Markus 4:23-33

²³Iö a wor selingan epwe rongorong.”

²⁴Jesus a pwal üreniir, “Oupwe aü selingemi ngeni mine oua rongorong! Ewe chök aükük oua aea le aükük, iei ewe aükük Kot epwe aea ngenikemi, nge epwe fen lap seni.

²⁵Pun iö a wor an, Kot epwe achomongala, nge iö esap wor an, Kot epwe pwal mwo nge angei seni ewe ekis a wor ren.”

²⁶Iwe, Jesus a sopwela le pworaus ngeniir, “Mwün Kot a wewe ngeni eman aramas a amworafeili pwükil won an tanipi.

²⁷A möür lepwin o pwäta lerän. Ewe pwükil a kinoputä o mämäritä, nge püsin i esap weweiti ifa usun an mämäritä.

²⁸Ewe pwül a püsin föri met ekewe irä repwe mämäritä o ua ren. Akomwan a kinoputä o mämäritä, mürin a fis etin, nge lesopolan a wor uan.

²⁹Nge lupwen ekewe föün wiich ra mau, ewe aramas a kini, pun a tori fansoun kinikinin räs.”

³⁰Jesus a pwal apasa, “Met sipwe tongeni awewe ngeni ewe Mwün Kot? Are meni sokun pworausen awewe sipwe aea pwe sipwe tongeni awewe ngeni?

³¹A wewe ngeni eföü pwükilin irä, ewe mi fokun kükün seni pwükilin irä meinisin. Eman aramas a angei ei sokun föün pwükil o fotukätiu le pwül.

³²Mürin ekis chök fansoun a märitä o wiliti efoch irä mi watte seni irä meinisin lon an tanipi. A wor palan mi watte, pwe ekewe machang ra ässito wor o föri faser won ia a nür ie.”

³³Iwe, Jesus a afalafala ewe kapasen Kot ngeni ekewe aramas o eäni chomong sokun pworausen awewe usun ekei. A pworaus ngeniir lon ükükün met ra tongeni weweiti.