Lampahnah 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

¹BOEIPA loh Moses te a voek tih,

²“Israel ca rhoek te uen lamtah amih te thui pah. Nangmih Kanaan khohmuen la aka kun rhoek aw, khohmuen he tah nangmih ham Kanaan khohmuen kah rho la a rhibawn neh ha yalh bitni.

³Tuithim baengki ah Zin khosoek lamloh Edom ngong phai Edom te nangmih ham om bitni. Tuithim khorhi tah lungkaeh li a bawt lamloh khothoeng hil nangmih ham om bitni.

⁴Nangmih ham khorhi tah tuithim kah Akrabbim kham ah a hil vetih Zin a poeng duela om ni. Te phoeiah Kadeshbarnea tuithim lamloh a hmoi ah pawk vetih Hazaraddar a pha phoeiah Azmon la pawk ni.

⁵Azmon lamkah soklong khorhi te Egypt la a hil vetih a bawtnah tuipuei ah om ni.

⁶Khotlak kah khorhi te khaw tuipuei len hil te nangmih ham om vetih khotlak khorhi te nangmih ham khorhi la om ni.

⁷Tlangpuei khorhi te tuipuei len lamloh nangmih ham om vetih Hor tlang te namamih ham thuun thil uh.

⁸Hor tlang lamloh Lebokhamath te thuun uh lamtah khorhi hmoi te Zedad la pawk saeh.

⁹Te phoeiah khorhi te Ziphron la pawk vetih a Hazarenan bawt om ni. He tah nangmih ham tlangpuei kah khorhi la om ni.

¹⁰Khothoeng kah khorhi te Hazarenan lamloh Shepham duela nangmih ham thuun sak.

¹¹Riblah Shepham lamkah khorhi te Ayin khothoeng ah suntla saeh lamtah khorhi aka suntla te khothoeng kah Kinnereth tuipuei kah hlaep la khoe saeh.

¹²Khorhi te Jordan la suntla bal aeh lamtah a bawtnah te lungkaeh li ah om saeh. He tah khohmuen kaepvai ah nangmih ham rhilung la om ni,” a ti nah.

¹³Te phoeiah Moses loh Israel ca rhoek te a uen tih, “BOEIPA loh koca pako neh koca rhakthuem taengah paek ham a uen vanbangla khohmuen he hmulung neh tael uh.

¹⁴A napa rhoek kah imsawn tarhing ah Reuben ca rhoek kah koca neh a napa rhoek imsawn tarhing ah Gad ca rhoek koca loh a yo uh. Amih kah rho te Manasseh koca rhakthuem a loh.

¹⁵Koca panit neh koca rhakthuem loh a rho te khothoeng ah khocuk kah Jerikho Jordan kah rhalvangan ah a doe uh coeng,” a ti nah.

¹⁶BOEIPA loh Moses te a voek tih,

¹⁷He kah ming aka om hlang rhoi, khosoih Eleazar neh Nun capa Joshua loh nangmih ham khohmuen han tael bitni.

¹⁸Khoboei khaw koca pakhat lamloh khoboei pakhat tah khohmuen aka tael la lo.

¹⁹He hlang rhoek a ming tah, Judah koca lamloh Jephunneh capa Kaleb,

²⁰Simeon ca rhoek kah koca lamloh Ammihud capa Samuel,

²¹Benjamin koca lamloh Khislon capa Elidad,

²²Dan ca rhoek koca kah khoboei Jogli capa Bukki,

²³Joseph capa Manasseh ca rhoek kah koca lamloh Ephod capa khoboei Hanniel,

²⁴Ephraim ca rhoek kah koca lamloh Shiphtan capa khoboei Kemuel,

²⁵Zebulun ca rhoek kah koca lamloh Parnach capa khoboei Elizaphan,

²⁶Issakhar ca rhoek kah koca lamloh Azzan capa khoboei Paltiel,

²⁷Asher ca rhoek kah koca lamloh Shelomi capa khoboei Ahihud,

²⁸Naphtali ca rhoek kah koca lamloh Ammihud capa khoboei Pedahel saeh,” a ti nah.

²⁹Te rhoek te Kanaan khohmuen ah Israel ca rhoek phaeng sak ham BOEIPA loh a uen.