MARKO 4:23-33

²³Ái koner a nem ngo na talas má na mánán, ki na kis án alongra!”

²⁴Má a parai si di mul ngo, “Gama hol páptai erei gam longrai. Kálámul er na lala longra pasi worwor si Káláu, ái Káláu na tari marán mánán singin má na apakta pasi kán mánán urami.

²⁵Ngorer ái koner a hol páptai pinpidan káián ái Káláu, ái Káláu na apakta pasi kán pinpidan i bál má na lala mánán. Mái koner kápte a hol páptai kán pinpidan, ái Káláu na pah palai mudán er a kis i kán hol.”

²⁶Mái Iesu a worwor artálár ngoromin, “Lolsit si Káláu a ngoromin. Kesi kálámul a soi balbal i kán rákrák.

²⁷Marán i bung a kis palai, má kesi bung má, a han laumái. A mákái mákte kopkom no mák pakta, má kápate mánán ngo ngádáh a apuar pasi ngoi.

²⁸Bim sang a mon i kán rakrakai suri apakta i namnam ák marán. Kopkobon a táil má namur nirwán, má támin a lu murmur sang.

²⁹Má ngo wán a matuk, ki ák il pasi i pákánbung án ililur.”

³⁰Mái Iesu a parai si di mul ngo, “Gita toh arwat pasi lolsit káián ái Káláu mai dánih? Má dánih á pinpidan artálár gita parai ur on?

³¹A arwat mai kotlin kali ngo di soi a gengen.

³²Má namur a kopkom, má ái a pakta i di á bos kubau no, má ák oboi tara rákán arsagil. Má bos man di kis i tan rákán má dik pákpák on má dik páhiuh on.”

³³Mái Iesu a para tari marán pinpidan artálár singin matananu. Kápate arbin mam tekesi worwor, pinpidan artálár sár arwat sang mai mánán kándi matananu, má kápate para te worwor artálár mul na sorliwi kándi mánán. Mái sár i pákánbung kán kalilik án aratintin masik di kis i narsán, a apos tari muswan on si di.