Mak 4:23-33

²³!Munak ralingomi mul, mihetaengon revi asa koa namul naviteni!”

²⁴Ka Iesu viteni mun min keil vit, “Mihetaengon revi asa koa naviteni min kami. Veni Ahi hesan ileilien teni min kami housil longkatien onami. Sakini, munak mihelong kati, hesan ileilien hemarite mok min kami.

²⁵Meatin koa kilea revi selusien onak, Ahi houmoni heilea revi mok, ka meatin koa rokilea revitei aneite teni, havivi koa mundemi vit kilea eni tuai, Ahi hekulati rani.”

²⁶Ka evus, Iesu viten risi vit, “Hiasuvien onen Ahi suval avong tai, meatin tai va revin utite keil en ah sen.

²⁷En vongien, kei matil ka en meneai, mules mual vasi out. Ka mukos, utite keil enek amules aviteh, alekat sise one avamoul, ka meatin enek rokileatei keke amoul mukave.

²⁸Atan enges, kei sasen mumon utite keil amoul. Anatin, keil avitehiteh, amumon vatte, ka ason heite.

²⁹Ka navong heite emen, meatin ten ah va musuhuti ka lahi va ris teim.”

³⁰Ka Iesu vit risi vit, “?Hiasuvien onen Ahi suval asa? ?Nihit kilea eni heka en tatavolien sa?

³¹Kei suval uti avek koa mot vita en vatiai tai. Kei havivi mok en utiai vasi keil.

³²Ka navong moul mai mariso, mulin ai sav keil. Son angoite keil amariso ka atahos, ka aman keil umai amumon anu ome keil en nimal teni.”

³³Ka Iesu viten selusien onen Ahi en tatavolien keil enek, mal en asa keil availea avakuri.