Markus 16

1

2

3

4

5

6

7

8

9

10

11

12

13

14

15

16

¹Wesin ewe ränin sapat Maria Maktalene, Maria inen James me Salome ra kamö lö pwokus, pwe repwe feila o epiti somän Jesus we.

²Iwe, lesosorusichin ewe aeuin ränin wiik, lupwen akkar a tötä, ra feila ren ewe peias.

³Iwe, ra kapasfengen lefiler, “Iö epwe pünüüw ngeni kich ewe fau seni mesen ewe peias?”

⁴Nge lupwen ar neneloi ewe peias, ra küna pwe ewe fau mi fokun watte a fen mwöküt seni mesen ewe peias.

⁵Iwe, lupwen ar tolong lon ewe peias, ra küna eman alüal mi üföüf echö üf mi pwechepwech, a mot lepelifichin ewe peias me epek. Iwe, ra fokun rükö.

⁶Ewe alüal a üreniir, “Ousap rükö, üa silei pwe oua kütta Jesus ewe re Nasaret, ewe mi iräpenges. Esap nom ikei, pwe a manausefälitä. Oupwe katol ewe leni ia ra peiaseni ie.

⁷Iei oupwele feila o üreni nöün kewe chon kaiö pwal Petrus, pwe epwe akomwola mwer Kalilea. Ikenan repwe küna i, usun a fen üreniir.”

⁸Iwe, ekewe fefin ra towu seni ewe peias o süla fän ar chechech me rükö. Nge resap apasa och ngeni eman, pun ra niuokus.

⁹Mürin än Jesus manausefäl, lesosorusichin aeuin ränin wiik, a akomwen pwä ngeni Maria Maktalene, i neminewe Jesus a atowu ekewe füman anün rochopwak seni.

¹⁰Iei mine a feila o asile ngeni chiechian kewe mi letipeta o kechü usun mine a küna.

¹¹Nge lupwen ar rongorong pwe Jesus a manau o neminewe a küna, resap lükü i.

¹²Mürin ei, Jesus a pwä lon pwal eu sokun lapalap ngeni ruoman me lein ekewe chon kaiö, lupwen ra fetal lemälen ewe fanü.

¹³Ekei ruoman ra liwiniti ekewe ekoch chon kaiö o apworausa ngeniir usun mine ra küna. Nge ir resap lüküür.

¹⁴Mürilan meinisin Jesus a pwä ngeni ekewe engol me eman chon kaiö lupwen ra mongöfengen. Iwe, a fönöör pokiten esap wor ar lükülük, ra pwal tipeförea, pun resap lükü alon chokewe ra küna pwe Jesus a manausefäl.

¹⁵Iwe, a üreniir, “Oupwe feila lon unusen fanüfan o afalafala ewe Pworausen Manau ngeni aramas meinisin.

¹⁶Iö a lükülük o papatais epwe küna manau, nge iö esap lükülük epwe angei liwinin an tipis.

¹⁷Iwe, chokewe mi lükülük repwe angei tufich pwe repwe föri ekei manaman: Repwe asüela anün rochopwak fän itei, repwe fos lon kapasen ekis.

¹⁸Are repwe amwöchü serepenit ika ünümi poison, resap feiengau ren. Repwe pwal iseis pöün won chon samau, iwe, repwe pöchökületä.”

¹⁹Mürin än Jesus fos ngeni nöün kewe chon kaiö a feitä läng o mottiu lepelifichin Kot.

²⁰Iwe, ekewe chon kaiö ra feila o afalafal ekis meinisin. Nge ewe Samol a etiir lon ar angang o anüküchara ar afalafal pwe a let ren ekewe manaman ra föri.