1Siwan tapduu gweaat gwenduat yuwa sandewana aminu tapatuta Kena yot gapma Galili kep komu yuaune maya tapatu maatnae takut. Siwan Jesutane mingata aminu wa maya takut tapatane yotnane.
2Siwan wa aminda Jesuat pandetnaat yayawamba apu kataknga ipat kaningge yayawaking.
3Siwan aminbamda nanam nake tangoke wain yangga aknga tangopa puyuwan mingata Jesue, “Wainu puyuwan wena gwa singgak,” ngang inikut.
4Iniwan yake anzing inikut, “Minga! Unzingu ma naniwim. Gatane sanga dua. Natane tapduknga dua dapakakge unzingu ma naniwim,” ngang inikut.
5Iniwan ngana mingata puya aminu anzing yanikut, “Ita wamu takngatu ginde atdaniwik kakngakan tasinong,” ngang yanikut.
6Siwan gapma supda pasikwaapakukingu katau kautdu musaat kautdu gwendu ngang Judia nana aminda inane miti akngatane kepi takngatu tawake tasikaing kakngae natake yangga zike sautningge natake undang pakapu peking. Sike gapma wa buyambam siknga gwegwen. Siwan bakeu 10 ba 15 ngang yangga zike gapma buyambamu wa gwendunekanu tukwaba dopnanga.
7Siwan Jesuta puya aminu unenana anzing yanikut, “Yangga zike gapma anggwegwen tukwaba dopnong,” ngang yanikut. Yaniwan kuku yangga zike pakapu gapma wa gwegwekatang tukwaba genanekan dopbing.
8Tukwaba dopana ita anzing yanikut, “Yangga kundu uneta zike paku nanam kuyae yuak kapae imunong,” ngang yaniwan zike pakuke imuking.
9Pakuke ima ita napan siwan yanggata wain dakngawan tangoke ngana yapiie apbotake zane paing ngang natapbut. Ngana puya aminu yangga ziking amindakan atnatapbing. Siwan nanam kuyae yukut tapata aminu maatna takut tapa yatawamban apbut.
10Apana ita anzing inikut, “Aminbamda wainu takeaknga gamok usanzikaing. Siwan masande aminu buyambamu tangopa puyuwana gatu wainu wai binga une usanzikaing. Ngana ga wainu takeaknga kotnake teyaknga apmaatzim yanipewi takapukaing,” ngang inikut.
11Sike wa duya tupan taknga Jesuta Kena yot gapma Galili kep komu yuaune tasikut. Tasiwan umana buyambam siknga kayaapa ngang kake ninu pandetnata ie natapna kekeknga sikut.
12Siwan sanga wa maya takut taknga tasiwa puyuwawana Jesuat mingaat gatu uyapnaat gatu pandetna ngangga Kapaneam yot gapmane pukukumang. Pukuke tapduu kundu you wanggapmane yukumang.
13Siwan Judia nana aminda tapduk takwanu angelata tupa siknga Isrel nana amin yapbike Isip nana amin zipan kumbingge natake yuwatakak tapduk takwanu Pasova ngang yakaing gwenu akaningge dapaknga sikut. Siwan Jesuta Jerusalem yot gapmane koke kawawan
14Anutue yot takwan gwene ikwawa gamakat sipsipat kwaikat pakapu yama manita usike Anutue imuningge tasiwawa kakut. Kawawan Romnanatane mani silwa sanis pasike yot takwandane mani silwa yake imanggaman tasiwawa kakut.
15Kake nau takngatu takngatu unekan komuke zipnangge yake yanikwasiwan aminda ikwawa gamakat sipsipat pake kepman epu pake kuking. Epuke kuwawa Jesuta imanggaman tasiking amindane manina tukwamban kuwawa tebona pangenapamapan kuking.
16Unzing tasiyuk anzing yanikut, “Ginu kwait usiningge yakaing aminu kwaitza pake kunong. Ginda tasiwawa Nanatane yot gwenu usiwam yot gwen binga dakngawan kawa take dua singgak. Teke kukakut,” ngang yanikut.
17Yanike tasiwawan wamu takngatu tupa siknga Anutue wapatang tematekuu ninu pandetnata gatu anzing natapbumang, “Gatane yot takwan gwenda take yuwikge iaknga siknga nataat takngata banipmaatang katapda binga nasinggak,” ngang matakut takngae gatu natdekumang.
18Siwan ngana Judia nana amindane take akwakga unin kake anzing iniking, “Gata duya dasing kaknga tasiwi kake Anututa gandutewan puya waaknga pasinggayakge natdetnim,” ngang iniking.
19Iniwa ita yake anzing yanikut, “Ginda yot takwanu anggwenu waiwanu tapduu gweaat gwenduatdekan nata gatu tangenawit.”
20Ngang yaniwan yake tapatekwa wamu anzing iniking, “You anggwenu tangenake tasiwawa nakanu 46 ayapbikut ngana gata tapduu gweaat gwenduatdekan tangenake mitapsa,” ngang iniking.
21Ngana yot takwan gwende Jesuta wa yakuu wa tuwang wamu inane gupnae natake yakut.
22Unzingge masande Anututa matmat gapmaneta Jesu gatu tangenawan pandetnata wamu tupa wa yakut takngae gatunin natdekumang. Siwan Anutue wamu mataking kakngaat gatu Jesuta wamu wa yakut takngaatde natapna siakan sikut.
23Siwan Jesuta Jerusalem yot gapmane yuwatakak tapduk takwanu Pasova ngang yaking gwene yukut. Yuwawan aminbamu duya takngatu takngatu ita pasiwawa kaking. Kake ie Anututa initewan apu Krais gatanimuyaapa dakngake apu pasinggak ngang natapa siakan sikut.
24Siwan ngana Jesuta wa aminde natake baniaatang takngaaya natapsa amin ngang kagwauke aminu waakwakat dua yutnim ngang natapbut.
25Dasingge? Ita aminu kuupbamde yapii atnataak. Ita natdetdetde atdapan kake aminu tapatuta aminde yapiie dua inindamumbik. Wena. Ina aminde musiaatang kake atnatdekgak.
