1Wofuŋzi wira wâwâsic‐nane manaekacte no e maŋzi jauŋkekopac.
2Oc, e hazec râe‐nareekac, irec no jupemu sâc wâsickehuc juzepac.
3Hâmocte bitiŋzi rocnuwec, hâmoc haere uficzi orâŋnuwec, eme hâhâwic â bipic tatara fua‐narewec.
4Eme no Wofuŋte ʒâŋe wâsickepo: “O Wofuŋ, juju‐nane asao roc!”
5Wofuŋ e aki anonochec â tiŋne, Anutu‐nâŋec e buuruchec.
6Wofuŋ e ŋic maŋhumuc hone maiŋ ejareekac, no betaŋkehape eki baficnuwec.
7Maŋ qâqâtâc‐nane, go jujumanagao risiec, Wofuŋzi ehâmo‐garekac.
8Go maŋ qâqâtâc‐nane hâmockonec batarameŋ, ʒâŋeuc‐nane bâkereŋkemeŋ, kike‐nane fâfâckezacte sabeckemeŋ.
9Eme ʒi Wofuŋte maio, jujune jaŋere guruo jukopac.
10“No mâretec sâqorekopac,” iŋuc mupo, erâ sifu manasiŋkepo.
11No maŋnane gâckeme mupo, “Ŋic jaŋe burechec sasawa.”
12Wofuŋzi wiac sesic qeqeri tahacnuwec, irec okacne wemo râcnepemu?
13No waiŋzi taha bâzi bâfeŋnehuc Wofuŋte ʒâŋe riwaseckepe.
14No ŋic ŋokacfâcne sasawa jaŋere maio, Wofuŋ dâŋ mupaŋkecnepo irec fârine bâfuape.
15Mitiŋicfâc‐ticne jaŋere hâmoczi Wofuŋte maio furi sâko ekac.
16O Wofuŋ, no gore kiŋaŋŋic jukopac; kiŋaŋŋicge no kiŋaŋ narugere ŋokâ. Goki kâpâcwâru‐nane firuemeŋ.
17No daŋgere taha bafisi‐garehuc, Wofuŋ gore ʒâŋe riwaseckepe.
18Ŋic ŋokacfâcne sasawa jaŋere maio, Wofuŋ dâŋ mupaŋkecnepo irec fârine bâfuape.
19I Wofuŋ ufuŋ‐ticnere hae ʒoŋao epemu, Jerusalem rune, ŋoŋere ŋondeŋko. Wofuŋ mumbiaŋkeniŋ!
