Sandane 14:14-32

¹⁴Dɛnkɛlɛyataren wasama nɛn a kɛwanle tɔnɔn na, koni muxu faɲin fisa a xa.

¹⁵Fe kolontaren la fena ngaan na, koni xaxilimana a mirima nɛn a sigati kiin ma.

¹⁶Fekolonna gaxun fe ɲaxin na nɛn, a masiga a ra, koni xaxilitaren susuma a ra nɛn, a so a yi.

¹⁷Naxan xɔlɔn mafurɛn, na xaxilitareyaan nan ligama, kɔtade ɲaxin naɲaxu muxune ma.

¹⁸Kɔmɔyaan nan fe kolontarene yii e kɛɛn na, koni kolonna luxi alo xaxilimane mangaya taxamaseri kɔmɔtina.

¹⁹Muxu ɲaxine e mafelenma muxu faɲine nan bun ma, fe ɲaxi rabane yi lu tinxin muxune dɛɛn na.

²⁰Yiigelitɔɔn naɲaxu hali a lanfane ma, koni nafulu kanna xɔyine wuya.

²¹Naxan a adamadi boden naɲaxuma, hakɛ kanna nan na ra. Koni sɛwan na kanna xa naxan kininkininma yiigelitɔne ma.

²²Naxanye fe ɲaxini tɔnma, ne mi lɔma ayi ba? Koni naxanye fe faɲin mirima, hinanna nun lannayaan ne nan xa.

²³Tɔnɔn wali xɔdɛxɛ birin yi koni falan gbansanna fama yiigelitɔyaan nan na.

²⁴Nafunla luxi nɛn alo fekolonne mangaya taxamaseri kɔmɔtina, koni xaxilitarene daxuyaan naɲanma daxuyaan nan ma.

²⁵Sere ɲɔndi falan muxune niine rakisima, koni wule seren yanfan nan soma.

²⁶Naxan gaxuxi Alatala yɛɛ ra, na ratangaxi, yigiyadena a diine xa.

²⁷Siimayaan binla nan Alatala yɛɛragaxun na, a muxun bama nɛn sayaan lutin na.

²⁸Yamaan na gbo ayi, mangana binyen nan na ra, yamaan na xurunɲɛ ayi, kalan nan na ra mangan ma.

²⁹Naxan diɲa, na famunna gbo. Koni naxan xɔlɔn xulɛn, na a xaxilitareyaan nan mayitama.

³⁰Bɔɲɛ xunbenla nan kɛndɛyaan na fatin xa. Koni xɔxɔlɔnna findixi furen nan na fatini.

³¹Naxan na sɛnbɛtarene ɲaxankata, na e da mangan nan naɲaxuxi. Koni naxan na hinan tɔrɔ muxune ra, na bata Ala binya.

³²Muxu ɲaxina wali ɲaxin nan a rabirama, koni hali sayaan tinxin muxun li, a yigiyaden sɔtɔma nɛn.