Sandane 2:3-21

³xa i xaxilimayaan fen, i yi i xui ramini a famun feen na,

⁴xa i a fen alo gbetina, i yi a xɔn fen alo nafulu luxunxina

⁵nayi, i Alatala yɛɛragaxun famuma nɛn i yi Ala kolonna sɔtɔ.

⁶Amasɔtɔ Alatala nan fekolonna fima, kolonna nun xaxilimayaan fataxi a falane nan na.

⁷A muxu faɲine malima, naxanye sigan tima fɛtareyani, a ne yɛ masansanma alo wure lefana e rabilinni.

⁸Naxanye sigan tima tinxinni, a ne ratangama. A yi a muxu tɔgɔndiyaxine kantan.

⁹Xa i n xuiin namɛ, i tinxinna nun kiti sa kɛndɛn nun fe faɲin nun kira faɲin birin famuma nɛn.

¹⁰Amasɔtɔ fe kolonna luma nɛn i yi, kolonna yi i nii yifan i ma.

¹¹I na feene yɛ fen, na i ratangama nɛn famun yi i kantan.

¹²E yi i xunba kɛwali ɲaxin kiraan ma, e i ratanga wuledene falane ma

¹³naxanye kira tinxinxin beɲinma e siga kira yidimixine xɔn

¹⁴naxanye sɛwan fe ɲaxin ligadeni, e yi ɲaxan fe ɲaxin na tinxintareyani

¹⁵naxanye sigati ki mi tinxin, e kɛwanle kobi.

¹⁶I xunbama ɲaxalan yalunxin yii na kii nin. Muxu gbɛtɛna ɲaxanla mi nɔɛ i rakunfɛ fala ɲaxumɛne ra,

¹⁷ɲaxanla naxan bata a mɛ a xɛmɛn na a dɔxɔ xɛmɛn naxan xɔn a sungutun waxatini a yi ɲinan na futu layirin xɔn a naxan xidi Ala yɛtagi.

¹⁸A kɛwanle findima bɔnɔn nan na a ma, a sigati kiin yi a xali sayani.

¹⁹Naxan na siga a konni, na mi fa xɛtɛma a mi fa nii rakisin kiraan masɔtɔma mumɛ!

²⁰I sigama muxu faɲine kiraan xɔn na kii nin, i lu tinxinyaan fari.

²¹Amasɔtɔ muxu faɲine siimayaan sɔtɔma nɛn yamanani. Fɛ mi muxun naxanye ra, ne luma nɛn yamanani.