ROMUDEENƆ 5:3-21

³Èe kɛ beee adoro, wée pↄnnaa kɛɛ kↄ̃n wa nawɛ̃akɛnao dↄ, zaakɛ wá dↄ̃ kɛ̀ nawɛ̃a è mↄ́ kↄ̃n mɛnao,

⁴mɛna è mↄ́ kↄ̃n dà maaao, dà maaa è mↄ́ kↄ̃n tãmaao,

⁵tãmaa sↄ̃ è wa nɛ́ro, zaakɛ Luda a yenzi dà wa nↄ̀sɛn a Ninii kɛ̀ à wa gbaa gãzĩ.

⁶Wa gbãasai guu Kirisi gà wamↄwa zaakɛrinↄ gɛ̃ɛ ũ gurↄↄ kɛ̀ Ludaa dìɛa.

⁷Gana gbɛ̃ maaa gɛ̃ɛ ũu aagaro. Ke gbɛ̃ke é we à ga gbɛ̃ maaa gɛ̃ɛ ũ gwɛɛ,

⁸ben Ludaa ↄ̀dↄawe dian á yewazi nà, zaakɛ wa durundekɛɛ guun Kirisi gà wa gɛ̃ɛ ũ.

⁹Lán yã bↄ̀wao nna nà sa à aru yãnzi, wa wa sina Luda pↄfɛ̃a à gãzĩ yã o dↄↄ́?

¹⁰Yã wá ĩi kↄ̃n Ludaomɛ, ben wa kɛo nna à Nɛ́ gana yãnzi. Lán wa kɛ Ludao nna nà sa, wa wa mìsina à kuuna wɛ̃̀ndio yãnzi yã o dↄↄ́?

¹¹Èe kɛ kɛ̀kiimɛ adoro, wée pↄnnaa kɛɛ kↄ̃n Ludao dↄ wa Dii Yesu Kirisi kɛ̀ tò wa kɛo nnaa gãzĩ.

¹²Gbɛ̃ mɛ̀n doo yãnzin durun gɛ̃̀ anduna guu, ben durun gaa ì. Lɛmɛ dↄ gaa kú baade píngia, kɛ̀ baade píngi durun kɛ̀ yãnzi.

¹³Durun kú anduna guu lɛ Musa doka kpɛ́ à mↄ́. Gurↄↄ kɛ̀ doka kuuro, Ludaa e durun yã daro,

¹⁴mↄde sɛna zaa Adamua ai à gàa pɛ́ Musaa ga kí blè baade píngia, baa gbɛ̃ kɛ̀ aↄ̃ↄe durun kɛ lán Adamu sãsãna bàroonↄ. Adamu nɛ́ gbɛ̃ kɛ̀ eé mↄ́ takamɛ.

¹⁵Mↄde ludangbaa é sí lɛ́kↄ̃zi kↄ̃n Adamu taarioro, zaakɛ lán gbɛ̃nↄ gà nà pari Adamu ado sãsãna yãnzi, Luda gbɛ̃kɛ kↄ̃n à gbaao kɛ̀ kà gbɛ̃nↄa pari Yesu Kirisi ado gbɛ̃kɛ yãnzi dɛ beeela.

¹⁶Ludangbaa é sí lɛ́kↄ̃zi kↄ̃n gbɛ̃ mɛ̀n do durun pìoro. Taari mɛ̀n doo pì bé à mↄ̀ kↄ̃n yãkpaɛkɛnao, ben yã vɛ̃̀ɛ gbɛ̃nteenↄa. Taarinↄ mↄ̀ kↄ̃n ludangbaao, ben yã bↄ̀ kↄ̃n gbɛ̃nↄ nna.

¹⁷Lán Adamu ado taari bé à tò gaa mↄ̀ à kí blè nà, Yesu Kirisi ado yã kɛ̀ à mↄ̀o bíta dɛ beeela. Beee yãnzi gbɛ̃ kɛ̀ Luda gbɛ̃kɛɛ kɛ̀ńnɛ, kɛ̀ à tò yã bↄ̀ńyo nna gbaa ũunↄ é kí ble wɛ̃̀ndi kɛ̀ è yãaroo guu.

¹⁸Beee yãnzi lán taari mɛ̀n doo pì tò yã vɛ̃̀ɛ bori píngia nà, lɛmɛ dↄ maakɛna mɛ̀n doo pì è tó bori píngi bↄ maa lɛ aↄ̃ wɛ̃̀ndi kɛ̀ è yãaroo e.

¹⁹Lán gbɛ̃ mɛ̀n do swãgbãaa bé à tò gbɛ̃nↄ gↄ̃̀ durundeenↄ ũ parii nà, lɛmɛ dↄ gbɛ̃ mɛ̀n do yãmana é tó gbɛ̃nↄ bↄ maa pari lɛ.

²⁰Doka mↄ̀ lɛ taari e àgↄ̃ kaara yãnzimɛ, mↄde kɛ̀ durun kàara, Luda gbɛ̃kɛɛ kàara dɛ beeela.

²¹Lán durun kíblena mↄ̀ kↄ̃n gaao nà, lɛn dↄ Luda gbɛ̃kɛ kíblena è tó wà bↄ maa lɛ, wà wɛ̃̀ndi kɛ̀ è yãaroo e wa Dii Yesu Kirisi gãzĩ.