1O Wofuŋ, dâŋ tiŋne manac! Wâwâsic‐nanezi bâfuacguoc! Eatuc tâmiric numu‐garekopac, hazec râec!
2Goki dâŋnane mutarazemec, gore ʒâŋezi wiac hone jaŋgeŋkeocmu.
3Go maŋnane esâickecmu me ŋafeo iqicnucmu, me ba esâic enarecmuo, ine mamanasu sâqocne mi bâfuacmu. Micnanezi aka mi qambaraŋkeekac.
4Ŋic jaŋe wiac kosa ehapie, no gore mic reŋkehuc, ʒika qaqa jaŋere hata mi âtepo.
5No gore itiroc bâjâpehuc jupo, hatage mi âte sifuckepo.
6No wâsicgukopac, Anutu, go micnaneo sâcne rocmu; hazec râerâ dâŋnane manac.
7Mâsi bahuc aki anonocgere fuŋne bataniŋkec; râsi wise‐jarehuc mefâregao dapeŋ bâfuaeŋgopieŋ, ŋic i jaŋere bâbâpiaŋ juekic.
8Ʒâŋe hândâŋge iŋucne bajucnuzemec, fakec rurumaŋgao hefacnuzemec,
9ŋic sindaŋne jaŋe sipiricnuzo eŋgopieŋ, râsifâc‐nane jaŋe hâmoc bâfua‐nareniŋte somâ râe‐nareŋgopieŋ hâcne.
10Wokemaŋ dâŋjeŋiczi busâqoc mamana bâniniŋke‐jarewec, micjeŋicko penaroŋ dâŋ fuaekac.
11Jaŋe bâjâpecnu wareku orâŋnuŋgopieŋ, hetapaicnupie mâreŋko qarâ fopere ejarekac.
12Laioŋzi qowi kiocte ʒawieekac iŋuc eŋgopieŋ, laioŋ motecne uupicko ruc barâ foekac irec sâc.
13O Wofuŋ, go fahare maic‐joparâ herândiŋ‐jopac! Ʒikazi juju‐nane sindaŋŋic jaŋere meonec batarac.
14O Wofuŋ go megezi ŋic jaŋeraonec bataracnuc, juju kâdoc‐jeŋic mâreŋte wiacko fokac jaŋeraonec hâcne. Wiac bâmocke‐jaremeŋ izi hobu‐jeŋic fusucmazejec, naru motecfâc‐jeŋic jaŋe wâc sâcjopame jaŋere ɋiefâc jaŋe tiwâne ronʒepieŋ.
15No ine tiŋke biaŋ ekicnezi gore ʒâŋe mai honezepac, mana ɋâɋârehuc hawarige honerâ gapecnuzejec.
