MATUŠ 13:24-58

²⁴Phenďa lenge mek the aver podobenstvo: “O ňeboskero kraľišagos hino sar o manuš, savo sadzinďa lačho semenos pre peskeri maľa.

²⁵Ale medik o nipi sovenas, avľa leskero ňeprijaťeľis a sadzinďa o kukoľ maškar o žužoďiv pre maľa a geľa het.

²⁶Sar bariľa o žužoďiv a anďa o uľipen, akor pes sikaďa the o kukoľ.

²⁷Avle o sluhi a phende le chulajiske: ‘Rajeja, či na sadzinďal o lačho semenos pre tiri maľa? Khatar akor avľa kada kukoľ?’

²⁸Ov phenďa: ‘O ňeprijaťeľis ada kerďa.’ O sluhi leske phende: ‘Kames, hoj te džas a te cirdas len avri?’

²⁹Ov phenďa: ‘Na, bo sar cirdena avri o kukoľ, šaj cirden avri the o žužoďiv.

³⁰Muken, hoj te barol jekhetane soduj dži e žatva, a andre žatva phenava olenge, save skiden upre: Skiden upre ešeb (peršo) o kukoľ a phanden len andro snopi te labarel, ale o žužoďiv ľidžan andre miri šopa.’ ”

³¹A pale lenge phenďa aver podobenstvo: “O ňeboskero kraľišagos hino sar o horčično semenos, so iľa o manuš a sadzinďa pre peskeri maľa.

³²Oda semenos hino nekcikneder maškar savore semena, ale sar barol avri, hino bareder sar aver rastlini a ačhel lestar stromos. Avke o čirikle peske bešen pre leskere konara.”

³³A vakerelas lenge mek the aver podobenstvo: “O ňeboskero kraľišagos hino sar o drožďi, so iľa e džuvľi a rozkerďa andre igen but aro, medik calo chumer na avľa upre.”

³⁴Kada savoro vakerelas o Ježiš andro podobenstva le nipenge a bi o podobenstva lenge na vakerelas ňič,

³⁵hoj pes te ačhel oda, so sas phendo prekal o prorokos: “Phundravava miro muj andro podobenstva a vakerava ola veci, so sas garude akorestar, sar sas stvorimen o svetos.”

³⁶Akor omukľa o Ježiš le nipen a geľa andro kher. Avle ke leste leskere učeňika a phende leske: “Phen amenge avri o podobenstvo pal oda kukoľ pre maľa.”

³⁷Ov lenge odphenďa: “Oda, ko rozčhivkerel o lačho semenos, hin o Čhavo le Manušeskero;

³⁸e maľa hin o svetos; o lačhe semena hine o manuša le kraľišagoskere; o kukoľ hine o manuša le nalačheskere;

³⁹o ňeprijaťeľis, savo len sadzinďa, hin o beng; e žatva hin o agor le svetoskero a ola, save kiden upre, hine o aňjela.

⁴⁰Avke, sar pes kidel upre o kukoľ a labarel andre jag, ela the pro agor kale svetoske:

⁴¹O Čhavo le Manušeskero bičhavela peskere aňjelen a kidena avri andral leskero kraľišagos savoren, save ľidžan le manušen andro binos, the olen, save keren o nalačhipen.

⁴²A čhivena len andro jagalo bov. Ode ela o roviben the randena le dandenca andre dukh.

⁴³Akor švicinena o čačipnaskere manuša sar o kham andro kraľišagos lengere Dadeskero. Kas hin kana, hoj te šunel, mi šunel!”

⁴⁴“O ňeboskero kraľišagos hino sar o poklados garudo pre maľa. Sar les o manuš arakhľa, garuďa les a radišagostar geľa a bikenďa savoro, so les sas, a paľis cinďa odi maľa.

⁴⁵A pale, o ňeboskero kraľišagos hino sar o manuš, savo cinavkerel a rodelas o šukar perli.

⁴⁶A sar arakhľa jekh dragaňi perla, odgeľa, bikenďa savoro, so les sas, a cinďa la.”

⁴⁷“Mek, o ňeboskero kraľišagos hino sar e sita, so mukle andro moros a zachudľa savore ribendar.

⁴⁸A sar sas pherďi, cirdle la avri pro brehos, bešle peske a skidle o lačhe ribi andro košara a o nalačhe čhide avri.

⁴⁹Avke ela the pro agor le svetoske: Avena o aňjela a lena avri le nalačhen le čačipnaskerendar

⁵⁰a čhivena len andro jagalo bov. Ode ela o roviben a randena le dandenca andre dukh.”

⁵¹O Ježiš lenge phenďa: “Achaľiľan kaleske savoreske?” A on leske odphende: “He.”

⁵²Ov lenge phenďa: “Vašoda dojekh sikado manuš, savo pes sikaďa pal o ňeboskero kraľišagos, hino sar o chulaj, savo lel avri andral peskero barvaľipen the neve the purane veci.”

⁵³Sar dovakerďa o Ježiš kala podobenstva geľa odarik het.

⁵⁴Avľa andre odi phuv, kaj bariľa avri, a ode sikavelas len andre sinagoga avke, hoj pes čudaľinenas a phenenas: “Khatar les hin ajsi goďi the zazraki?

⁵⁵Či nane ov le ťesariskero čhavo? Či pes na vičinel leskeri daj Maria a leskere phrala Jakob, Jozef, Šimon the Juda?

⁵⁶Či nane savore leskere pheňa ke amende? Khatar les hin kada savoro?”

⁵⁷A na priile les. O Ježiš lenge phenďa: “O prorokos hino bi e pačiv ča ode, kaj bariľa avri the andre peskero kher.”

⁵⁸Na kerďa ode but zazraki, bo na sas len pačaben.