Erubasa 26:2-18

²Kenà ed-utengan te rawak is etew he wazè din salà. Iiring dà heini te tagbis he edlayang, iyan kenà edlatun.

³Kinahanglan he edlegkuten wey ebusalan is kudà wey asnu. Iring din is tulebung, kinahanglan he ebpigahan.

⁴Kinahanglan he kenè nu tevaka is tulebung emun tinulebung is kebpekidlalag din kenikew, su kela ke mekeiring ka kandin.

⁵Piru meupiya zaan ke edtevaken nu sikandin, su para metueni zin he kenà sikandin uluwanen sumalà is diyà te isip din.

⁶Is etew he idsarig din diyà te tulebung is kegketudtula te ibpesavut din, ne iring dà te edtempezen din is paa zin su samuk is egkeperateng din.

⁷Is erubasa he egkeǥiyen te menge tulebung ne wazè din pulus iring te paa te pigket.

⁸Kelelelungan emun idhiket nu ziyà te petik is batu; iring din daan is kedeliǥa te tulebung.

⁹Is erubasa he egkeǥiyen te menge tulebung ebpekezezaat iring te zuǥiyen he menge rasang he egewezan te langut.

¹⁰Kelelalung heeyan emun ebpenaan nu is minsan hentei; iring din ke ibpeterebahu nu is minsan hentei he tulebung he edsaǥad.

¹¹Is asu, egkeenen din is ingkeutè din, iring te tulebung su ed-umanan din gihapun ebeeli is mezaat he vaal zin.

¹²Deyzey pa is egkepengkusan te tulebung he etew, kenà is etew he kunaan din ke uluwanen sikandin.

¹³Is tepulan, iyan kun kenè din igawasgawas dutun te valey su egkahandek kun sikandin he egkeizen te erimaung.

¹⁴Is tepulan he etew ne ebelvelikid dà diyà te katri zin iring te lekeb he egketulung egkewangigwangig is bisagra zin.

¹⁵Duen tepulan he menge etew he minsan is kedsungit dan te keenen ne igkepeǥuli zan.

¹⁶Is tepulan, egkeisip din he metau pa sikandin kenà is pitu he etew he utew hustu is kegketevaka zan te id-insà diyà te kandan.

¹⁷Is kebpesahugsahug te kesevaan te zuma; iring te ked-apul te ebpemengaǥat he asu pinaaǥi te kegewezi te telinga zin.

¹⁸Is etew he ebinuangan din is duma zin, ne egkeǥiyen din he suyat din dà haazà, iring sikandin te ebuneǥen he henduen te edriyubriyub he vala te panà is ibpanè din he ebpekepatey.