1Mumumbiaŋ Anutu‐nane, go dâŋemâc mi juc.
2Ŋic sindaŋne â burecne jaŋe micaaŋ maicnumbiŋ, ehuc nameŋ‐jeŋiczi siocdâŋ nazambiŋ.
3Jaŋe qaqaisoc dâŋ wicke‐narembiŋ, â maŋgâŋ râsi enarembiŋ.
4No jauŋ bacjopahape qoricnueŋgopieŋ, jaŋere erâ numuhape iŋuc enareeŋgopieŋ.
5Ine hâcne biaŋnere okacne sâqocne nareeŋgopieŋ, maŋjauŋte okacne qaisocnueŋgopieŋ.
6Ŋic sindaŋne moc ecnetec dâŋticne muzejec, repicne moczi dâŋko râezejec.
7Mumutara ŋic eki dâŋticne mugâpârezejec, nunumu‐ticnere maname bahac jaha ezejec.
8Juju dameŋ‐ticne qosackezejec, mafa‐ticne i furunezi rauckezejec.
9Naru motecfâcne bekâ enʒepieŋ, â ŋonâŋ‐ticne hozec ezejec.
10Ɋâricfâcne jaŋe mamacte ficsesuc râpeckerâ, qafec qawahac juhuc nânâre numunʒepieŋ.
11Moneŋ jaba râcnewec ŋic eki mafa‐ticne sakareme, omane jaŋe gie‐ticnere fârine bajunʒepieŋ.
12Moczi moc âgo jauŋ mi ecnezejec, erâ moczi moc bekâfâcne jaŋere busâqoc mi manazejec.
13Ɋâricfâcne omae‐fârenʒepieŋ, biri‐jeŋic ŋosa jaŋerao tarazejec.
14Mamacfâcne hehesic‐jeŋicte Wofuŋzi manasuzejec, â neŋgoc‐ticnere sâqocne mi bâtâmirezejec.
15I Wofuŋte maio fome honehuc juzejec; eme mâreŋko ine ŋic ere ninikec sanaŋ fuazejec.
16Wemocte? E jauŋ gie baocte mi mamanasu, qarâ suriŋne â hapetac fific bacjopawec, â buheheric bâfua‐jarekicne jaŋe hâmocko râec‐jopawec.
17E sâwecte ecnewecte sâweczi qazejec, jambuŋte takickewecte jambuŋ basazejec.
18E sâwecdâŋ i ŋaqi iŋucne heme huwec, irec sâweczi sahac biucko â siec wamboŋ‐ticnao huzejec.
19Erâ hoe ŋaqi tinac ecnehame rufazejec, â umbika tinac ecnehame joma juzejec.
20Wofuŋtaonec gie furi izi kisâfâc‐nane fua‐jarezejec, musâqorecnuhuc jueŋgopieŋ jaŋe hâcne.
21O Wofuŋ Anutu‐nane, goki ine ʒâŋe biŋegere erâ sacfozic enarec! Aki anonoc furi sâko fogarekacte bataracnuc!
22No qarâ suriŋne â hapetac jukopac, ehame bu ʒaʒamaŋ‐nane fâuckekac.
23Hae owâeme nâkumuczi omaeekac irec sâc ekopac, â mâŋâŋzi bisirec bawiseekac irec sâc.
24Sowa juku dieŋ‐nane qiric qârâc eme, sahac kekereŋ epo jukopac.
25Kisâfâc‐nane mu ruruc enareeŋgopieŋ, jaŋe honecnurâ qizec fofotaric eeŋgopieŋ.
26O Wofuŋ Anutu‐nane, go baficnuc, aki anonocgere sâcko bataracnuc.
27Megere qâreŋ fuakac i jowatutec honeniŋ; Wofuŋ, goki hâcne wiac ʒi emeŋ.
28Jaŋe sâwecdâŋ muzo murâ muniŋ, ehame goki jambuŋge bâfuac! Kisâfâc‐nane jaŋe qurutuanʒepieŋ; ehame kiŋaŋŋicgezi bubiaŋ manazejec.
29Qoricnueŋgopieŋ jaŋe mimizi ŋecjopazejec, mimi‐jeŋiczi bilaŋke iŋucne erâ foŋjopazejec.
30Micnanezi Wofuŋ daŋge musokahuc âzâcnezepac, ŋicguru sâkoo e mumbiaŋkezepac.
31Eki ŋic tac qararacne mefâre‐ticnao domaekac hâcne, ehuc hâmoocte mutaracneeŋgopieŋ jaŋere meonec bataraekac.
