YAASINƆ 8:19-35

¹⁹Nɛ́ kũ madì ińnɛ sã̀na de wura manala, karana kũ madì kɛńnɛ de andurufu swáswala.

²⁰Má tɛ́ yã mana zɛ́n, madì táa o zɛ́ súsu gũn.

²¹Madì gbɛ̃ kũ ò yemainↄ gba pↄ́, madì ń aruzɛkɛkatɛkinↄ pańnɛ.

²²Dikiri ma kɛ a zĩ naanagↄrↄa, ari àgↄ̃ gɛ́ yã kũ à kɛ̀ zaa káakunↄ kɛ.

²³À ma ditɛ zaa káakumɛ, zaa a naana gↄrↄa, de adi andunia kɛ kↄ̀ro.

²⁴À ma i zaade ísira kunlo, ísɛ̃boki ke kun gↄrↄ kũ̀aro.

²⁵À ma i kpinↄ ã, ari àgↄ̃ gɛ́ sĩ̀sĩnↄ zĩni pɛ́tɛ,

²⁶ari àgↄ̃ gɛ́ andunia kátɛ, ke sɛ̃̀ntɛ ke bùsu wɛ́n do.

²⁷Kũ àtɛn pↄ́ kũ ò kú musunↄ kɛ, kũ àtɛn sarapura da ísirala,

²⁸kũ àtɛn legũ na musu, kũ àtɛn zĩtɛ í zɛ́ fↄ̃,

²⁹kũ àtɛn ísira lɛ́zɛki kɛ de a í sún vĩalaro, kũ àtɛn andunia kátɛ, má kú gwe.

³⁰Má kú a sarɛ ↄzĩkɛri mana ũ, ma pↄ dìgↄ̃ nna a arɛ lákũ gu dìgↄ̃ dↄ nà, madìgↄ̃ pↄnna kɛ kãao gↄrↄ sĩnda pínki.

³¹Ma pↄ dìgↄ̃ nna Dikiri anduniaa, bisãsirinↄ de ma pↄnnakɛbↄ ũ.

³²Tera sà, ma nɛ́nↄ, à ma yã ma, arubarikaden gbɛ̃ kũ à ma zɛ́ kũna ũ.

³³À ma lɛ́damma ma à ↄ̃ndↄ̃ kũ, àsun pã kpáiro.

³⁴Arubarikaden gbɛ̃ kũ àtɛn sã kpá ma yãi ũ kũ àdigↄ̃ ma wɛtɛ ma kpɛ́lɛlɛa, kũ àdigↄ̃ ma dã gↄrↄ sĩnda pínki.

³⁵Zaakũ gbɛ̃ kũ à ma e wɛ̃̀ndii è, anigↄ̃ nna kũ Dikirio.