SALMOS 139:1-19

¹X̱ana' Dios, ba bwíakzo' neda' na' binlo nónbi'o neda'.

²Nnézkzelo' kate' ži'a, na' kate' ẕzo ža'a. Zíto'le nnézkzelo' da' yo'o yichj ḻáẕda'wa'.

³Ẕwíakzo' da' žona', na' da' žezá' ḻaža'a. Nnézkzelo' yógo'te da' žona'.

⁴Kate' bi na' wchaḻja', ba nnézkzelo' Le', X̱ana' Dios, yógo'te da' nnia'.

⁵Gáte'tezle kwita' neda' zoakzo' Le', X̱ana' Dios, na' no'o žon chochen neda'.

⁶Dan' ẕente nak da' nnezlo' Le' žonen ga žebanla'. Nakḻe'en sina', na' bi gak chejni'ilan'.

⁷¿Gaẕ gak cha'a zi'to' gan bi zoakze Be' La'y chio'? ¿Gaẕ gak wẕonnja' gan bi zoakzo' Le'?

⁸Cha' kwena' sibe ẕan ya'abá, zoakzo' Le' ga na'. Cha' yetja' ḻo da' gže' che yežlyó, zo' Le' ga na'.

⁹Chela' sáke'la' tia' ḻo be', na' cha'a zi'to' gan ẕḻa' wbíž, o tia' yecheḻa'ale nisdo' gan žen wbíž,

¹⁰ḻezka' sóaḻeno' neda' ga na', na' no'o ḻi ža gon chochen neda'.

¹¹Chela' gak gona' ga wkache' da' choḻ neda', o gona' ga yeyák choḻ baní' da' nyechjlen neda',

¹²da' choḻ na' bi gak wkachen' neda' ḻawo' Le', na' yel yeyaken ka te ža ḻawo' Le'. Lébeze ka zej nak da' choḻ, na' yeḻa' baní' ḻawo' Le'.

¹³Le' beno' da' ka' zej yo'on ḻo beḻa' žen chia'. Le' bzo'o neda' ḻo ḻe'e x̱na'a.

¹⁴Wká'n ẕenkza' Le' dan' ẕente nak da' žono', na' žebanla' ka naken. Dot ḻaža'a nnézkzela' naken ki.

¹⁵Bḻe'ekzlo' neda' kate' wyá'a žit yoa'a, katen' wzóa' ḻo ḻe'e x̱na'a, katen' bgola' ḻo da' bagáche'ze ga na'.

¹⁶Bḻe'elo' beḻa' žen chia' kate' wyá'n. Yógo'te da' ki bzojon' ḻe'e yiche chio', na' wdé na' wyá'n, na' yógo'ten gókgaken kan zej nyejwn.

¹⁷X̱ana' Dios, ẕente zej nak da' žezá' ḻažo'o gono'. Da' zante zej naken.

¹⁸Cha' gak ḻaža'a wlaba' ka zej naken, zej nyanen ka yož dan' žen' žoa'a yegw ẕen. Kate' žebana', na' zóaḻenkza' Le'.

¹⁹X̱ana' Dios, da' likze goto' benne' wen da' ẕinnj ka'. Che ḻen le kwas gan zoa', ḻe'e, benne' wet benách ka'.