1No maŋuruc jaha Wofuŋte woŋec jupo, eme noraopec fohorehuc wiwira‐nane manawec.
2E sisipiricte nombâŋkonec baefucnuwec, sohoŋ râqâcnaonec unucnuwec; erâ kike‐nane qânâ faio râeme âte ʒakiepo.
3E gae ɋâricne moc micnaneo râewec, Anutu‐nâŋecte mumuteŋ gae. I ŋic bocjahazi manarâ araŋ bacneniŋmu, erâ Wofuŋtao roweckeniŋmu.
4Ŋic moc maŋnezi Wofuŋtao roweckeocmu, â maŋfefe jaŋerao mi fohoreocmu, me burecŋic qac qâsoricne mi bâjâpec‐jopaocmu, ŋic iŋucnere manape ʒerine ekac.
5O Wofuŋ Anutu‐nane, go nâŋere manasuhuc mâsi â gie fuŋne fuŋne baekic i ʒarene fekac; ŋic me wiac moczi gohec sâc hehene mi ekac. No i muiŋ musawec ehuc binaŋne bazo mupe, sâcne mumufârene mi eocmu.
6Taha bâzi fuŋne fuŋnere mi egareekac, hazeczi dâŋ mamana ine bâfua‐naremeŋ; qowi hâcbuc ririke me sâqocnere taha bapa, i fua‐gareocte mi muekic.
7Eme mupo, “Manakic, no fisikopac, miti papiao nore dâŋ qâreŋkekicne fokac:
8Anutu‐nane, no micge reŋkepere aŋacnukac, â sâcmutâc dâŋge maŋnaneo fokac.”
9Bâbâpiaŋte biŋedâŋ tutumaŋ sâkoo mufuapo, no micbipic‐nane aka mi hecnepo, i Wofuŋ, go gahac manakic.
10No bâbâpiaŋ giegere dâŋ i maŋnaneo mi hefackepo, erâ‐eesanaŋgere â aki anonocgere biŋe mupo; no tutumaŋ sâkore maio buurucge â dâŋfârige mi hesoŋkepo.
11O Wofuŋ, go buurucge mi sakare‐narec, aki anonoc â jauŋfârige izi ʒimicnu basanaŋ ezejec.
12Ʒâic fâro fuŋne fuŋnezi bârârâŋnuŋgopieŋ, hehesic‐nane mi wowose‐fârenezi qâurucnuŋgopieŋ; jaŋe qizec susuc‐nanere ʒare jâuruŋgopieŋ, eme maŋnane wahakac.
13O Wofuŋ, manatec sâckeha bataracnuzemec, o Wofuŋ, fâro barâ ware baficnuc.
14Juju‐nane hetâcnezo muŋgopieŋ, jaŋe mâmâc sasawa qurutuarâ mimienʒepieŋ; no sisipiric fua‐nareocte ejarekac, jaŋe gorao qâwiwickerâ mamakucne enʒepieŋ.
15No “sowine, sowine” munareeŋgopieŋ, jaŋe mimi‐jeŋic manarâ sahac‐jeŋic gâgâmârâzejec.
16Â go wira basac egareeŋgopieŋ, jaŋe ine ʒeri ehuc bubiaŋ mana‐garenʒepieŋ; gore bâbâpiaŋte ejareekac, jaŋe dameŋ sâc munʒepieŋ, “Wofuŋ e kâcɋene.”
17No jâmbomac ŋic hapetac â qarâ suriŋne, irec Wofuŋ goki hone maiŋ enarec. Go hâcne babafic‐nane â ŋeŋezic‐nane, o Anutu‐nane, ŋeŋec ʒeʒepec mi ezemec!
