Romu 5:3-21

³Tagrama knafima ufresuta muse hanune. Na'ankure tagra antahi'none, e'i ana knazampina knare hu'neankino taza hanigeta oti hanavetineta ana knazama enerita kazigazi huta vugahune.

⁴Knazama erino kazigazi huno vu'zamo'a tavutava fore higeno, ana zamo'a Anumzamo tavregahie amuhazana eriama nehie.

⁵Hagi amuhama humita avega anteta mani'nona zamo'a, amuhama hu'nazana erinotre. Na'ankure tagra antahi'none Anumzamo'ma Ruotge Avamu tamigeno, avesizama'a Ruotge Avamu'afi huvazino tagu'afi eritagi avinete.

⁶Tagrati'a taza hugara osu'nonkeno, Kraisi'a kumitigura kna fatgo'are efri'ne.

⁷Tamage mago'mo'a fatgo vahekura frisnue huno osugahie. Hagi mago'mo knare'ma hanuno'a, amne knare vahekura frigahie.

⁸Hianagi Anumzamo'a tusiza huno avesirantenea zama eriama hu'neana, kumi vahe mani'nonkeno Kraisina huntegeno, tagri kumiku huno efri'ne.

⁹Hagi Kraisi koramo sese hurantegeta, Anumzamofo avurera fatgo vahe mani nonankino, tamage huno Anumzamofo rimpa hezampintira tavu'vazigahie.

¹⁰Na'ankure Anumzamofo ha' vahekna huta mni'nonkeno, Nemofo frizampi Anumzamo ete mago'ane tazeri mago hu'ne. E'ina hu'neankino Anumzamo'ma rimpa herante'nea zampintira Kraisi asimuteti, tagri'ma taza huno tagu'vazizana erigahune.

¹¹Hu'negu Rantimofo Jisasi Kraisimpi Anumzamofona musena huntegahune. Na'ankure Rantimofo Jisas Kraisimpi ete mago'ane, Anumzamo'a tazeri mago hu'ne.

¹²E'ina hu'negu magoke ne'mo kumi higeno, ama mopafina kumimo'a efre'ne. Kumimo'a friza avareno egeno, frizamo'a ra huno maka vahetera vuno eno hu'ne. Hu'negu maka vahera kumi vahe mni'none. (Jen-Agf 3)

¹³Kumimo'a ama mopafina ko efore hutegeno, henka kasegea zamine. Na'ankure kasegema omneneresina, e'i kumi nehaze huno huozmantesine.

¹⁴Hianagi fri'zamofo hanavemo'a Adamu knaretima eno Mosese knarema ehanati'neana meno e'ne. Adamu hu'neakna kumi osu'nazanki, frike'za hu'naze. Adamu'a henkama Kraisima esia Ne'mofo avame'za efore hu'ne.

¹⁵Hu'neanagi Adamu kumimo'ene, Anumzamofo knare musezamo'enena magoknara osu'ne. Na'ankure magoke ne'mofo Adamu kumimo frizana rama'a vahetera avareno ege'za fri'naze. Hianagi Rana Anumzane, mago nera Jisas Kraisimpi knare asunkuzane kumiti apase atrerante zana tamine.

¹⁶Asunkuzama'afi Anumzamo tami'nea musezamofo raga'amo'a mago ne'mo'ma kumi'ma hu'nea zamofo raga'agnara osu'ne. Na'ankure Adamu kumimo knaza avareno e'ne. Hianagi Anumzamo'ma amne tami'mea musezamo, Anumzamofo avurera tazeri agru hune.

¹⁷Na'ankure magoke ne'mo Adamu kumi higeno, agri kumite fri zamo'a vahera kva'gri zamanteno e'neanagi, Anumzamofo asuntgi'zane fatgo musezama'afi manisamo'za fri zamofone kumimofo hanavea magoke Ne' Kraisi Jisasimpi azeri ageteregahaze.

¹⁸Magokemo Adamu hu'nea kumimo maka vahe'mofontera knazana erino e'ne. Hianagi magoke ne'mo Kraisi fatgo avu'ava hu'neazamo tazeri agru higeta, Anumzamo'enena fatgo huta nemanita, kasefa manizana hakaremota eri'none.

¹⁹Magoke ne'mo ke hantagi'nea avu'avazamo higeno, rama'a vahe'mofona kumi vahere huzmante'ne. E'ina kante magoke Ne'mo ke erizafa hu'nea avu'ava'zamo rama'a vahera zmazeri fatgo vahe tro huzmantegahie.

²⁰Anumzamoma kasegema zami'neana miko vahe'mo'za kumima nehazaza kesazegu zamine. Hianagi vahe'mo'zama rama'a kumima hzageno'a, Anumzamofo knare asunku'zamo'a mago'ane rama'a nehie.

²¹Ana hukna huno kumimo miko vahera kegva hu'neno fri'zana avrezamigeno, menina Anumzamofo knare asunku'zamo fatgo avu'avazana eritamisigeno, Jisas Kraisi Rantimofompinti manivava asimura erigahune.