Roma 5:3-21

³Doen heman doma ingkeluba tadon. Neluba kidon te doen den kelimahan tadon tandà te pegtaking tadon ki Cristo, so pineokit te pegtayod tadon te kelimahan, doen keilingan tadon amon eked kidon dàgi pengkey eden se domateng kenitadon.

⁴Aw meketayod kidon te kelimahan, metaga-taga kidon te egkeluba se Timanem te kenitadon pegpemenal, aw lekat kenyan, netegahan tadon te metoman se egpelimanan tadon.

⁵Eked kidon lengà te pegpemenal. Tomanen te Timanem se egpelimanan tadon, so nedekelan kidon din te pedowan pineokit te Espiritu Santo imbegay din kenitadon.

⁶Kedengan te wedà kidon pa pemenal, neallang kidon te salà. Meneng pegdateng te aldaw pinemallì te Timanem, nematay si Cristo amon megpelowà kenitadon egpekesalà.

⁷Wedad besi otaw meibeg imetayan amon somelilin te doma otaw eg-inang te metòlid. Pilabok besi heman se otaw ontò meibeg imetayan amon somelilin te otaw gayed eg-inang te mèpiya diyà te doma otaw.

⁸Meneng impetaga-taga te Timanem kenitadon te ontò dakel se pedowan din kenitadon, so dalem pa te eg-inang kidon te salà, insogò din si Jesu Cristo aw inimetayan sikandin amon megpelowà kenitadon lekat te pelumun.

⁹Nayan, so inaneng-aneng den te Timanem te metòlid kidon pineokit te pegkematay i Cristo, netegahan tadon den te ontò kidon din ipelowà lekat te pelumun te modi aldaw.

¹⁰Pengkey poon kidon te Timanem, meneng pineokit te pegkematay te Batà din, migsebad kidon den kandin. So migsebad kidon den kandin, yan netegahan tadon den heman te ontò kidon ipelowà lekat te pelumun pineokit te pegkeantay i Cristo lekat te nematay.

¹¹Pengkey meluba kidon so impelowà kidon lekat te pelumun, meneng doen heman keluba te pedowan tadon diyà te Timanem pineokit te Pengolo tadon si Jesu Cristo, so pineokit te ininang din, migsebad kidon den diyà te Timanem.

¹²Gebii, mig-inang se tagnà otaw si Adam te salà, aw yan se keteboan te salà dini te keneyonan. Lekat te salà, doen heman kemetayun. Yan se doun te egkematay se kedita te otaw, so mig-inang se kedita tadon te salà.

¹³Pengkey te wedà pa pegpunù se Timanem te menge punù ingkeliwat i Moises, tapay nekesalà se otaw. Meneng wedà dan eneng-enengi, so wedad pa punù ingkeliwat i Moises.

¹⁴Meneng lekat ki Adam taman te pegkeliwat i Moises te punù te Timanem, migkemematay se kedita te otaw so doen salà ininang dan, pengkey wedà dan lèpangi se punù linèpangan i Adam. Pengkey medaet se ininang i Adam gebii, meneng doen timbang din. Yan se Misiyas pinelimanan din.

¹⁵Medaet se ininang i Adam, meneng ontò mèpiya se imbowang te Timanem. Netegahan tadon te egkematay se kedita te otaw tandà te salà ininang te sebad otaw si Adam. Meneng netegahan tadon te ontò medita se otaw tinebangan te Timanem tandà te ininang te sebad otaw si Jesu Cristo. Yan se mèpiya imbowang te Timanem diyà kenitadon.

¹⁶Medaet se dimateng diyà te otaw tandà te peg-inang i Adam te salà. Meneng ontò mèpiya se dimateng diyà te otaw tandà te pegbowang te Timanem. Pengkey mekesebad si Adam peg-inang te salà, minikagi se Timanem te keilangan ipelumun se kedita te otaw. Meneng pengkey medita se salà ininang te kedita tadon, tinebangan kidon te Timanem, aw minikagi sikandin te eked kidon din pelumuni.

¹⁷Pengkey benal egkematay se kedita te otaw tandà te salà ininang te sebad otaw si Adam, meneng ontò mèpiya se dimateng diyà kenitadon tandà te ininang te sebad otaw si Jesu Cristo. Ontò mèpiya se tabang te Timanem imbowang din kenitadon, sìyan peg-aneng-aneng din te metòlid kidon, so aw kominawà kidon te tabang din sìyan, begayan kidon din te kaling pedowan, aw ipelowan kidon doma din doton te langit.

¹⁸Netegahan tadon den te impelumun se kedita te otaw tandà te peg-inang i Adam te salà, meneng doen kaling pedowan imbegay te Timanem kenitadon aw inaneng-aneng din te metòlid kidon tandà te peg-inang i Cristo te mèpiya.

¹⁹Wedà tolò si Adam te Timanem, aw yan se doun te kinetinan se kedita te otaw te salà. Meneng timolò si Jesu Cristo te Timanem, aw yan se doun te medita se otaw eneng-enengen te Timanem te metòlid dan.

²⁰Impekeliwat te Timanem se menge punù din ki Moises, amon metaga-taga kidon te ontò dakel se salà ininang tadon. Meneng pengkey dakel se salà ininang tadon, labi pa dakel se tabang te Timanem kenitadon.

²¹Pengkey egkematay se kedita te otaw neallang te salà, meneng egtebangan te Timanem se kedita te otaw megpesakop diyà kandin, so eneng-enengen din te metòlid dan. Begayan din dan heman te kaling pedowan wedad temanan pineokit te ininang te Pengolo tadon si Jesu Cristo.