1Hein minatey en si Saul midlikù ensi David diyà te Ziklag te nezaag dan en dutun is menge Amalikanhen. Dezuwa he andew sikandan dutun te Ziklag.
2Iketelu he andew, zuen nekeuma zutun te Ziklag he etew he ebpuun diyà te kampu ni Saul, he nengevindas is kumbalè din, ne nepurung te eliyavuk is ulu zin su ibpeehè din he edlalew sikandin. Midhendiyà sikandin te ki David ne midluhud su edtahud kandin.
3Mid-insaan sikandin ni David te, “Hendei ke ves ebpuun?” Midtavak sikandin te, “Mibpelaǥuy a puun te kampu te menge Israilihanen.”
4Mid-insaan ni David te, “Maan, hengkey ves is neulaula? Tezemi a.” Migkaǥi sikandin te, “Nemelaǥuy en is menge sundaru te Israel dutun te tebek. Utew mezakel kandan is nengepatey, apil en si Saul wey is anak din he si Jonatan.”
5Mid-insà si David, “Maan is netuenan nu he minatey en si Saul wey si Jonatan?”
6Midtavak haazà is menguhed pa he etew te, “Hein diyè e pa te Buntud he Gilboa, ne neehè ku si Saul zutun is nesendiǥan din dà is bangkew zin. Ne is menge kuntada zin ne mid-uvey en diyà te kandin is ed-untud te menge kerwahi wey menge kudà.
7Kedlingì din ne neehè e zin ne mid-umew e zin. Midtavak a te, ‘Hengkey is igkeuǥup ku kenikew?’
8Mid-insaan e zin ke hentei a. Midtavak a te Amalikanhen a.
9Ne migkeǥiyan e zin te, ‘Uvey ka kayi wey a himetayi en, su henduen be te ibpatey ku en heini is palì ku.’
10Ne mid-uvayan ku sikandin ne midhimetayan ku su netuenan ku he kenè en sikandin dutun egkeuyag te palì din. Ne migkuwa ku heini is kuruna te ulu zin wey rintì din, ne mid-uwit ku kayi te kenikew, datù.”
11Dutun mibindas ni David wey te langun he menge sakup din is menge kumbalè dan su ibpeehè dan is kedlalew zan.
12Nemenineǥew zan wey mibpuasa taman te mezukilem su midruǥur zan ki Saul, wey te anak din he si Jonatan, wey te nasyun he Israel, he menge etew te Nengazen, su utew mezakel kandan is nengepatey te tebek.
13Ne mid-umanan insai ni David haazà is betan-en he mibpenudtul kandin te, “Hendei ka ed-ubpà?” Midtavak sikandin te, “Amalikanhen a he ziyà med-ubpà te tanè niw he Israel.”
14Mid-insaan ni David te, “Maan is wazè ka mahandek he edhimatey te hadì he pinilì te Nengazen?”
15Migkeǥiyan ni David haazà is Amalikanhen te, “Iyan ke zà hinungdan te kemetayen nu. Iyan ka nenistiǥus te keugelingen nu he iyan ka iyan midhimatey te pinilì te Nengazen he hadì.” Ne migkeǥiyan ni David is sevaha te menge sakup din te, “Hengkayi ka, himetayi nu heini!” Ne zutun midhimetayan din.
17Migarey si David te penhulùhulù te kedlelawi zin ki Saul wey te anak din he si Jonatan,
18ne insuǥù din he ibpenurù heini ziyà te menge meǥinged te Juda. Migngezanan heini te Kanta te Kedlalew, ne insurat heini ziyà te libru ni Jashar. Iyan heini penhulùhulù din:
19“Menge Israilihanen, nemematey en is dungganen he menge pengulu ziyà te menge vuvungan te Israel. Nemematey en daan is memevurut he sundaru niw!
20Kenà heini tudtula ziyà te inged he Gat, minsan diyà te menge zalan te inged he Ashkelon, su kela ke ikelipey zà heini te menge vahi te menge Filistihanen he wazà mekekilala te Megbevayà.
21Berakat he wazè en uzan wey ke zehemug be, ziyà te menge vuntud he Gilboa wey verakat daan he wazè en edtuvù he menge pinemula ziyà te menge vevesukà kayi para idhalad te Megbevayà. Su keniyan buringi te menge kuntada is kelasag te mevurut he hadì he si Saul. Ne wazè en melenahi heini he kelasag para mebmetilak.
22Pinaaǥi te ispada ni Saul wey te panà ni Jonatan, mezakel is nepatey zan he memevurut he menge kuntada zan.
23Utew mibmahal te menge Israilihanen si Saul wey si Jonatan su nesuatan dan sikandan. Wazè dan mekedsuwey taman te kemetayen dan. Diyà te tebek, henduen be te meǥaan pa sikandan te vanug wey mezesen dan pa te erimaung.
24Sikiyu is menge vahi te Israel, rurun kew para ki Saul. Su tenged kandin nekevivisti kew te mahal he visti wey menge elahas he vulawan.
25Nemematey en is menge memevurut he sundaru te Israel te tebek. Minatey en si Jonatan diyà te menge vuvungan.
26Utew mesakit is gehinawa ku tenged kenikew, Jonatan, he suled ku! Pelanggè ku utew sikew, su is kebmahala nu kedì, ne lavew pa te kebmahal nu te menge vahi.
27Nemematey en is memevurut he menge sundaru te Israel. Is menge ǥumaan dan ne nengetazin en.”
