparapane kuvikiikiigu.

¹⁴Bi kubera wiimasiyegu kiiravine na iikiikiivem; bagibagi tupadi kwaberabera na waratetedi. Tagu nuwanuwagu tupanama akovi.

¹⁵Raghanina irikegu kubera, bi sinagunaki raparapane kutoura yapoyapora, bi name wiikowoye ayaragaragata na tam kwakovi da tagu nama.

¹⁶Muriye da ayatubugha na tam kukitagu. Na yagu make yawana gabudaridi kuveregu da anamake, na yam buka kamone kugiruma. Muriye da gabudara dagudaguna iyadagu,

¹⁷O God ipiropiro kirakii da tagu yam noghota parapa anakovidi basuna toudi sipeyara kirakii!

¹⁸Tagu gerubagu da anakabiyavidina basuna toudi parapa sipeyara, gekikira eghana naboni! Bi tupadi kabiyawa kovidina na, augunai da ayamakewaghata tam naboni!

¹⁹God, tagu parapa akayokayoveni da berabero wawayidi kunikasunughana! Kasukasunugha wawayidi gwabiguma kurukwavina tavetaveyana.