Rom 5:3-21

³Nge sap iei chök, sia pwal pwapwaäsini ach kewe riaföü, pun sia silei pwe riaföü a afisätä ach tipeppos,

⁴nge ach tipeppos a atoto manauöch mwen mesen Kot, nge ach manauöch a afisätä apilükülüköch.

⁵Ei apilükülüköch esap alichipwüngükich, pun Kot a iselong lon letipach an we chen ren ewe Ngünmifel, ewe i a lifang ngenikich.

⁶Pun lupwen sia chüen nom lon ach apwangapwang, lon ena fansoun Kraist a fen mäla fän iten chon föföringau.

⁷A men weires än eman epwe mäla fänäsengesin eman aramas mi pwüng. Eli epwe wor eman epwe tongeni mäla fänäsengesin eman aramas mi aramasöch.

⁸Nge Kot a pwäri ngenikich ükükün an echenikich, pwe lupwen sia chüen nonom lon tipis, Kraist a mäla fänäsengesich.

⁹Iwe, ren chaan sia küna pwüng me ren Kot. Nge epwe le fen ifan me watten an amanauakich seni än Kot song!

¹⁰Me lom kich chon oputa Kot, nge sia chäfengen me Kot ren mälan Nöün we. Iwe, iei sia chäfengen me Kot, nge epwe le fen ifan me watten än Kraist amanauakich pokiten a manausefäl!

¹¹Nge sap iei chök, pwe sia pwal pwapwa lon Kot pokiten ach Samol Jesus Kraist a achäfengenikich me Kot.

¹²Iwe, ren eman mwän tipis a tolong lon fanüfan, nge an tipis a atoto mäla. Iei popun mäla a tori aramas meinisin, pun ir meinisin ra tipis.

¹³A wor tipis lon fanüfan mwen än ekewe Allük resamwo fen wor. Nge ia esap wor allük ie, esap tongeni fis angangen atipisi eman ren allük.

¹⁴Nge seni ewe fansoun Atam tori fansoun Moses, mäla a nemeni aramas meinisin, pwal mwo nge chokewe resap tipis usun Atam lupwen a aleasolap ngeni än Kot we allük. Atam a aliosunätä ewe eman epwe war me mürin.

¹⁵Nge ekewe ruoman ra sokofesen, pun än Kot lifang a sokola seni än Atam tipis. A pwüng pwe chomong aramas ra mäla pokiten tipisin ewe eman aramas. Nge än Kot ümöümöch a fokun watte seni, pwal an we lifang ese kamö a tori chomong aramas ren ümöümöchün ewe eman aramas Jesus Kraist.

¹⁶Iwe, a wor sokofesenin lefilen än Kot we lifang me tipisin ewe eman aramas. Mürin än ewe eman föri ewe eu tipis, Kot a apwüngala pwe “a tipis”. Nge mürin chomong ra tipis, Kot a pwärätä an ümöümöch ngeniir ren an apasa, “Ämi ousap tipis.”

¹⁷A pwüng pwe ren tipisin ewe eman mwän mäla a popuetä le nemenem, pokiten ewe chök eman mwän. Nge epwe ifan me watten ewe feiöch mi fis ren ewe chök eman mwän Jesus Kraist! Iwe, chokewe meinisin mi etiwa än Kot ümöümöch mi somwola me an we lifangen pwüng repwe nemenem lon manauer ren Kraist.

¹⁸Iei mine pokiten ewe eu chök tipis aramas meinisin ra nom fän liwiningauen tipis, ina chök usun ewe eu föförün pwüng a angasala aramas meinisin, a pwal amanaueer.

¹⁹Pun usun aramas meinisin ra tipis pokiten än ewe eman mwän aleasolap, ina chök usun chomong aramas repwe pwal küna pwüng me ren Kot pokiten än ewe eman mwän aleasochis.

²⁰Allük ra fisitä pwe ekewe föför mi mwäl repwe lapala. Nge ia tipis a lapala ie, än Kot ümöümöch a fokun lapalapala seni.

²¹Iwe, usun tipis a nemenem, pun aramas meinisin ra mäla, iei usun än Kot ümöümöch a nemenem, pun aramas ra küna pwüng me ren o i a emwenikich ngeni manau esemüch ren Jesus Kraist ach Samol.