Sandane 11:2-21

²Wason fama maraɲaxun nan na. Koni yɛtɛ magodon fama fe kolonna nan na.

³Muxu faɲine fɛtareya wanle nan e tima kira faɲin xɔn. Koni yanfantenne tinxintareyaan nan e halagima.

⁴Sese mi nafunla ra Ala kiti sa lɔxɔni. Koni tinxinna nan muxune xunbama sayaan ma.

⁵Sɔntarene tinxinyaan nan e kiraan fixama. Koni fe ɲaxin nan muxu ɲaxin nabirama.

⁶Muxu faɲine tinxinyaan nan e xunbama, koni kunfa ɲaxine findima luti ratixin nan na yanfantenne yɛɛ ra.

⁷Muxu ɲaxin na faxa, a yigin birin bata kala, a xaxili tixi sɛnbɛn naxan na, na bata lɔ ayi.

⁸Muxu tinxinxin xunbama nɛn a tɔrɔyani, na tɔrɔyaan yi sa muxu ɲaxin sɔtɔ a funfuni.

⁹Ala kolontarena a adamadi bodene halagima a fala xuiin nan na. Koni tinxin muxune xunbama e fe kolonna nan xɔn.

¹⁰Xa tinxin muxune sɛwa, taan birin nan ɲaxanma. Koni muxu ɲaxine na faxa, ɲaxaɲaxan nan na ra.

¹¹Taan sabatima muxu faɲine duban nan xɔn. Koni a kalama nɛn muxu ɲaxine dɛ xuiin ma.

¹²Naxan na a adamadi boden naɲaxu, na xaxili mi na. Koni xaxilimana a dunduma nɛn.

¹³Mafala tiin wundo feene nan naminima kɛnɛnni. Koni lannaya muxuna e ramarama nɛn.

¹⁴Xa maxadin mi na, yamaan birama nɛn. Koni kisin na a ra xa kawandi muxune wuya ayi.

¹⁵Naxan na a bodena donla goronna tongo, na tɔrɔma nɛn yati. Koni naxan na tondi na dɛ xui sifane ma, na kanna luma makantanna nin.

¹⁶Ɲaxalan faɲin binyen nan sɔtɔma. Koni xaɲɛden tan nafunla nan sɔtɔma.

¹⁷Lannaya muxuna a yɛtɛ nan malima. Koni kininkinintarena a yɛtɛ nan tɔrɔma.

¹⁸Muxu ɲaxine walima nɛn fuu! Koni naxan na tinxinyaan liga, na saran kɛndɛn nan sɔtɔma.

¹⁹Tinxinyaan fama nii rakisin nan na. Koni naxan na lu fe ɲaxin fɔxɔ ra, na faxama nɛn.

²⁰Muxu bɔɲɛ ɲaxine mi rafan Alatala ma. Koni fɛ mi naxanye sigati ki ra, ne nan a kɛnɛnxi.

²¹Muxu ɲaxine saranma nɛn e kɛwanle ra. Koni tinxin muxune xunbama nɛn.