1Wal YAWEI det trubala God bin gibit Mosis najawan wed na blanga detlot Isreil pipul, “Iya na ola boda blanga det kantri Keinan weya ai garra gibit langa yumob.
3Det sauthsaid boda garra kipgon brom det deset kantri gulum Sin olawei langa det boda blanga Edam. Im garra stat langa det sanraiswei langa det sauthsaid blanga det solwoda gulum Dedsi.
4En brom deya det boda garra go langa det sauthsaid langa det jampap langa det hil gulum Ekrabim, en kipgon thru langa Sin, longwei sauthsaid raidap langa Keidishbaniya. Brom deya det boda garra kipgon sangodanwei langa Heisada en kipgon langa Esman.
5Deya na det boda garra kipgon langa det krik weya det boda blanga Ijip jidan, en deya na im binij langa det solwoda gulum Medatareiniyan.
6“Det sangodan boda garra jidan langa det solwoda gulum Medatareiniyan.
7“En det nowath boda garra stat langa det solwoda gulum Medatareiniyan en go rait langa det hil gulum Hora,
8en brom deya na langa det jampap langa det hil gulum Heimath. Im garra kipgon langa Sedad
9en langa Sifron, en im garra binij langa Heisanan.
10“Det sanrais boda garra bulurrum streidap brom Heisanan langa Shefam.
11Brom deya im garra go sauthwei langa Habal sanraiswei langa Eiyin, en kipgon langa det hil kantri langa det sanraiswei blanga det bigwan woda gulum Leik Gelali,
12en brom deya sauthwei langa det Jodan Riba raidap langa det solwoda gulum Dedsi. “Detlot na garra jidan det fobala boda blanga yumob kantri.” Lagijat na YAWEI bin tok.
13Wal Mosis bin tok langa ola Isreil pipul, “Dijan na det kantri yumob garra abum wen yumob garra tjakambat detlot speshalwan ston. Dijan na det kantri weya YAWEI gibit langa det 9 en haf klen.
14Detlot klen blanga Ged en Rubin en haf blanga det Manesa klen hubin jidan sanrais said bin gedim olabat kantri en deibin kadimat langa ola femili deya,
15sanraiswei langa det Jodan Riba wansaid langa Jeriko.” Lagijat na Mosis bin tok.
16Wal YAWEI bin tok langa Mosis,
17“Eliyeisa det serramonimen en Joshuwa det san blanga Nan garra kadimat det kantri blanga detlot pipul,
18en wanbala lida brom ebri klen garra album dubala blanga kadimat det kantri.” Lagijat na imbin tok.
19Wal YAWEI bin pikimat dislot men na brom detlot klen. Blanga det Juda klen det lida bin neim Keilab, det san blanga Jefana. Blanga det Simiyan klen det lida bin neim Shelumiyel, det san blanga Amihad. Blanga det Benjamin klen det lida bin neim Elided, det san blanga Kislon. Blanga det Den klen det lida bin neim Bukai, det san blanga Joglai. Blanga det Manesa klen det lida bin neim Heniyel, det san blanga Ifad. Blanga det Ifreiyim klen det lida bin neim Kemyuwel, det san blanga Shiftan. Blanga det Sebyulan klen det lida bin neim Elisafan, det san blanga Panak. Blanga det Isaka klen det lida bin neim Paltiyel, det san blanga Esan. Blanga det Esha klen det lida bin neim Ahihad, det san blanga Shelomi. Blanga det Neftali klen det lida bin neim Pedahel, det san blanga Amihad.
29Wal dislot na ola men weya YAWEI bin pikimat blanga kadimat detlot kantri blanga ola Isreil pipul langa det kantri gulum Keinan.
