Odommu 5:3-21

³Ti ɑrìmu kɛ̀ diwɛ̀ì nɛ́ ti bo kɛ yɛ̃́ mɛhɑ́ɑ́rìmɛ̀ ti duɔ̀mmɛ̀ mɛwɛ̃́ɛ̃́rìmɛ̀.

⁴Mɛminnímɛ̀ mɛɛ̀ ɔ̃ɔ̃ nte kɛ̀ mɛhɑ́ɑ́rìmɛ̀ ti tùɔ̀kɛní tí nwɛ̃́ɛ̃̀rì. Kɛ̀ mɛwɛ̃́ɛ̃́rìmɛ̀ nte kɛ̀ ti pɛ́tɛ́ ti bɑɑ dɛ̀.

⁵Dɛ kó mubɑ̀rìmù ti bɑɑ mù ɔ̃ɔ̃ í ntì soutɛ́ kɛ yɛ̃́ Muyɑɑ́nsɑ̀ɑ̀mù muù ti bɛnkú kù ti dɔ́mɛ̀.

⁶Ti do í mɔkɛ dìì mɔ̀nnì muwɛ̃rímú kɛ bo dɛɛtɛ́ timɑ́ɑ̀, kɛ̀ Kirisi ku ti yɛi nkpɛ́í nKuyie ntɑ̃ɑ̃tɛ́ dìì mɔ̀nnì.

⁷We mbo yie nkɛ́ kú wèè dɔ̀ɔ̀ri Kuyie ndɔ́mɛ̀ o kpɛ́í? Kɛ̀ dɛ̀ yetɛ ɑ sɑ̀ɑ̀ bo kú mɛsɑ̀ɑ̀ nyiɛ̀ nkpɛ́í nkɛ.

⁸Kuyie mbɛnkɛmu kù ti dɔ́mɛ̀, kɛ̀ Kirisi ku ti kpɛ́í nti tú dìì mɔ̀nnì bɛnitiyɛibɛ.

⁹Bɑ̀mbɑ̀ nho kṹṹ mmɛ ntemɛ̀ kɛ̀ ti wenkɛ, bɑ mbo nte kòò bɑ́ɑ́ ti dɛɛtɛ́nɛ̀ Kuyie nkó kɛmiɛkɛ?

¹⁰Kɛ̀ Kuyie nti tɑunnɛ̀ kumɑ́ɑ̀ ku Birɛ kó mukṹṹ mmiɛkɛ, ti tú dìì mɔ̀nnì mɛyɛi nyɛmbɛ̀, dɛ̀ bo yĩ́mɛ ku Birɛ mɛ nyɑ̃̀ńtɛ́mɛ̀ kɛ̀ kù bɑ́ɑ́ ti dɛɛtɛ́ ti nɑɑ́ ndìì mɔ̀nnì ku kɔbɛ!

¹¹Dɛndɛ kó difɔ̃nkúò, kɛ̀ ti wɛ̃̀tɛ kɛ mɔkɛ diwɛ̀ì kɛ yɛ̃́ nɛ̀ Yesu Kirisi kó mukṹṹ mmiɛkɛ nkɛ nɛ̀ Kuyie nti tɑummɛ̀.

¹²Nɛ̀ onìtì omɑ́ɑ̀ borɛ̀ ndɛ mɛyɛi ntɑnnímɛ̀ kutenkù kumɔu, kɛ̀ mukṹṹ mbuotɛ́ kɛ kɔù bɛnìtìbɛ̀ bɛmɔu, kɛ yɛ̃́ bɛ̀ yetɛ́mɛ̀.

¹³Ikuɔ́ do í bo dìì mɔ̀nnì kɛ̀ mɛyɛi mbomu, ikuɔ́ nɛ́ í mɛ mbomɛ̀ Kuyie nyí mbɛ̀ bekùnɛ̀, kɛ yɛ̃́ bɛ̀ í yɛ̃́mɛ̀ dɛ̀ɛ̀ tu mɛyɛi,

¹⁴kɛ́túótɛ́ Adɑmmu kó dimɔ̀nnì kɛ́tuɔkɛnɛ̀ Mɔyiisi, kɛ̀ mukṹṹ nkɔù bɛ̀ɛ̀ í yetɛ Kuyie nkpɛti Adɑmmu do yetɛ mɛ̀ɛ̀ botí. Adɑmmu do tú dibɛnkɛ̀rì ndi wèè kèríní o kpɛri.

¹⁵Adɑmmu yétímɛ̀ í wɛ̃ńnɛ̀ Kuyie nkó dipɑ̃nnì. Mɔ́mmuɔ nwe onìtì omɑ́ɑ̀ yetɛ́ mɛ̀ɛ̀ kpɛ́í nkɛ kusṹkù kɔ̃mmɛ̀. Nɛ̀ onìtì omɑ́ɑ̀ Yesu Kirisi borɛ̀ ndɛ, Kuyie nti pɑ̃mɛ̀ mɛsɑ̀ɑ̀ nkɛ̀ mɛ̀ dɛu.

¹⁶Dɛ kó mɛsɑ̀ɑ̀ nyí wɛ̃ńnɛ̀ onìtì omɑ́ɑ̀ yétímɛ̀, onìtì omɑ́ɑ̀ yetɛ́ mɛ̀ɛ̀ kpɛ́í nkɛ bɛnìtìbɛ̀ yɑ̀tɛ̀nɛ̀mɛ̀ Kuyie nkɛ̀ kù ti dɔ̀ɔ̀ mɛsɑ̀ɑ̀ nnɛ̀ Yesu Kirisi kpɛ́í.

¹⁷Onìtì omɑ́ɑ̀ yetɛ́mɛ̀ kɛ̀ mukṹṹ ntɑnní kɛ kɔù bɛnìtìbɛ̀, mɛɛ̀ botí nku onìtì omɑ́ɑ̀ Yesu kó mɛsɑ̀ɑ̀ nkpɛ́í nkɛ bɛnìtìbɛ̀ pɛ̀ú mufòmmu, kɛ bo ò wɛ̃nnɛ́nɛ̀ kɛ́di tikpɑ̀tì.

¹⁸N wɛ̃̀tɛ kɛ nɑ́ɑ́mmu kɛ tú onìtì omɑ́ɑ̀ yetɛ́ mɛ̀ɛ̀ kpɛ́í nkɛ bɛnìtìbɛ̀ í nɑɑtinɛ̀mɛ̀ Kuyie. Mɛɛ̀ botí nku onìtì omɑ́ɑ̀ wèè wetí o kpɛ́í nkɛ bɛnìtìbɛ̀ nɑrikɛnɛ̀mɛ̀ Kuyie, kɛ̀ kù bɛ̀ duɔ́ mmufòmmu.

¹⁹Onìtì omɑ́ɑ̀ yetɛ mɛ̀ɛ̀ kpɛ́í nKuyie nkpɛti dɛɛ̀ te kɛ̀ bɛnìtìbɛ̀ bɛmɔu nɑɑ́ mmɛyɛi nyɛmbɛ̀. Mɛɛ̀ botí nku onìtì omɑ́ɑ̀ wèè yie nKuyie nkpɛti ò yó ntemɛ̀ kɛ̀ kùu wénkùnnɛ bɛnìtìbɛ̀ bɛmɔu.

²⁰Ikuɔ́ ɑ̃nnɛ́ kɛ bo fei mmɛyɛi mmɛ kɛ̀ ti yɑ̀ mɛ̀ dɛumɛ̀. Mɛyɛi ndɛu dɛ̀, Kuyie nkó mɛsɑ̀ɑ̀ nhɔ̃ ndɛu kɛ́pɛ̃ɛ̃tɛ́ mɛmmɛ.

²¹Kɛ́ndonnɛ̀ mɛyɛi nkɔùmɛ̀ bɛnìtìbɛ̀, mɛɛ̀ botí nku Kuyie nkó mɛsɑ̀ɑ̀ nti duɔ̀mmɛ̀ mufòmmu Yesu weè te kɛ̀ Kuyie nti wénkùnko.