Sandane 28:10-18

¹⁰Naxan na muxu faɲine xali kira ɲaxin xɔn, na biran yinla nan na a naxan gexi. Koni fɛ mi naxan na, na hɛrin nan sɔtɔma a kɛɛn na.

¹¹Nafulu kanna a mirixi nɛn a fe kolon, koni yiigelitɔ xaxilimana a kɛɲaan nakɔrɔsima nɛn.

¹²Tinxin muxune na nɔɔn sɔtɔ, binye gbeen na a ra, koni xa muxu ɲaxine keli, birin a luxunma nɛn.

¹³Naxan na a hakɛne luxun, na mi hɛrin sɔtɔma. Koni naxan na a ti e ra, a xɛtɛ e fɔxɔ ra Ala kininkininma na ma nɛn.

¹⁴Sɛwan na kanna xa naxan gaxun Ala yɛɛ ra, koni naxan na a bɔɲɛni xɔdɔxɔ na birama tɔrɔni.

¹⁵Yatan naxan wurundunma e nun kanko gbeen naxan fɔnma muxun ma, na luxi nɛn alo muxu ɲaxina yama sɛnbɛtaren xun na.

¹⁶Manga xaxilitaren tinxintare wanle wuya. Koni hɛrisigɛn naxan sɔtɔxi wulen xɔn, na raɲaxu naxan ma, na siimayaan xunkuyama ayi nɛn.

¹⁷Faxa ti goronna muxun naxan xun ma, na a gima nɛn han a sa a gaburun li. Muxu yo nama a rati!

¹⁸Naxan na sigan ti fɛtareyani, na kisima nɛn. Koni naxan na tinxintareyaan liga, a kira firinna suxu na birama nɛn na nde kedenna xɔn.