Isɑ̃ɑ̃ 2

1

2

3

4

5

6

7

8

9

10

11

12

13

14

15

16

17

18

19

20

21

¹Kɛ̀ dɛ̀ mmɔkɛ yɛwe yɛ̀tɑ̃ɑ̃ti kɛ̀ mupotúòmù bɑnnii ɑ̃nnɛ́ Kɑnɑɑ, Kɑdidee kó kutempɛ̃ nkɛ̀ Yesu yɔ̃ ndɛ̀ bo.

²Kɛ̀ bɛ̀ múnkɛɛ yú Yesu nɛ̀ o tɑncɔ́ùmbɛ̀ dɛ kó mupotúòmù bɑnni.

³Kɛ̀ mɛnɑɑ̀ ndeè kɛ̀ Yesu yɔ̃ ò nɑ̀kɛ́ kɛ dɔ̀: Mɛnɑɑ̀ ǹdóntɛ́.

⁴Kɛ̀ Yesu ò nɑ̀kɛ́ kɛ dɔ̀: N yɔ̃, fɔ̃́ɔ̃̀ bɑ́ n nɑ́kɛ́ n dò nkɛ́ dɔɔ̀ tì! M mɔ̀nnì mu nyí tùɔ̀kɛ.

⁵Kòo yɔ̃ nɑ́kɛ́ bɛtɔ̃mbɛ̀ kɛ dɔ̀: Kòò di nɑ̀kɛ́ tì, di tì dɔ̀ɔ̀ timɔu.

⁶Kɛ sɔ̃́ nsicee dɛ̀ bo sìkuɔ̀, bɛ̀ mɑɑ́nɛ̀ sì yɛtɑ̃́rɛ̀, Sifubɛ do ɔ̃ɔ̃ utɛ́ sì mɛniɛ nkɛ́hɔ́únɛ̀ bɛmɑ́ɑ̀ kɛ́bɑ́ntɛ̀ Kuyie. Bɑ́ tɛ̀, tɛ̀ do bo mbo dítírìbɛ̀ tɛkɔ̀ùtɛ̀ (100).

⁷Kɛ̀ Yesu nɑ́kɛ́ bɛtɔ̃mbɛ̀ kɛ dɔ̀: Píɛnnɛ̀ sicèe sii mmɛniɛ. Kɛ̀ bɛ̀ɛ sì píɛ nfɛ́i fɛ́i.

⁸Kòò dɔ̀: Yɛ̃ntɛ́nɛ̀ di mmɔ̀nnì kɛ́duɔ́ nwèè ni dibɑnni kó mutɔ̃mmú. Kɛ̀ bɛ̀ɛ ò duɔ́.

⁹Kòo yɑ́ɑ́kɛ́ mɛniɛ mmɛ̀ɛ̀ nɑɑ́ mmɛnɑɑ̀, nhò í mbɑntɛ́ dɛ kó mɛnɑɑ̀ nyɛ̀nní dɛ̀, kɛ̀ bɛtɔ̃mbɛ̀ biɛ mɛ nyɛ̃́ kɛ yɛ̃́ bɛɛ̀ dómɛ̀ dɛ kó mɛniɛ.

¹⁰Wèè ni dibɑnni kòo yú wèè tóú o pokù kóò nɑ̀kɛ́ kɛ dɔ̀: Bɛtɔbɛ̀ ɔ̃ɔ̃ ketɛ́ kɛ́totí mɛnɑɑ̀ mmɛ̀ɛ̀ nɑɑti mɛ̀mmɛ kɛ̀ bɛnìtìbɛ̀ muɔ́ nkɛ deè bɛ̀ nɛ́ totí mɛ̀ɛ̀ í nɑɑti mɛsɑ̀ɑ̀ nkɛ̀ fɔ̃́ ndèntɛnɛ̀ mɛnɑtimɛ̀!

¹¹Dɛ kó tidiɛtì Yesu dɔ̀ɔ̀ tì Kɑnɑɑ, Kɑdidee kó kutempɛ̃ mmiɛkɛ, tiì tú tiketitì, ò dɔ̀ɔ̀ tì, kɛ bɛnkɛ ò kpeńnìmɛ̀, kòo tɑncɔ́ùmbɛ̀ dɔkɛɛ nhò tɑ̃́.

¹²Dɛ kó difɔ̃nkúò kɛ̀ Yesu kɔtɛ Kɑpɛnnɑummu nɛ̀ o yɔ̃ nɛ̀ o nɛí nɛ̀ o tɑncɔ́ùmbɛ̀ kɛ dɔ̀ yɛwe sɑ́m̀pɔ́.

¹³Sifubɛ kó dibɑnni bɛ̀ tu dì diyentɛ́bɑnni kɛ̀ dìi tɔ́ɔ́nní kɛ̀ Yesu kɔtɛ Sedisɑdɛmmu,

¹⁴kɛ́yɑ̀ bɛnìtìbɛ̀ kɛ̀ bɛ̀ fiiti inɑ̀ɑ̀kɛ nɛ̀ ipe nɛ̀ sinɔ́nkpeé Kuyie ncĩ́ɛ̃̀tɛ̀ kó kudɑ̀nkù miɛkɛ nɛ̀ bɛdítíceetibɛ̀ kɛ̀ bɛ̀ kɑ̀ri tɑ́bùrìbɛ̀ tɑkɛ́.

¹⁵Kòo dɔɔ̀ kuhɔ̃ũ didɑ́ù, kɛ́ bɛ̀ bɛ̀ti bɛmɔu nɛ̀ bɛ nɑ̀ɑ̀kɛ nɛ̀ bɛ pe kɛ díɛ́ bɛdítíceetibɛ̀ díítí kɛ́buɔ́ mbɛ tɑ́bùrìbɛ̀,

¹⁶kɛ́nɑ́kɛ́ bɛ̀ɛ̀ fiiti sinɔ́nkpeé kɛ dɔ̀: Túótɛ́nɛ̀ di tɛrɛ̀ kɛ́yɛ̀, di bɑ́ɑ́ dɔɔ̀ n cicɛ cĩ́ɛ̃̀tɛ̀ kupotɑɑ́ nkpɛtɛ.

¹⁷Kòo tɑncɔ́ùmbɛ̀ɛ dentɛní tìì wɑ̃̀ri kɛ tú: N Yiɛ̀ nKuyie n dɔ́mu ɑ cĩ́ɛ̃̀tɛ̀ kɛ̀ dɛ̀ n tuɔ̀ mmuhɑ̃ɑ̃́ nkɔ̃mɛ.

¹⁸Kɛ̀ Sifubɛɛ ò bekɛ kɛ dɔ̀: Dɔɔ̀ tidiɛtì mɑtì kɛ̀ tí bɑntɛ́ kɛ dò nhɑ mɔkɛ kucɛ kɛ bo nɑ kɛ́dɔɔ̀ ɑ mɛ̀ ndɔ̀ɔ̀ dɛ̀.

¹⁹Kɛ̀ Yesu bɛ̀ tɛ̃̀ńnɛ́ kɛ dɔ̀: Pɔntɛnɛ̀ Kuyie ncĩ́ɛ̃̀tɛ̀ kɛ̀ n wɛ̃tɛ kɛ́ tɛ̀ mɑɑ́ yɛwe yɛ̀tɑ̃ɑ̃ti miɛkɛ.

²⁰Kɛ̀ Sifubɛ dɔ̀: Tínti mɑɑ́ Kuyie ncĩ́ɛ̃̀tɛ̀ tɛ̀ yɛbie nsipísìnɑ̀ɑ̀ nɛ̀ yɛ̀kuɔ̀ kɛ̀ fɔ̃́ nnɛ́ bo tɛ̀ mmɑɑ́ yɛwe yɛ̀tɑ̃ɑ̃ti miɛkɑɑ̀?

²¹Yesu do nɑ́ɑ́ Kuyie ncĩ́ɛ̃̀tɛ̀ kpɛ́í nkɛ yɛ̃ nho mɔ́mmuɔ nwe.

²²Yesu yɑ̃̀ńtɛ́ dìì mɔ̀nnì kòo tɑncɔ́ùmbɛ̀ɛ dentɛní ò sòò tì bɛ́immɛ̀, kɛ́yie nKuyie nnɑ́ɑǹtì tìì wɑ̃̀ri, nɛ̀ Yesu nɑ̀kɛ́ tì.

²³Yesu bo dìì mɔ̀nnì Sedisɑdɛmmu diyentɛ́bɑnni kɛ̀ bɛnìtìbɛ̀ pɛ́uu yɑ̀ ò dɔ̀ɔ̀ri tìì diɛtì kɛ́ nhò tɑ̃́.

²⁴Yesu mɛ nyí mbɛ̀ tɑ̃́ kɛ yɛ̃́ ò yɛ̃́mɛ̀ bɛ yɛ̀mmɛ̀ bɛmɔu.

²⁵Dɛ̀ do í dò mbɛ̀ɛ ò nɑ̀kɛ́ onìtì dòmmɛ̀, ò do yɛ̃́mu nɛ̀ omɑ́ɑ̀ tìì bo onìtì yɛ̀mmɛ̀ miɛkɛ.