1Alatala yi a fala Musa xa,
2a a xa a yamari Isirayila kaane ma, a naxa, “Ɛ na so Kanan yamanani, n bɔxɔn naxan soma ɛ yii ɛ kɛɛn na, na danne ni i ra:
3Ɛ yamanan yiifari fɔxɔn danna findima Sini tonbonna nan na, Edɔn yamanan danna ra. Na danna fɔlɔma Fɔxɔ Daraan yiifari fɔxɔn nin sogeteden binni.
4A bilinma nɛn Akaribimi geyaan yiifari fɔxɔni, siga Sini binni, dangu Kadesi-Barineya yiifari fɔxɔn ma han Xasari-Adari han Asimon.
5Keli Asimon yi, danna mɔn danguma nɛn sa dɔxɔ Misiran xuden na, a sa dɔxɔ fɔxɔ igen na.
6Sogegodode binni, danna findima fɔxɔ ige gbeen nan na.
7Kɔmɛnna ma, ɛ xa danna sa fɔxɔ ige gbeen nun Horo geyaan tagi.
8Keli Horo geyaan ma, ɛ yi a radangu Lebo-Xamata han Sedadi yi.
9A yi siga han Sifiron, sa dɔxɔ Xasari-Enan na. Ɛ kɔmɛn ma danna nan na ra.
10Sogeteden binni, ɛ xa danna sa keli Xasari-Enan yi siga Sefami binni.
11Keli mɛnni, a yi siga Ribila binni, Ayin sogeteden binni, sa dɔxɔ tintin yiren na Kinɛrɛti Daraan sogetedeni.
12Danna yi sa dɔxɔ Yurudɛn Baan na siga Fɔxɔ Darani. Ɛ yamanan danne findin ne nan na.”
13Musa yi na yamarine rali Isirayila kaane ma. A mɔn yi a fala e xa, a naxa, “Alatala yamanani ito nan yitaxunma bɔnsɔn solomanaanin nun a tagiin na masɛnsɛnna xɔn.
14Amasɔtɔ Rubɛn bɔnsɔnna nun Gadi bɔnsɔnna nun Manase bɔnsɔnna fɔxɔ kedenna bata yi e kɛɛ bɔxɔn sɔtɔ.
15Bɔnsɔn firin nun a tagini ito bata e kɛɛ bɔxɔn sɔtɔ Yurudɛn Baan sogeteden binni, Yeriko yɛtagi.”
16Alatala yi a fala Musa xa, a naxa,
17“Saraxarali Eleyasari nun Nunu a dii Yosuwe xa yamanani taxun.
18I mɔn xa bɔnsɔn manga keden keden sa e fari e malideni.”
19E xinle ni itoe ra: Yefune a dii Kalebi Yuda bɔnsɔnni,
20Amixudi a dii Semuyɛli Simeyɔn bɔnsɔnni,
21Kisilon ma dii Elidadi Bunyamin bɔnsɔnni,
22Yogili a dii Buki, Dan bɔnsɔn mangana,
23Efodi a dii Xaniyeli, Yusufu a dii Manase bɔnsɔn mangana,
24Sifitan ma dii Kɛmuyɛli, Yusufu a dii Efirami bɔnsɔn mangana,
25Parinaki a dii Elisafan, Sabulon bɔnsɔn mangana,
26Asan ma dii Palitiyɛli, Isakari bɔnsɔn mangana,
27Selomi a dii Axixudi, Aseri bɔnsɔn mangana,
28e nun Amixudi a dii Pedaheli Nafatali bɔnsɔn mangana.
29Alatala ne nan yamarixi e xa Kanan yamani taxun Isirayila kaane ra.
