Matewuzhu 13:24-58

²⁴Yinsa khuwooza nlikaniso nkina araka: “Ofwalume wa pinkuuni ori nkhama ntthu mmote azaliyeeyo peewu yooshapweya mmashapa mwawe.

²⁵Osikhu mmote, atthu ooshi eettaka olala, khuta atuwi vakatthi wa tiriku khuzalavo ntakhatakha, khulawa.

²⁶Wakathi tiriku ewuliyeevo khupuwa misaasi zaya, naye ntakhatakha khupuwa misaasi zaya.

²⁷“Akarumeya a mweenyewe nshapa khulawa wa mweenyewe khumuuza yoori: ‘Mbwana, mweeyo mwaazaliye peewu yooshapweya mmashapa mwenu. Khi aphano ntakhatakha lapuwa vayi?’

²⁸Ye khujipu yoori: ‘Atuwi ti arettiye epo zaya.’ Akarumeya apale khumuuzela yoori: ‘Mbwana mwintakha fweeyo nalazemo?’

²⁹Ye khujipu yoori: ‘Wala, maana, amana mwikhulakamo ntakhatakha nttho, mwintta okhula vamote na tiriku.

³⁰Mwilikhe ziwulele vamote mpakha wakathi wa wuurula. Kintta owooza anamuurula yoori: “Mwikusanye khapula ntakhatakha mwifuke mashittha likhoziwe; mwikusanye tiriku mwitthe va sakafu vaka.’”

³¹Na khuwooza nlikaniso nkina araka: “Ofwalume wa pinkuuni ori nkhama phunje ya samuli, ntthu anthulaaye khuzala mmashapa mwawe.

³²Eto ttiitthiiru zayita peewu zooshi, amana owula onziti miitthi zooshi za mmashapa, anta anyannyi ojeka vijaaro n'virapi mwaya.”

³³Khuwooza nlikaniso nkina araka: “Ofwalume wa pinkuuni ori nkhama fwaramento muukha anthuulaaye khuphakanya na ofu wa tiriku wa waatta, wooshi khujakhuwa.

³⁴Yinsa aari wuuza khuntti etile, khwa nlikaniso. Weekhweele, khina etthu moote aari owoozaaye woohiiyi khwa nlikaniso.

³⁵Eto yaari orettikhana yoori eretteye etile yaalupiweeyo ti napiyu yoori: “Kinteela ofunula milomo zaka khwa nlikaniso, na olaleya vitthu zoovitheya waaza wumpiwa wa olumwenku.”

³⁶Aphano ye khuwaalikha atthu apale khulawa owawe. Anakhiyoni awe khumwaattama khunvekela yoori: “Oneeleze nlikaniso wa ntakhatakha.”

³⁷Ye khujipu yoori: “Otule aazaliyeeyo peewu wooshapweya ti Mwaana wa Pinaatamu.

³⁸Nshapa olumwenku, peewu yooshapweya aana a Muufwalume. Ntakhatakha aana a sheethwani.

³⁹Atuwi aazaliyeemo ti sheethwani. Wuurula, mwiisho wa wakathi, akarumeya a wuurula malayikha.

⁴⁰Nkhama etthiipo ntakhatakha linuuruliwaazo khukhoziwa va moottho, enttela wiiya etthiipo mwiisho wa olumwenku.

⁴¹Mwaana wa Pinaatamu onttela oruma malayikha awe, alazemo muufwalume mwawe zooshi epile zookwakwanttula, na apale anrettaaye vitthu zootakhala.

⁴²Aweeselele va njocho la moottho, attaapho onttela wiiyavo olila na oluma meeno.

⁴³Aphano anashariya anttela waara nkhama njuwa muufwalume wa Papaaya. Ariina mashiilo, ti asiile.”

⁴⁴Ofwalume wa pinkuuni ori nkhama njuju loovithiwa mmashapa. Ntthu mmote, khulawa khusikana, na ye khuvitha opheya. Mwaasa woofurahi khulawa khuuzanyisa vitthu zawe zooshi aarinaazo khuuzanya nshapa ntthile.

⁴⁵Theenya Ofwalume wa pinkuuni ori nkhama nakusiyanti aneekesaaye mawe ootafikhana.

⁴⁶Noosikana liwe la fwayita khuluyeene, khuuzanyisa vitthu zooshi aariinaazo khuuzanya.”

⁴⁷“Ofwalume wa pinkuuni ori nkhama ntthavi laweesiwa mpahari khuula wakhula jaati ya swi.

⁴⁸Amana liitaala, anamajiya anfutthela vathi. Aphano yo khukusanya swi epile zooshapweya khuttha mmakapaja, ila epile zoohishapweyi khweesela.

⁴⁹Enttela orettikhana etthiipo mwiisho wa olumwenku. Malayikha anteela owaaphakula ootakhala rooho na anashariya,

⁵⁰aweeselele va njocho la moottho apale ootakhala rooho, attaapho onttela wiiyavo olila na oluma meeno.”

⁵¹Aphano Yinsa khuwoozela yoori: “Zaweeleyani vitthu zooshi kilupiyeeyo?” Yo khujipu yoori: “Aaa!”

⁵²Ye khuwooza yoori: “Tiito wakhula namanozela a kano anozeliweeyo monkoni wa Ofwalume wa pinkuuni onlattanana mweenyewe nyuupa anlazaavo va njuju vawe vitthu pheeya na vitthu zaraku.”

⁵³Paata ya Yinsa wiisha olupa milikaniso epile, khulaawo okhule waya.

⁵⁴Khufiya sitati yawe, ohali aari wiikhalaawo. Ye khwaaza owaasomisa atthu nsinakooka. Atthu ooshi khwiiya ooshankisiwa, khusala oozela yoori: “Ojuwa opu apattha vayi na owahi wa oretta minjuza?

⁵⁵Khahi mwaana wa kalapinteero? Nzina la mamaawe khahi Mariyamu? Attwiize khayi Tiyaaku, Yuusufu, Simawu na Yuuda?

⁵⁶Alupuwe ooshi khaniikhala nttumphu? Khi vitthu epi apattha vayi?”

⁵⁷Atthu ooshi khuhinkhupali. Ila ye khulupa yoori: “Napiyu ti wooshitahiwa phantte zooshi, ila mmuti mwawe na owawe khanshitahiwa.”

⁵⁸Yinsa khaarettiye minjuza zawaatta mmuti mphule, maana yo khaarina amini.