1Maŋnane ʒawiekac, o Anutu, maŋnane ʒawiekac; no gae hepemu; no mumumbiaŋ gae hepemu; maŋ qâqâtâc‐nane go mana ɋâɋârec.
2Gita kulele ŋohe mana ɋâɋârenic, furic wiwickepe mana ɋâɋâreoc.
3O Wofuŋ, no qâpuc jaŋere ŋondeŋko daŋge gazape, no ŋicguru jaŋere ŋondeŋko juhuc mumbiaŋgupe.
4Buurucgezi feku sambâŋ heuakac, jauŋ fârigezi feku karoracko fisikac.
5Anutu, go fahare sambâŋ qâhuckerâ fezemec, eri tatamacgezi mâreŋ sâko mâreŋ sâcke‐fârezejec.
6Mefâregezi bafic‐nâpohuc nunumu‐nâŋec manac, eme jorocfâcge nâŋerao bâbâpiaŋ fuazejec.
7Anutuzi tiri ufuŋ‐ticnao ʒiŋuc muwec: “No kiwaehuc Sikem hae bâtâc bapemu, â Sukoti wâneŋ kâdoc qapemu.
8Gileade rauckekopac, Manase i wâc nore; Eferaim e momori dunane, Juda e ŋicwofuŋ gunu‐nane.
9Moabi e kike ʒuʒure râqâc‐nane; Edomtao kikehuhu‐nane wickecnepemu; Filisa mâreŋ saoreŋ qacnepemu.”
10Mozi hae basanaŋkekicnao barâ râecnuocmu? Mozi Edomko jowacnu raocmu?
11Anutu, go jâmbomac suŋgiŋ‐nâpomec me? Go momorifâc‐nâŋec râpec‐jopatec buc jueŋgopieŋ.
12Râsi jopanaŋte hone bafic enârec; ŋiczi babafic‐nâpo i fârimâc.
13Anutuhec sâcne momori wânʒâŋ enaŋmu; eki râsifâc‐nâŋec ro waha âte ejareocmu.
