1Devit te aga ami dabe dali, augwaligo te Amalek dabe dali wąbi hwįani. Augwaligo te Amalek dabe aiyaba elalubo si da, teda augwa te Siklak taunba ma geasa solama, tama si sogo bidali. Te sogo te king Sol isalio.
2Tama te sela sogo wabode te gesi ogwa bidi me deli te Siklakba sabolali. Agai te aga ugwa pisilama, tama aga tobolude te tǫ piali, te aga homu dene ebo ola magasiyu tiai. Aga te Devitba pelama, tama kidu sugunama, tama gesabidi tǫba pogulama, Devitba homu dwagi yai ilali. Te bidi te Sol bidali pesage tagalama, asali.
3Tama Devitgo agaba te tiwai hanalu wali, “Nage menadu asaliwe?” Tialima, te ogwa bidigo te po wai, “Te boi bidi dabego te Israel dabe dolobaso, tama ena te bidali pesage taga soyu, tama nageba wi asai dao,” wali.
4Tama Devitgo agaba hanalu wali, “Eno homugo nago te hwįani sęde po enabolo pusumainu homu ebao,” wali. Tama te gesi bidigo te po wali, “Te Israel ami dabe te hwįbaso wi sobadi, tama te Filistia ami dabego te bidi dabe augwali hauwa ela muanio. Tama king Sol dali, te aga ogwa Jonatan me, te augwali si me isalio,” wali.
5Tialima, Devitgo agabolo hanalu wali, “Mena tama tilama te Sol de Jonatan si isali, te nago koneaniwe?”
6Tama te gesi ogwa bidigo te po wali, “Ena te Gilboa bulu dude bidiyu, tama eno suali, te Solgo aga sesemone te tǫba dodolama, tama aga digi te sesemone enede tialuainu dąų walubo sę eyu tonaluai. Tama me te boi bidi dabe te Sol pąba pabo sę iduali, te karisde dugawali ami dabe, me te hosde dugawali ami bidi dabe, augwaligo te tiwai yali.
7Tama Sol begelama, tama ena sulama, te ena i wali. Tama eno te po wali, ‘Awe, genuai bidio,’ wali.
8Tama agai enabolo te tama po hanalu wali, ‘Nage mena badu bidi dawe?’ Tama eno te po wai, ‘Ena te Amalek bidi me deli dao,’ walio.
9Tialima, agai te tiwai po enabolo wai, ‘Te boi bidi dabego ena doliyu, dwai mu elama, tama pąde ena isainu ebao. Nage polo asu, tama ena silagasao,’ walio.
10Eno agai po odobo si da, teda ena aga pąba pelama, tama aga ela muanio, magi baso meni, eno koneani, te aga nogogo tolaluali te sesemone ene tagalu da, te aga tǫba degasa dulubaso da, teda aga mu isaibao wai. Aga isibo si da, teda eno aga tobolude muani te kingo madi me sobadi, te nogode muani nogo mǫ me siyu elama, tama eno sesalio. Genuai bidi, te e doado bage eno nageba mawainu ebao,” te gesi bidigo te po wai.
11Devitgo te po odama, tama aga haliga sęgę mu elama, tama aga ugwa pisa yali. Tama aga ami bidi dabego me te tobage deli kolesaga tiwai naga yalio.
12Augwaligo te Sol, me Jonatan, me te gasa Israel dabede homu kone paliyu tiali, te augwali Genuai Bidigo hani bage da homu elama, tama augwa te augwalide homu dene ebo gela weyu, tama nai habu selalubadi, te giliga dega sigulali. Magi baso meni, te hwįani madigi te bidi hauwa isai.
13Tama Devitgo te gesi ogwa bidiba te tiwai po hanalu wali, “Nage mena badu bulu bidi dawe?” Tama agai te po wai, “Ena te Amalek bidi deli da, tiali goli polobadu digi eno ayago te Amalek dabego bulu tagalama, Israel tǫ pedaiba gudasa soai dao,” wali.
14Tialima, Devitgo agaba ma hanalu wali, “Magi baso yaliwe? Te Genuai Bidigo sa muyu nigilali bidi, te king elibo te nage wi dwasianu me isiąyu yali, agawe?”
15Tama Devitgo aga ami bidi me deli i olama, asobo side, tama agabolo te tiwai po walali, “Te bidi ela muao,” wali. Tialima, te Devitgo ami bidigo te bidi te bainat hwągo togolama tama te bidi isalio.
16Magi baso meni. Tama Devitgo te Amalek bidibolo tama te po hasia bolo walio, “Te naga digi yali sęgo, te nage isaibao. Naga digi nago te Genuai Bidigo sa muyu nigilali king ela muani po te hanilama pusali dao,” wali.
17Devitgo te homu dene ebo balia po te Sol de aga ogwa Jonatan side wai dao.
18Tama Devitgo te Juda we bidiba te balia po usu somainu ebo po wali. Te baliago nogi te Balia Enesigi poali. Tama augwa te Doloba Pai Bidi Dabego bukude asęani. Devitgo te balia po te tama tiwai wai dao.
19“Te da Israelgo polaluali bidi dabe te bulu dude isalio. Te dago bomai ami bidi dabe te isali dao.
20Dagego te tiali sę po munu me te Get taunde me, ma te Askelon taun sunumide me pusulamuo. Tiyu, te Filistia dabego we dabego odoyu, tama augwali wiegi yai homu pemene yabuo. Tiyu, te Genuai Bidigo po odisąbo bidigo wegi manigo te augwa bugai haliga mu yabuo.”
21“Te dago bomai ami bidi dabe te Gilboa bulu dude isalio. Tama te hwįani sabele dabe te bulu du dabede olo munalubo. Tama te Solgo sabele me te olo munalu, tama augwaligo me mubeo. Tama tibaso, eno homugo te hulide tulubo tulubage segeni wę, me tulubage te bulu duba munu ma tulumainu me egobeo. Tama nai me te tǫde munu ma pedalumainu me egobeo.”
22“Te Jonatango enesigi te nai dwai mu elaluali. Te munu me geda musiąwai. Tama te Solgo bainat hwą te olo me munalubeo. Menio. Te bainat hwągo te bomai ami bidi dabe eliyu, tama te boi bidi dabego kaneme tede pągąnaluai dao.
23Te Israel aga hanigo bidigo te Sol de Jonatan si godolo homu mu eyu yai. Augwali si te wiegi yai bidi mu dao. Te sesemane sogo augwa si bugagia mu kisasa bilama, tama augwa si isali me te kisalubadi isalio. Augwali si te polo asesa mu udayu, te boi bidi dabe pobeasa pali, tama te ba kemodagego te hasa dabe ela tuainu pobebo te aiyaba mu elaluali. Tama augwali sigo bomogo te laiongo bomo aiyaba elaluai dao.”
24“Dage te Israel we dabe, dagego te Solde homu dene ebo gela waiąo. Agai dageba te sawi yai mama ugwa te gasagi yai mu mani, tama te dage au yabo te tobage gol dabe mawai dao.”
25“Te bomai ami bidi te hwįbode isalio. Tama Jonatan me isali, tama aga tigi te bulu dude munaluai dao.
26Eno ama, Jonatan, nagede eno homu dene mu ebao. Eno nage godolo mu eyu, tama nago ena me godolo mu yai. Nago godolo ebo homu te bomo mu eyu, tama te wego bidi godolo ebo homu te aiyaba elalualio.
27Te bomai ami bidi dabe te hwįani sogo isiyu, tama te hwįbo genuai bage te dolalio.” Devitgo te balia po wai.
