YAASINƆ 1:7-22

⁷Vĩnakɛna Dikirinɛɛmɛ dↄ̃na naana ũ, ama yↄ̃nkↄ dì ↄ̃ndↄ̃ kũ lɛ́dammao gya bo.

⁸Ma nɛ́, ǹ n de yã'onnɛna ma, ǹsun pã kpá n da lɛ́dammairo.

⁹Anigↄ̃ de fùra mana ũ n mìia, anigↄ̃ de mↄ̀wakarɛ ũ n wakaaa.

¹⁰Tó durunnakɛrinↄ tɛni n laakari gátɛ, ǹsun wero, ma nɛ́.

¹¹Òdi pi: Ǹ mↄ́ ò gɛ́ gbɛ̃nↄ dãdã ò ń dɛdɛ, ò taarisaridenↄ kpákpa ò ń kũkũ.

¹²Ò ń mↄ́mↄ bɛ̃nɛ lákũ mira dì kɛ nà, ò ń mↄ́ vãni lákũ gyãwãn dì kɛ nà,

¹³óni pↄ́ ↄgↄde buri sĩnda pínki le, ó kpɛ́nↄ ni pa kũ pↄ́ kũ o nàkↄ̃anↄ.

¹⁴Ǹ mↄ́ ò ó baka kakara, ó pínki ó ↄgↄsↄ̃nↄ nigↄ̃ dokↄ̃nↄ.

¹⁵Ma nɛ́, ǹsun gɛ́ kũńworo, ǹsun zɛ́ sɛ́ kũńworo.

¹⁶Zaakũ òdigↄ̃ lika kũ yãvãnikɛnaao, ò wãna kũ gbɛ̃dɛnaao.

¹⁷Bàkpakpana bãnↄ wára bi yã pãmɛ.

¹⁸Òtɛn tankutɛ kpákpa ń zĩdanɛmɛ, ń toke mɛ́ à ń para.

¹⁹Ɔgↄvãniwɛtɛrinↄ zian gwe ń pínki, ń lukana pↄ́i mɛ́ àdi ń wɛ̃̀ndi bo.

²⁰Ɔ̃ndↄ̃ tɛn wiki lɛ́ gãnulɛa, a kòto dↄ zɛ́dan.

²¹Àtɛn lɛ́ zu zɛ́ kũ òdi kↄ̃ kakaran lɛ́a, àtɛn kpàkpa kɛ wɛ̃tɛ bĩnilɛnↄ gũn à pi:

²²Ɔ̃ndↄ̃saridenↄ, ánigↄ̃ kun kũ ↄ̃ndↄ̃sarikɛo ari bↄrɛɛ? Lalandikɛrinↄ, áni ma fobona tó bↄrɛɛ? Yↄ̃nkↄnↄ, ánigↄ̃ zã dↄ̃nan ari bↄrɛɛ?