Sandane 29:3-21

³Fe kolonna rafan muxun naxan ma na a baba rasɛwama nɛn. Koni naxan biraxi yalundene fɔxɔ ra, na bɔnɔma nɛn a sɔtɔ seene yi.

⁴Mangana a yamanan nasabatima kiti kɛndɛn nan xɔn, koni naxan dimi yi seene rasuxuma mayifuni, na a kalama nɛn.

⁵Naxan na a adamadi boden matɔxɔ wuleni, na lutin nan natima a sanna bun.

⁶Muxu ɲaxina matandine findixi luti ratixin nan na a xa, koni tinxin muxuna a sɛwa xuini tema nɛn.

⁷Tinxin muxun sɛnbɛtarene xun mayɛngɛ kitine kolon. Koni muxu ɲaxin mi na xaxinla sɔtɔma.

⁸Magele tiine taani maxama nɛn, koni fekolonne xɔlɔn nan naxunbelima.

⁹Fekolonna nun xaxilitaren na so kitini, xa a xɔlɔ hanma xa a gele, a mi xaxili sa sɔtɔma.

¹⁰Sɔntaren mi rafan faxa tiin ma, koni muxu faɲine sɔntaren niin nakantanma nɛn.

¹¹Xaxilitarena kui feene birin falama nɛn, koni fekolonna tan e ramarama nɛn.

¹²Mangan na a tuli mati wule falane ra, a kuntigine birin findima muxu ɲaxine nan na.

¹³Yiigelitɔɔn nun ɲaxankata tiin naralan fe kedenna ma, Alatala nan e firinna birin yɛɛne rabima.

¹⁴Mangan naxan sɛnbɛtarene makitin lannayani, na mangayaan luma sabatɛ nɛn han habadan.

¹⁵Bosaan nun maxadi falane nan fe kolonna fima diin ma koni diin naxan luxi a yɛtɛ ma, na a nga rayagima nɛn.

¹⁶Muxu ɲaxine na wuya ayi, hakɛn nan gboma ayi. Koni tinxin muxune ne biraden toma nɛn.

¹⁷I na i ya diin xuru, a bɔɲɛ xunbenla fima i ma nɛn, a nii yifanna fi i ma.

¹⁸Xa Alaa fe mi makɛnɛn yamaan xa, e mi fa danma fe yo ra. Sɛwan na kanna xa naxan na sariyan suxu!

¹⁹Konyin mi maxadima falane gbansanna ra, bayo hali a mɛ, a mi a suxɛ.

²⁰I na muxun to naxan falan tima benun a xa a miri, yigin xaxilitaren ma dangu na kanna ra.

²¹Naxan na fan a walikɛɛn na ɲaxi ra a dii ɲɔrɛyani, dɔnxɛn na a sa findima finsiriwanla nan na.