SALMOS 139:1-19

¹TOTECO, ta techyoltachilijtoc huan tijmati nochi ten na.

²Ta cuali tijmati sinta nimosehuía o nimoquetza. Huan quema niitztoc huejca, ta tijmati taya nijpixtoc ipan notalnamiquilis.

³Ta technextilía nopa ojti cati monequi nijtoquilis, huan techilhuía canque nicalaquis huan canque nimosiyajquetzas. Sesen talojtzi ta tijmati canque niitztoc.

⁴Ta TOTECO, tijmati taya niquijtos hasta quema ayemo nicamanalti.

⁵Ta techyahualojtoc pampa tiya ica noixpa huan ica noica, huan nopani tijtalía momax para techtiochihuas.

⁶Nochi ni tamanti cati ta tijmati nelía cuajcualtzi, huan ohui para nijneltocas.

⁷Amo cana hueli nimotatis ten moTonaltzi. Amo cana huelis nimotatis huan amo tiitztos nopona.

⁸Sinta nitejcos hasta ilhuicac para nimotatis, ta nopona tiitztoc. Huan sinta niyasquía ipan nopa hueyi ostot campa itztoque mijcatzitzi, ta nepa tiitztoc.

⁹Sinta nijpiyasquía noeltapal huan nipatanisquía, huan niquixcotonasquía nopa hueyi at,

¹⁰hasta nepa techyacanasquía ica mohueyi chicahualis.

¹¹Sinta nijchihuasquía campeca para nimotatis ipan tzintayohuilot, nopa tzintayohuilot mocuepasquía taahuili yahualtic ten na, pampa ta tiitztos nopona.

¹²Pampa yon nopa tzintayohuilot amo hueli techtatis moixpa, Toteco. Pampa para ta nopa yohuali taahuía quej elisquía tonaya. Nopa tzintayohuilot huan taahuili ta tiquita san se.

¹³Ta tijsencajqui sesen tamanti cati onca iijtic notacayo. Huan quema niitztoya iijtico nonana, tijmotzquilti sesen tamanti cati nijpiya.

¹⁴Nimitztascamati pampa techsencajqui ma nieli se tamanti cati nelía cuajcualtzi. Quena, nopa tequit cati tijchijqui quema techsencajqui nel pano yejyectzi, San nijtetzaita para nimoilhuis ten nochi cati ta tijchijtoc ipan notacayo.

¹⁵Ta techtachilijtoya quema na nipejqui nimoscaltía nel nimotatijtoya ten nochi sequinoc ipan iijtico nonana. Quema amo aqui más quitachilijtoya, ta techchijchijqui ica mohueyi yajatil, quej se cati cuali quimati taxinepalohua.

¹⁶Ta techitac quema ayemo nitacatiyaya. Huan quema ayemo nitaijyotilanayaya, tiquixquetzqui quesqui tonali niitztosquía. Huan sesen tonali cati niitztosquía huan taya nopantis, ta tiquijcuilo ipan moamatapohual.

¹⁷Toteco Dios, nijmachilía nelía cuajcualtzi quema nimomaca cuenta para ta tijsenhuiquilía timoyolilhuía ten na.

¹⁸Hasta amo hueli nijpohua quesqui huelta timoyolilhuía ten na ipan se tonal. Huan ica ijnaloc quema niisa, ta noja timoyolilhuijtoc ten na.

¹⁹Toteco Dios, nelía elisquía cuali sinta tiquintzontamiltisquía nochi masehualme cati amo mitztepanitaj. Xijchihua ma nechtalcahuica nopa temictiani,