1O Wofuŋ, go wemocte taicko domahuc jukomec? Ʒârâ hâriŋ dameŋko wemocte soŋkeekic?
2Sindaŋŋic jaŋe pepec ehuc hapetac fific guguriŋ ejareeŋgopieŋ; jaŋac dâŋbitiŋ râeeŋgopieŋ ira kicjopazejec.
3Sindaŋŋic e maŋticnere aŋac irec penaroŋ eekac, moneŋ mafare andac eekaczi Wofuŋ musoriŋkerâ râpeckeekac.
4E sâke bâbâc ehuc Wofuŋte moc mi muekac, ʒiŋuc sawa manasuekac: “Anutu e mi jukac.”
5Dameŋ sâc wiac ebac eme mâriri fuacneekac; gore okacdâŋ faic fokac, mi mamana‐ticne; kisâfâcne sasawa ine fura‐jareekac.
6Maŋnezi manasuekac: “Mi rândiŋkepemu, dameŋne dameŋne ʒârâ hâriŋ moc mi maicnuocmu.”
7Micticnao mumusoriŋ â eeatuc â ima bapa fuserâ fokac, nameŋnere rurumaŋko bâbâsifuc â hehesic soŋkerâ fokac.
8E hae sâc somâ barâ foekac, soŋkerâ ŋeku ŋic bahacmâc qâhâmoekac, ŋic mamakucne honeocte ʒâŋenezi ruc baekac.
9Laioŋzi uupicko foekac iŋuc soŋkerâ ŋeekac, ŋic mamakucne hâpoocte ruc bahuc ŋeekac hâcne, eku hâporâ repa‐ticnezi basanaŋkeekac.
10Huacbucne qakume betaŋkeekac, tâpiri wânʒâŋ‐ticnere rândiŋke qaekac.
11Ŋic sindaŋne e maŋnezi muekac, “Anutu e nikeckejec, ʒâŋe maine bâsâockejec, moc mi honeocmu.”
12O Wofuŋ, go faharec; o Anutu go baficnuc! Ŋic qarâ suriŋne jaŋere mi nikecguoc!
13Ŋic sindaŋhec e wemocte Anutu musoriŋkekac? Wemocte maŋnezi mukac, “Dâŋgie mi nareocmu?”
14Go honeekic. Ʒâic serereŋ fuame qâoma mi eekic. Giene bacmurâ mamanagao râetec foekac. Huacbucnezi gore mamanac juekac, â goki bekâ mâsiŋ mamac rau ecneekic.
15Go sindaŋŋic â sâqocne bapa meombâŋ‐ticne qazuzemec; eebapa‐ticne repicne irec bâbâtiŋ gie bazemec; bakutecne omae‐fârezejec.
16Wofuŋ e Wofuŋ Sâko juraʒihuc juocmu sanaŋ, qâpuc guru jaŋe mâreŋ‐ticnaonec ratâmirenʒepieŋ.
17Wofuŋ, go maŋhuhuŋ jaŋere wira wâwâsic dâŋ manaekic, go maŋjeŋic hutuŋkeekic â hazec râe‐jareekic;
18ehuc bekâ mâsiŋ â ro waha âte ejarekicne, jaŋe ŋezic‐jopahuc dâŋjeŋic mutiŋneekic; eme mâreŋŋic moczi wiac gâgâpâcne mocwâc mi bâfuazejec.
