YAASINƆ 26:2-18

²Lán kíkoia kↄ̃n taakasoo ègↄ̃ vĩavĩa à gá kɛ̀ à su kɛ̀ nà, lɛn gbɛ̃kana pãa è pↄ́ke woḿmaro lɛ.

³Gezee nɛ́ sↄ̃ pↄ́mɛ, flã̀ nɛ́ zaaki pↄ́mɛ, yↄ̃nkↄↄ pↄ́n gò ũ a kpɛɛa.

⁴Ǹton we yↄ̃nkↄↄla a faasaikɛɛaro, lɛ ǹton gↄ̃ lán à bàro yãnzi.

⁵Ǹ yã we yↄ̃nkↄↄla a faasaikɛ lɛ́n, lɛ àton a zĩnda gwa ↄ̃ndↄ̃dee ũro yãnzi.

⁶Tó n lɛ́kpãsã kɛ̀ yↄ̃nkↄↄ gãzĩ, n n zĩnda yàkamɛ, n yã wɛ̀tɛ n zĩndanɛ.

⁷Yáasi kɛ̀ kú yↄ̃nkↄↄ lɛ́n dɛ lán ɛrɛ gbá kɛ̀ e gbãkɛɛ bàmɛ.

⁸Bɛ̀ɛlina yↄ̃nkↄↄnɛ dɛ lán gbɛ̀dana gbɛ̀mban bà.

⁹Yáasi kɛ̀ kú yↄ̃nkↄↄ lɛ́n dɛ lán lɛ̀ kɛ̀ dana wɛ̃dɛri ↄzĩ bàmɛ.

¹⁰Gbɛ̃ kɛ̀ yↄ̃nkↄↄ ke gbɛ̃ gɛ̃̀zɛ́laa dà zĩin dɛ lán tofekari kɛ̀ è nↄ̀bↄ píngi gbãa bàmɛ.

¹¹Yↄ̃nkↄ ɛarana a yãfaasaikɛnaa dɛ lán gbɛ̃ɛ kɛ̀ ɛ̀ara a pisizi bàmɛ.

¹²N gbɛ̃ kɛ̀ à a zĩnda dìɛ ↄ̃ndↄ̃dee ũu èↄ́? Yↄ̃nkↄↄ sã̀ↄ dɛàla.

¹³Mɛadee è be: Músu kú zɛ́mmɛ, nↄ̀bↄ pãsĩ tɛ́ gãaɛ.

¹⁴Lán gbà ègↄ̃ nigãa a sigbea nà, lɛn mɛadee ègↄ̃ liɛliɛ a daɛkiia lɛ.

¹⁵Mɛadee è ↄ gɛ̃ taan à fua à pↄ́blee lí à da a lɛ́n.

¹⁶Mɛadee ègↄ̃ daa a ↄ̃ndↄ̃ↄ dɛ yãwenladↄ̃ri gↄ̃ↄn swɛɛplaaanↄla.

¹⁷Gbɛ̃ kɛ̀ vĩ̀ à pɛ̀ɛ danↄ lɛokpakↄ̃an dɛ lán gbɛ̃ kɛ̀ gbɛ̃ɛ kũ̀ a swãa bà.

¹⁸Gbɛ̃ kɛ̀ à a gbɛ̃daaa sã̀sã gbasa à bènɛ: Mɛ́ɛ fàadi boomɛ dɛ lán bã̀ndee kɛ̀ e kà tɛ́dee kↄ̃n kà sɛwɛɛdeeo zuuńzi bàmɛ.