1Anutu aŋara hecneniŋ, mâreŋ ŋecjucfâcne sasawa ŋoŋe!
2Ʒâŋe biŋe‐ticne bafaharehuc gae hecneniŋ! mumumbiaŋ gae hesarickerâ heniŋ!
3Anutu ʒiŋuc âzâcneniŋ: “Eebapage bipinehec. Tâpiri sâkogere erâ râsifâcge jaŋe dape‐gareeŋgopieŋ.
4Mâreŋne mâreŋne maigao dunduŋ hunʒepieŋ, ehuc mumumbiaŋ gae hegarenʒepieŋ, ʒâŋegere mumumbiaŋ gae henʒepieŋ.”
5Warerâ Anutuzi wiac ewec i hone manac eniŋ: Ŋicŋondeŋko wiac eekac i bipinehec.
6E hâwec hetikieme mâreŋ kereŋne ewec; ŋic jaŋe opâ sâko kikezi fotâcnembiŋ; irec hâcne bubiaŋ manacnenʒepeneŋ.
7Tâpiri‐ticnezi guriŋ bapa gie tofamâc baekac, ʒâŋe‐ticnezi ŋicne ŋicne hone soŋaŋ ejareekac; irec râŋgeŋne jaŋe pepecne ehuc mi faharenʒepieŋ.
8Ŋicne ŋicne, Anutu‐nâŋec muteŋkeniŋ, mumumbiaŋ‐ticnere marac fânâŋ fuaoc;
9eki bâwâzâŋ‐nâpome juju guruoa juŋgopeneŋ, kike‐nâŋec soŋaŋkeme âte sowarierâ mi nâpojec.
10O Anutu, go ba esâic enâremeŋ, siliwa esâickeeŋgopieŋ irec sâc enâremeŋ.
11Go manahaŋ uficko jowambeŋ; go fai‐nâŋecko tagi ŋemâcne râemeŋ;
12go ŋic mana‐jaretec qizec‐nâŋecko âtembiŋ; go manahaŋ ʒocko â opâo humbeŋ; eme sifu baefuc‐nâporâ toma sâkoo râec‐nâpomeŋ.
13No ufuŋgao qowi bâzi barâ fâpemu, mumupaŋ‐nanere fârine bâfua‐garepemu.
14Ʒârâ hâriŋ maŋnao juhuc, micbipic‐nanezi mupaŋkepo i hâcne.
15Lama wokemaŋnehec rike‐garepemu, erâ lama ŋicnere âsu mumundoŋ; noniŋ bulimakao wâc bâmocke‐garepemu.
16Anutu araŋ bacneeŋgopieŋ ŋoŋe ware‐fârerâ mananiŋ, eme no wiac enarewec i binaŋ baŋarepe.
17Micbipic‐nanezi samarierâ wiracnepo, â nameŋ‐nanezi e muafeckewec.
18Maŋnanezi wiac hehesicne maŋkezac muzac, Wofuŋzi dâŋnanere hazec mi râezac.
19Erâ Anutu e jâmbomac hazec râewec, â nunumu‐nane manawec.
20Anutu e muteŋkezo, e nunumu‐nane mi mana takirewec, â aki anonoc‐ticne mi sakare‐narewec.
