1Qâpuc jaŋe wemocte jufâfânâŋ eeŋgopieŋ, â ŋicne ŋicne jaŋe dâŋ racne mana biric eeŋgopieŋ?
2Wofuŋ â Mesia‐ticne râsi ejacteniŋte, mâreŋ ŋicwofuŋ jaŋe meo roroc eeŋgopieŋ, â ŋicbomboŋ jaŋe ââte sanaŋ ehuc mueŋgopieŋ:
3“Kâpâcwâru‐jekic hezupene wahaoc, niŋgiŋ‐jekic hetâcnepene rârieoc.”
4Sambâŋko ŋeekaczi gâwiekac, Wofuŋzi honec‐jopahuc mu âke sisic ejareekac.
5Erâ ine mana gâpâre‐jarehuc jazaocmu, kimbeŋko hâhâwic hejarehuc ʒiŋuc muocmu:
6“Noni hâcne ŋicwofuŋ‐nane âkendâŋnepo, Zioŋko, nahacne tiri tikio.”
7Wofuŋte mumupaŋ musokape. E ʒiŋuc nazawec: “Go ŋokâ‐nane, go hâcne miŋecgac bâfuacgukopac.
8Numu‐naretec ŋicne ŋicne biŋe qagarepe, mâreŋ qaŋeŋne rauckecmurâ qikiŋne‐garepe.
9Goki aeŋ ɋaruczi qazuc‐jopazemec, afezi kuʒi bakicne iŋucne qanʒaŋ‐jopazemec.”
10Irec ŋicwofuŋ ŋoŋe maŋfânâŋhec enʒepieŋ, mâreŋte guriŋ bapa, uŋdâŋ mananʒepieŋ.
11Wofuŋ araŋ bacnehuc kiŋaŋ qacnenʒepieŋ, jâjâwâckehuc kikene muduckenʒepieŋ.
12E kimbeŋ qaŋareme hatao sipirickenʒipiŋte, kimbeŋ‐ticne afecnea bâruŋkeocmu. Ere dapeŋko soŋkeniŋmu sasawa jaŋere manapene ʒeri bubiaŋ eekac.
