Talun Ngana 35

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Iok nga hoena NeHalang hele lange Iakop ke teke, “O lohaka lamai ke la otu lakou nge Petel. Pe o lung heke hatanga e ke o heto heke NeHalang nenge lohot nge iong nga etue nenge o ua tim Esau ana.”

²Ol pe Iakop hele lange alona mur pe iri lochloch ngana nenge tetu luluch nge i ke teke, “A saua lemo aetapuna mur ke te lasus toto iange iri te at nga kileng e. Pe a nun sue imo ke a lemlem mule nga NeHalang matana pe a hetaua lemo hengeron mur.

³Ke het pe ta lohaka nga kileng nei ke ta lange Petel. Pe lape e lung heke tunginga ana hatanga e nga lamau ke e heto heke NeHalang. I NeHalang nenge halaulaua iau nga ure meena ngana mur nenge te lohotot nge iau. Pe I NeHalang nenge tu luluch nge iau nga kileng lochloch ngana nenge laia iri.”

⁴Pomalam te tunge reria ae tapuna mur pe talngaria ana uto mur lochloch lange Iakop. Pe Iakop alohite iri nga ae ouk ene rochroi langa kileng nenge Sekem.

⁵Ke het pe te lohaka pe te i te tela. Pe NeHalang poia mataunga palaungana ke lohot nge hehei pe hana nga tuele tana nemur nenge te tu rochroi nge Sekem ke te matau tote Iakop tutuna mur pe te kumia Iakop pe tutuna mur ero.

⁶Iok, Iakop pe hana pe hehei nenge te i luluch nge i neu, te i ke la te lohot nga tuele tana nenge Lus nga ich nenge Kanan. (Tuele tana nenge Lus, heueu nei te hetue ke ene laka tuele tana nenge Petel).

⁷Pe Iakop lung heke hatanga e nga lamau pe hetue kileng neu ke ene laka El Petel. (Luna laka NeHalang nenge Petel). Iange NeHalang lohot nge i nga kileng neu nga etue nenge ua tina ana.

⁸Pe Tipora nenge nauelele Repeka nga i kino ngana, mete nga lamau pe te alohite i nga ae ouk e ene rochroi langa kileng nenge Petel. Ana ae mes nga kileng Petel ilina hele nenge sio. Pe te hetetue ae neu ke ene Alon-Pakut. Luna laka; ae Ouk nenge tanginga ana.

⁹Nga etue nenge Iakop lohaka nga kileng nenge Patan-Aram ke mule nga ich nenge Kenan, NeHalang lohot mule nge i pe pete i pe hekerkereng ia i.

¹⁰Ol pe NeHalang hele lange i ke teke, “Heueu nei em laka Iakop pe nga hoena, hehei pe hana lape te hetue em nenge Iakop ero ol. Em heueu ngana nenge lape te heto iong ia, ngana laka Israel.” Ke pomalam NeHalang hetue i ke ene Israel.

¹¹Pe NeHalang hele lange i ke teke, “Iau NeHalang Nenge Lek Kerkerenga Palaungana Toto. Lape e poia lemtete mur ke te lohot ke iri halang toto pe te are nga tuele kina lochloch. Pe lem tete nemur hel lape te lohot ke iri naunga-ala ana hana mur.

¹²Pe ich nenge E tunge lange Apraham pe Isak nge nike, pe lape e tunge lange iong pe lem tete mur pule nge he.”

¹³NeHalang hele luluch nge i ke het pe lohaka ke la sapele.

¹⁴Ke Iakop hele luluch nge NeHalang pe heilangia kileng unne neu nga um sase ngana e nge hemes heke. Pe eusiling heke uain ke poi tunginga ia lange NeHalang. Pe eusiling heke ae oliua eina la nga um neu pule.

¹⁵Pe hetue kileng neu ke ene laka kileng nenge Petel.

¹⁶Iok, Iakop pe nena hana mur te lohaka nga kileng nenge Petel pe te i ke ramaria la nga kileng e nge ene Eprata. Te i ke te lala kura pe Retsel ana etue at sapele nenge lape hoho.

¹⁷Ol pe melmelenga nenga hohonga lohot ke palaungana toto nge i pe hoho sapele. Pe hei nenge halaua i ke hoho neu hele lange i ke teke, “O matau ero, tum i tamane pullo.”

¹⁸Nga etue nenge Retsel hoho eingana sio hakaka iange metmete lo. Ol pe eingana tah heulo pe hetue tuna tamane ngana neu ke ene laka Pen-Oni. Pe ero, temene Iakop hetue ke ene Pensamin.

¹⁹Ke Retsel mete pe te alohite i nga kue ilina. Nga kue nenge song ke lange Eprata (pe heueu nei te hetue ke ene laka Petlehem).

²⁰Pe Iakop hemes heke um sase ngana e ke heilangia Retsel mangana. Ke heueu nei, um neu kou mes kura.

²¹Ke het pe Iakop nenge ene e pule Israel loloun mule ke loparia naunga toto ana hesinga haka nge Miktal Eter ke la pol pe hemes sue nena pelpele.

²²Nga etue nenge Israel tunga kileng neu, longe nge te teke Rupen teu ke la maluluch nge temene nehei e pule nenge ene Pilah. Iakop tutuna mur iri analoch pe nai (12):

²³Liah tutuna mur: Pe tuna tengene ana nge Iakop laka Rupen. Ke het pe Simion pe Liuai pe Iuta pe Isakar pe Sepulon.

²⁴Pe Retsel tutuna mur laka: Iosep pe Pensamin.

²⁵Pe Retsel nena hekuleileinga ana hei nenge ene Pilah tutuna mur laka: Tan pe Naptali.

²⁶Pe Liah nena hekuleileinga ana hei nenge ene Silpa tutuna mur laka: Kat pe Asha. Ke Iakop tutuna nemur, hoe iri nga etue nenge te tu nge Patan-Aram.

²⁷Iok, Iakop la mule nge temene Isak nge Mamre. Kileng Mamre tu rochroi nge Kiriat-Arpa. (Kiriat Arpa, heueu nei te hetue ke ene laka kileng nenge Hepron). Kileng neu Apraham tu tala ia nge nike ke het pe Isak.

²⁸Pe Isak tu nga ich ke ana hesinga iri ana non kina lime pe ana non kina henel (180).

²⁹Ke ana non tu ke tuahuna toto pe mete sapele. Pe tutuna mur, Esau pe Iakop te alohite i ke ma luluch nge nena tete mur.